រាជធានីភ្នំពេញ ៖ ស្ត្រីម្នាក់បានដាច់ខ្យល់ស្លាប់ នៅលើកង់បី បន្ទាប់ពីធ្វើដំណើរចេញពីមន្ទីរពេទ្យក្នុងគោលបំណងទៅផ្ទះវិញ ហើយត្រូវបានអ្នកបើកម៉ូតូកង់បី ដឹកចូលទៅសាលាសង្កាត់ភ្នំពេញថ្មី ដើម្បីឲ្យជួយអន្តរាគមន៍ ហើយបង្កឲ្យមានការភ្ញាក់ផ្អើលឡើង ។…
រាជធានីភ្នំពេញ ៖ ស្ត្រីម្នាក់បានដាច់ខ្យល់ស្លាប់ នៅលើកង់បី បន្ទាប់ពីធ្វើដំណើរចេញពីមន្ទីរពេទ្យក្នុងគោលបំណងទៅផ្ទះវិញ ហើយត្រូវបានអ្នកបើកម៉ូតូកង់បី ដឹកចូលទៅសាលាសង្កាត់ភ្នំពេញថ្មី ដើម្បីឲ្យជួយអន្តរាគមន៍ ហើយបង្កឲ្យមានការភ្ញាក់ផ្អើលឡើង ។
ហេតុការណ៍នេះបង្កឲ្យមានការភ្ញាក់ផ្អើល កាលពីវេលាម៉ោង៤និង៣០នាទីរសៀលថ្ងៃទី២៣ ខែមិថុនា ឆ្នាំ២០២៥ នៅសាលាសង្កាត់ភ្នំពេញថ្មី ដែលស្ថិតនៅតាមបណ្ដោយផ្លូវបេតុង ក្នុងភូមិទំនប់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ស្ត្រីរូបនោះភ្លាមៗ ពុំត្រូវបានគេស្គាល់អត្តសញ្ញាណឡើយ ដែលបានចេញពីមន្ទីរពេទ្យហៅម៉ូតូកង់បីមួយគ្រឿង ពាក់ស្លាកលេខភ្នំពេញ១ KZ.6543 ដើម្បីជិះទៅផ្ទះវិញ ។
បើតាមអ្នករត់កង់បី បានប្រាប់ឲ្យដឹងថា នៅមុនពេលកើតហេតុ គាត់បានដឹកស្ត្រីរូបនោះ ចេញពីមន្ទីរពេទ្យមិត្តភាពកម្ពុជា-ចិន ព្រះកុសមៈ គោលបំណងទៅផ្ទះ នៅក្នុងខណ្ឌសែនសុខ តែគេពុំដឹងថា នៅសង្កាត់ណានោះឡើយ។ ខណៈពេលធ្វើដំណើរតាមផ្លូវ មកដល់ជិតសាលាសង្កាត់ភ្នំពេញថ្មី ក៏បានដាច់ខ្យល់ស្លាប់ រួចគាត់ក៏បានដឹកចូលសាលាសង្កាត់តែម្ដង ដើម្បីឲ្យសមត្ថកិច្ចជួយដឹងឮ និងអន្តរាគមន៍ ។
បន្ទាប់ពីដឹកស.ពស្ត្រីរូបនោះ ចូលសាលាសង្កាត់ហើយ អ្នករត់កង់បីរូបនោះ ត្រូវបានសមត្ថកិច្ចហៅសាកសួរ និងធ្វើការស្រាវជ្រាវរកអត្តសញ្ញាណស.ព ព្រមទាំងទាក់ទងទៅនគរបាលជំនាញ ដើម្បីចុះត្រួតពិនិត្យរកមូលហេតុ នៃការស្លា.ប់ស្ត្រីរូបនោះ ៕
ចែករំលែកព័តមាននេះ