រាជធានីភ្នំពេញ ៖ ជនម្នាក់ជាកម្មកររត់តុនៅហាងលក់ស៊ុបគោយីហោឆាយហេង ត្រូវបានសមត្ថកិច្ចនគរបាលខណ្ឌ៧មករា ចាប់ឃាត់ខ្លួន កាលពីថ្ងៃទី១៥ មករា ហើយបញ្ជូនទៅកាន់សាលាដំបូង ដោយចោទប្រកាន់ថា ធ្វើឱ្យខូចខាតដោយចេតនាមានស្ថានទម្ងន់ទោស (បង្កអគ្គីភ័យដុតផ្ទះ) និងសំរេចឃុំខ្លួនដាក់ពន្ធនាគារជាបណ្តោះអាសន្ន រង់ចាំការវិនិច្ឆ័យទោសតាមផ្លូវច្បាប់ ។ ជនដែលត្រូវចោទឈ្មោះខ្វែក សៀប ហៅរិទ្ធ ភេទប្រុស អាយុ៣០ឆ្នាំ ស្នាក់នៅផ្ទះលេខ៧២BEo ផ្លូវលេខ១២៨ ក្រុម៦៦ ភូមិ៩ សង្កាត់វាលវង់ ខណ្ឌ៧មករា គឺហាងលក់ស៊ុបគោ យីហោឆាយហេង នោះតែម្តង ។ ការចាប់ឃុំខ្លួនជនសង្ស័យខាងលើ ត្រូវបានសមត្ថកិច្ចនគរបាលខណ្ឌ៧មករា ឱ្យដឹងថា កាលពីវេលាម៉ោងប្រមាណ១និង១០នាទីរំលងអធ្រាត្រឈានចូលថ្ងៃទី៧ មករា មានជនមិនស្គាល់មុខបានលបលួចយកសាំងមកចាក់ដុតហាងលក់ស៊ុបគោឆាយហេង ប៉ុន្តែការប៉ុនប៉ងនោះមិនបានសំរេចទេ ដោយសារតែក្រុមកម្មករ និងម្ចាស់ហាងឃើញទាន់នាំគ្នាពន្លត់ទាន់ពេល ។ ក្រោយពីហេតុការណ៍កើតឡើងរយៈពេល១សប្តាហ៍ ម្ចាស់ហាងមានការសង្ស័យលើកម្មកររត់តុម្នាក់គឺឈ្មោះខ្វែក សៀប ហៅរិទ្ធ នេះ ព្រោះរូបគេមានស្នាមភ្លើងឆេះរោលរលាកជើងខាងឆ្វេង ។
សមត្ថកិច្ចនគរបាលបានឱ្យដឹងទៀតថា ដោយមានការសង្ស័យបែបនេះ តំណាងថៅកែហាងស៊ុបឆាយហេង គឺលោកឃី សុខឃាង បានដាក់ពាក្យបណ្តឹងទៅប៉ុស្តិ៍នគរបាលរដ្ឋបាលបឹងព្រលឹតដើម្បីឱ្យឃាត់ខ្លួនឈ្មោះរិទ្ធ ទៅសាកសួរ ។ ក្រោយពីនគរបាលប៉ុស្តិ៍រដ្ឋបាលហៅសាកសួរជនសង្ស័យបានឆ្លើយសារភាពថា រូប គេពិតជាបានយកសាំងទៅចាក់ប៉ុនប៉ងដុតផ្ទះថៅកែរបស់ខ្លួនមែន ដែលគំរោងការដុតនោះគឺឈ្មោះចាន់ ធូ ភេទស្រី អាយុ៤៥ឆ្នាំ មុខរបរលក់ស៊ុបគោឆ្នាំងដី ស្នាក់នៅផ្ទះលេខ៧១BEo ខាងក្រោយស៊ុបគោឆ្នាំងដីឆាយហេងនោះជាអ្នកជួលឱ្យដុត ក្នុងតំលៃទឹកប្រាក់ចំនួន១០ម៉ឺនរៀល ។ មុនពេលដុតផ្ទះថៅកែហាងខ្លួនឯង១ថ្ងៃ ខ្លួនត្រូវបានឈ្មោះចាន់ ធូ បក់ដៃហៅឱ្យចូលក្នុងផ្ទះរបស់គេ ហើយប្រាប់ខ្លួនថា ឱ្យដុតផ្ទះថៅកែស៊ុបឆ្នាំងដីឆាយហេងចោលទៅ គេនឹងឱ្យប្រាក់ចំនួន១០ម៉ឺនរៀល ។ បន្ទាប់ពីបាននិយាយគ្នាហើយ ខ្លួនក៏យល់ព្រមនិងទទួលយកប្រាក់១០ម៉ឺនរៀលពីឈ្មោះញ៉ា ដើម្បីចាត់ការដុតផ្ទះ (ហាង) របស់ថៅកែខ្លួនឯងចោល ។
តាមប្រភពពីប៉ូលិសគឺជនឈ្មោះខ្វែក សៀប ហៅរិទ្ធ បានសារភាពទៀតថា ក្រោយពីបានប្រាក់ហើយនៅពេលព្រលប់ខ្លួនបានទៅទិញសាំង១ដបនៅក្បែររបងវិទ្យាល័យយុគន្ធរ យកមកត្រៀមទុក ដើម្បីដុតហាងនៅពេលគេដេកលក់អស់។ លុះនៅវេលាម៉ោង១រំលងអធ្រាត្រឈានចូលថ្ងៃទី៧ មករា នៅពេលបុគ្គលិកនិងកម្មករដេកលក់អស់ ខ្លួនបានយកសាំងដែលលាក់ទុកទៅចាក់ដុតផ្ទះថៅកែ ស៊ុបឆ្នាំងដីរបស់ខ្លួននោះមែន ។ ខណៈពេលអណ្តាតភ្លើងបាននិងកំពុងឆាបឆេះ ខ្លួនក៏រត់ឡើងទៅលើផ្ទះសំងំដេក ដើម្បីកុំឱ្យគេដឹងថា ខ្លួនជាអ្នកធ្វើសកម្មភាពដុតផ្ទះនេះ ។ យោងទៅលើចំលើយសារភាពគ្រប់គ្រាន់ និងភស្តុតាងគឺជើងរបស់គេនៅជាប់ស្លាកស្នាមដោយភ្លើងឆេះរលាកមិនទាន់សះស្បើយនៅឡើយនោះ សមត្ថកិច្ចក៏បានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីធ្វើការចោទប្រកាន់ជាផ្លូវការនិងឃុំខ្លួនក្នុងពន្ធនាគារជាបណ្តោះអាសន្នក្រោមបទធ្វើឱ្យខូចខាតដោយចេតនាមានស្ថានទម្ងន់ទោស (បង្កអគ្គីភ័យដុតផ្ទះ) ។ បន្ទាប់ពីសាលាដំបូងបានសំរេចឃុំខ្លួនជនសង្ស័យស៊ីឈ្នួលដុតផ្ទះថៅកែនោះហើយ សមត្ថកិច្ចបានស្នើដីកាពីតុលាការស្វែងរកចាប់ខ្លួនស្ត្រីឈ្មោះចាន់ ធូ ទៀត ដែលជាអ្នកផ្តើមគំនិតជួលមនុស្សប៉ុនប៉ងដុតហាងលក់ស៊ុបឆ្នាំងដីយីហោឆាយហេងនេះ ដើម្បីយកមកផ្តន្ទាទោសតាមផ្លូវច្បាប់ ៕
ចែករំលែកព័តមាននេះ