ខេត្តព្រៃវែង ៖ ទួលពាន់តាឡី គឺជាទួលដ៏ធំមួយមានព្រៃល្បះ និងព្រៃលិចទឹក ដុះពទ្ធ័ជុំវិញ ស្ថិតនៅកណ្តាលដែនអភិរក្សបឹងស្នេហ៍ដែលមានវិសាលភាព៨៣ហិកតា ស្ថិតក្នុងភូមិសាស្ត្រឃុំធាយ ស្រុកបាភ្នំ នៃខេត្តព្រៃវែង…
ខេត្តព្រៃវែង ៖ ទួលពាន់តាឡី គឺជាទួលដ៏ធំមួយមានព្រៃល្បះ និងព្រៃលិចទឹក ដុះពទ្ធ័ជុំវិញ ស្ថិតនៅកណ្តាលដែនអភិរក្សបឹងស្នេហ៍ដែលមានវិសាលភាព៨៣ហិកតា ស្ថិតក្នុងភូមិសាស្ត្រឃុំធាយ ស្រុកបាភ្នំ នៃខេត្តព្រៃវែង ។ បច្ចុប្បន្នទួលពាន់តាឡីនេះមានសត្វស្លាបកម្ររាប់ពាន់ក្បាលកំពុងរស់នៅលើទួលនោះ និងស្ថិតនៅក្រោមការការពារ អភិរក្សដោយសហគមន៍អភិរក្សបឹងស្នេហ៍ដែលឧបត្ថម្ភគាំទ្រដោយអង្គការ women ។
លោកប៉ាន់ យន ប្រធានសហគមន៍អភិរក្សបឹងស្នេហ៍ឲ្យដឹងថា បច្ចុប្បន្ននៅលើទួលពាន់តាឡីមានសត្វស្លាបរាប់ពាន់ក្បាលកំពុងរស់នៅ ក្នុងនោះមានដូចជា សត្វកុក សំបកត្រពាំង ខ្វែក ក្អែកទឹក ត្មោញ ននៀលខ្យង ទុង និងក្រសារជាដើម ។
ក្រុមអ្នកឃ្លាំមើលការពារអភិរក្សស្វតស្លាប នៅក្នុងដែនអភិរក្សបឹងស្នេហ៍មានចំនួនតែបីនាក់ប៉ុណ្ណោះ ធ្វើការដោយស្ម័គ្រចិត្តគ្មានប្រាក់ខែទេ ហើយបច្ចុប្បន្នកំពុងតែខ្វះខាតឧបករណ៍ជាមធ្យោបាយបម្រើការងារថែមទៀតផង ជាហេតុធ្វើឲ្យការគ្រប់គ្រង និងការពារមិនសូវមានប្រសិទ្ធភាពល្អប៉ុន្មាននោះទេ ដូច្នេះហើយទើបលោកអំពាវនាវដល់សប្បុរសជនជិតឆ្ងាយ មន្ត្រីពាក់ព័ន្ធនានា ឲ្យជួយឧបត្ថមដល់សហគមន៍អភិរក្សបឹងស្នេហ៍នេះផង ។
លោកសឹម ទេពវង្សា ប្រធានមន្ទីរទេសចរណ៍ខេត្តព្រៃវែងឲ្យដឹងថា តំបន់អភិរក្សបឹងស្នេហ៍ គឺជាដីសាធារណៈរបស់រដ្ឋ ពីមុនមកមិនសូវមានសត្វរស់នៅទេ ទើបតែប៉ុន្មានឆ្នាំចុងក្រោយនេះ បន្ទាប់ពីអង្គការ women បានបង្កើតឱ្យមានសហគមន៍អភិរក្សបឹងស្នេហ៍ និងមានការការពារ និងអភិរក្សយ៉ាងម៉ត់ចត់ ដោយសហគមន៍ ក្រោមការឧបត្ថម្ភរបស់អង្គការ women បានធ្វើឱ្យទីតាំងនោះក្លាយទៅជាជម្រកដ៏កក់ក្តៅរបស់ពពួកសត្វជាពិសេសសត្វស្លាបកម្រ ហើយបាននាំគ្នាមករស់នៅ និងបង្កាត់ពូជបង្កើតកូនចៅកាន់តែ ច្រើនឡើងៗ រហូតដល់រាប់ពាន់ក្បាលដូចសព្វថ្ងៃនេះ ៕
ចែករំលែកព័តមាននេះ