អាជ្ញាធរខេត្តព្រះសីហនុ ធ្វើសន្និសីទសារព័ត៌មាន…
- ព្រះសីហនុ
ខេត្តព្រះសីហនុ ៖ នៅសាលាខេត្ត នារសៀលថ្ងៃទី៦ កុម្ភ: កន្លងមក មានរៀបចំធ្វើសន្និសីទព័ត៌មានមួយក្រោមអធិបតីភាពលោក ផៃ ប៊ុនវណ្ណ: អភិបាលរងខេត្ត…
ខេត្តព្រះសីហនុ ៖ នៅសាលាខេត្ត នារសៀលថ្ងៃទី៦ កុម្ភ: កន្លងមក មានរៀបចំធ្វើសន្និសីទព័ត៌មានមួយក្រោមអធិបតីភាពលោក ផៃ ប៊ុនវណ្ណ: អភិបាលរងខេត្ត ជូនដល់ប្រព័ន្ធផ្សព្វផ្សាយជាច្រើនអង្គភាព ដើម្បីបានផ្សព្វផ្សាយជាសាធារណ:ដល់ប្រជាពលរដ្ឋ ទាក់ទងទៅនឹងការចុះអនុវត្តសាលដីកាតុលាការកំពូលដ៏ចម្រូងចម្រាស រហូតមានការបាញ់របួសធ្ងន់ម្នាក់ និងចាប់ខ្លួន៤នាក់ បន្ទាប់ពីមានការប៉ះទង្គិចគ្នារវាងអ្នកប្រឆាំងសាលដីកា និងកម្លាំងអនុវត្តសាលដីកាមានប៉ូលិស កងរាជអាវុធហត្ថ និងទាហាន ។
លោក ផៃ ប៊ុនវណ្ណ: អភិបាលរងខេត្ត ដែលបានដឹកនាំការអនុវត្តសាលដីកានោះបានមានប្រសាសន៍ថា
ការអនុវត្តសាលដីកាតុលាការកំពូល រដ្ឋបាលខេត្តបានសហការជាមួយព្រះរាជអាជ្ញាអមសាលាដំបូងខេត្ត កាលពីថ្ងៃទី២៤ មករាកន្លងមក ។ លោកថា មិនអាចជំទាស់បានទេក្នុងនាមរដ្ឋបាលខេត្ត អនុវត្តតាមសំណើរបស់ព្រះរាជអាជ្ញាអមសាលាដំបូងខេត្ត ដែលបានស្នើសុំមកអាជ្ញាធរខេត្ត និងកងកម្លាំងប្រដាប់អាវុធ ចូលរួមអនុវត្តសាលដីកានៅចំណុចភូមិគគីរ ឃុំបិតត្រាំង ស្រុកព្រៃនប់ ។
លោកអភិបាលរងបានបញ្ជាក់ឲ្យដឹងទៀតថា មុនពេលចុះអនុវត្តសាលដីកា រដ្ឋបាលខេត្តបានបើកកិច្ចប្រជុំពិភាក្សា ដើម្បីផ្សព្វផ្សាយទៅដល់សមត្ថកិច្ចពាក់ព័ន្ធទាំងអស់ក្នុងការអនុវត្ត ដោយមិនអនុញ្ញាតឱ្យកងកម្លាំងទាំងអស់ប្រើប្រាស់នូវអំពើហិង្សា ក៏ប៉ុន្តែនៅពេលចុះអនុវត្តនៅតែមានអំពើហិង្សាកើតឡើង ដែលជាការគួរឱ្យសោកស្តាយជាទីបំផុត ។
លោកបានបន្តឲ្យដឹងបន្ថែមទៀតថាលោក យន្ត មីន អភិបាលខេត្តព្រះសីហនុ បានធ្វើការផ្ដាំផ្ញើ និងផ្សព្វផ្សាយទៅដល់កងកម្លាំងប្រដាប់អាវុធគ្រប់ប្រភេទ គឺការអនុវត្តសាលដីកាត្រូវបញ្ចៀសឱ្យបាននូវការប៉ះទង្គិចដោយប្រើអំពើហិង្សាជាដាច់ខាត ។ លោកបានចោទទៅភាគីពលរដ្ឋថា ខណ:ក្រុមការងារចុះទៅដល់ទីតាំងប្រជាពលរដ្ឋបានប្រមូលផ្តុំគ្នា បូកជាមួយកម្លាំងប្រជាពលរដ្ឋមកពីទីតាំងផ្សេងទៀត បង្កើនកម្លាំងប្រមាណជាង២០០នាក់ មកធ្វើសកម្មភាពដុតកង់ឡាន គប់ដបសាំង ប្រើចំពាមកៅស៊ូ និងគប់ដុំថ្ម មកលើកម្លាំងសមត្ថកិច្ចបណ្ដាលឲ្យខូចខាតអេស្កាវ៉ាទ័រ និងខូចខាតរថយន្តពន្លត់អគ្គិភ័យរបស់ស្នងការដ្ឋាននគរបាលធ្វើឲ្យស្ថានភាពមានការតានតឹងឡើង។
ក្នុងពេលនោះដែរកម្លាំងរបស់រដ្ឋបាលខេត្តធ្វើការដកថយ ហើយក្រុមការងារដឹកនាំដោយលោកព្រះរាជអាជ្ញាក៏បានធ្វើការប្រជុំពិភាក្សារកដំណោះស្រាយចូលឲ្យដល់ទីតាំងឲ្យខាងតែបាន ។ ព្រមជាមួយគ្នានោះប្រជាពលរដ្ឋនៅតែព្យាយាមគប់ដុំថ្ម ដបសាំង មកលើកម្លាំងសមត្ថកិច្ចបណ្ដាលឲ្យកើតឡើងនូវអំពើហិង្សា ដែលកងកម្លាំងរបស់យើងធ្វើការបាញ់ឡើងទៅលើប្រមាណជាង២០គ្រាប់ ប្រហែលជាគ្រាប់ធ្លាក់មកវិញ ក៏បណ្តាលឱ្យត្រូវប្រជាពលរដ្ឋម្នាក់រងរបួស ក៏ប៉ុន្តែមិនបណ្ដាលឱ្យបាត់បង់អាយុជីវិតនោះទេ ក៏បានបញ្ជូនទៅព្យាបាលនៅរាជធានីភ្នំពេញ (ពេទ្យព្រះកុសមៈ) ។ លោកបានបន្តថា ដោយមានការយកចិត្តទុកដាក់ពីលោក យន្ត មីន អភិបាលខេត្ត ក៏ដូចជាអ្នកតំណាងរាស្ត្របានអញ្ជើញទៅសួរសុខទុក្ខ និងនាំយកនូវថវិកាជួយឧបត្ថម្ភក្នុងការព្យាបាលជនរងគ្រោះដល់មន្ទីរពេទ្យផងដែរ ។
ប្រភពខាងលើបានបន្តទៀតថា ទោះបីរដ្ឋបាលខេត្តខិតខំបញ្ចៀសនូវអំពើហិង្សា ក៏មានពាក្យចាមអារ៉ាមថា អ្នករងរបួសត្រូវបាត់បង់ជីវិត តាមការពិត គឺជាការបំពុលបំប៉ោងសង្គមតែប៉ុណ្ណោះ និងមានពាក្យអាចាមអារាមមួយ ទៀតនិយាយថា ការអនុវត្តសាលដីកាតុលាការកំពូលនេះ គឺដើម្បីប្រគល់ដីឲ្យទៅម្ចាស់ដី លោកឧកញា៉ ស៊ី គង់ទ្រីវ និងអ្នកស្រី ហុង សួនក៏ប៉ុន្តែតាមការពិតជាការភាន់ច្រឡំហើយត្រូវបានលោកប្រាប់ថាម្ចាស់ដីដែលឈ្នះក្តី គឺឈ្មោះ ឆាយ ណារិន និង គង់ វណ្ណា ដែលតំណាងឲ្យប្រជាពលរដ្ឋចំនួន៩គ្រួសារ ។
លោក ផៃ ប៊ុនវណ្ណ: បានបញ្ជាក់ថា កាលពីថ្ងៃទី១៧ មករា ក្រុមការងារក៏បានចុះទៅវាស់វែងកំណត់ទីតាំងដីរបស់ឧកញ៉ា ស៊ី គង់ទ្រីវ តាមលិខិតរបស់ក្រសួងដែនដី ក្នុងឱកាសនោះប្រជាពលរដ្ឋ ក៏បានធ្វើការដុតកង់ឡាន ក៏ប៉ុន្តែនៅពេលដែលក្រុមការងារ ចូលទៅដល់ ប្រជាពលរដ្ឋបានសុំអង្វរឲ្យរដ្ឋបាលខេត្តជួយផ្តល់ដីដល់ពួកគាត់ ដើម្បីសង់លំនៅឋានរស់នៅ។
ក្រុមការងារក៏បានធ្វើការណែនាំពន្យល់ពួកគាត់ឲ្យចូលរួមសហការជាមួយនឹងរដ្ឋបាលខេត្ត ដើម្បីផ្ទៀងផ្ទាត់ឯកសារ ដើម្បីស្នើសុំគោលការណ៍ដោះស្រាយដីធ្លីជូន បងប្អូនប្រជាពលរដ្ឋរស់នៅស្របច្បាប់ ហើយសំណើនេះ ត្រូវបានឯកភាពដោយមានការយោគយល់ផងដែរ មិនគួរណាឲ្យមានបញ្ហាបែបនេះកើតឡើងបានឡើយ ។
ជុំវិញការអនុវត្តសាលដីកានោះអ្វីដែលធ្វើឱ្យសាធារណជនថ្កោលទោសនោះគឺ វីដេអូឃ្លីបដែលថតបានក្នុងហេតុការណ៍គឺអាវុធហត្ថម្នាក់បានប្រើហិង្សាឆក់ពលរដ្ឋម្នាក់ដែលត្រូវបានចាប់វាយខ្នោះ ហើយបន្ទាប់មកក៏មានទាហានម្នាក់មកវាយមួយស្វាយកាំភ្លើងបន្ថែមទៀតធ្វើមើលតែគ្នាមកដណ្តើមដីកេររបស់ខ្លួនដូច្នោះដែរ ។
រហូតមកដល់ពេលនេះមិនទាន់មានការដោះស្រាយបែបណានោះនៅឡើយដែរ ដោយអ្នកទទួលខុសត្រូវក្នុងការអនុវត្តសាលដីកាយកដីជាង៧០ហិកតាពីក្រុមពលរដ្ឋទាំងនោះក៏គ្មានការប្រកាសទទួលខុសត្រូវនៅឡើយទេ ។ នេះជាការធ្វើសន្និសីទលើកដំបូង ក្រោយរយៈពេលជិតកន្លះខែ ការអនុវត្តសាលដីកាដ៏ចម្រូងចម្រាសនេះ មានតែបង្ហាញពីការសោកស្តាយនៅពេលនេះ ៕
ចែករំលែកព័តមាននេះ