ឃាត់ខ្លួន២នាក់ ករណីលួចម៉ូតូពីកៀនស្វាយ យកមកធ្វើសោនៅភ្នំពេញ ជិះទៅលក់ដល់ខេត្តបាត់ដំបង
ខេត្តកណ្តាល ៖ អនុវត្តតាមបទបញ្ជារបស់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល ក្រោមការដឹកនាំលោកវរសេនីយ៍ឯក ព្រុំ សំណាង អធិការ…
ខេត្តកណ្តាល ៖ អនុវត្តតាមបទបញ្ជារបស់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល ក្រោមការដឹកនាំលោកវរសេនីយ៍ឯក ព្រុំ សំណាង អធិការ បានចាត់អោយលោកវរសេនីយ៍ទោ ប៉ា ច័ន្ទ វិសាល អធិការរងព្រហ្មទណ្ឌ ដឹកនាំកម្លាំងចុះបង្ក្រាបជនសង្ស័យចំនួន០៣នាក់(ម្នាក់គេចខ្លួន) ដែលធ្វើសកម្មភាពលួចម៉ូតូ ពីកៀនស្វាយ យកមកធ្វើសោនៅភ្នំពេញ រួចជិះទៅលក់នៅខេត្តបាត់ដំបង ព្រោះខឹងនឹងបងប្រុសរបស់ជនរងគ្រោះ បបួលកាប់គ្នា ។
ការបង្ក្រាបនេះ បានធ្វើឡើងកាលពីវេលាម៉ោង១២និង២០នាទីយប់ ឈានចូលថ្ងៃទី២០ ខែមិថុនា ឆ្នាំ២០២៥ ចំណុចផ្ទះសំណាក់រដ្ឋា១៦៨ ក្នុងភូមិភូមិធំ ឃុំភូមិធំ ស្រុកកៀនស្វាយ ខេត្តកណ្តាល ។
សមត្ថកិច្ច បានឲ្យដឹងថា ជនរងគ្រោះមានឈ្មោះ លីន ភក្ដី ភេទប្រុស អាយុ២០ឆ្នាំ មុខរបរកម្មកររោងចក្រ មានទីលំនៅភូមិកោះបៀ ឃុំគគីរ ស្រុកកៀនស្វាយ ខេត្តកណ្ដាល ។
ជនសង្ស័យទាំង០៣នាក់ រួមមាន ៖
១. ឈ្មោះ នីម សុខថេប ភេទប្រុស អាយុ២០ឆ្នាំ មុខរបរមិនពិត មានទីលំនៅភូមិអូកណ្តោល ឃុំសន្តិភាព ស្រុកសំពៅលូន ខេត្តបាត់ដំបង (ឃាត់ខ្លួន) អ្នកធ្វើសកម្មភាព ។ តេស្តទឹកនោមរកសារធាតុញៀន(+)វិជ្ជមាន ។
២. ឈ្មោះ សែម វុទ្ធី ភេទប្រុស អាយុ២១ឆ្នាំ មុខរបរមិនពិត មានទីលំនៅភូមិភ្នំប្រាំពីរ ឃុំបួរ ស្រុកភ្នំព្រឹក ខេត្តបាត់ដំបង (ឃាត់ខ្លួន) អ្នកចូលរួមធ្វើសកម្មភាព ។ តេស្តទឹកនោមរកសារធាតុញៀន(+)វិជ្ជមាន ។
៣. ឈ្មោះ តូច ភេទប្រុស អាយុ២១ឆ្នាំ ជនជាតិខ្មែរ មុខរបរមិនពិត មានស្រុកកំណើត ខេត្តបាត់ដំបង (គេចខ្លួន) អ្នកចូលរួមធ្វើសកម្មភាព ។
ក្នុងនោះ សម្ភារបាត់បង់ ម៉ូតូ០១គ្រឿង ម៉ាក HONDA C125 ពណ៌ខ្មៅ ផលិតឆ្នាំ២០២៣ ពាក់ផ្លាកលេខ ភ្នំពេញ 1JV-0440 (ជារបស់ជនរងគ្រោះ) និងដកហូតបាន ម៉ូតូ០១គ្រឿង ម៉ាក SUZUKI Nex ពណ៌ខៀវស ផលិតឆ្នាំ២០២៥ ពាក់ផ្លាកលេខ ភ្នំពេញ 1LO-9550 (ជារបស់ជនសង្ស័យ) ។
សមត្ថកិច្ច បានឲ្យដឹងទៀតថា មុនពេលកើតហេតុ ជនរងគ្រោះបានជិះម៉ូតូ០១គ្រឿងដូចខាងលើ ចេញពីផ្ទះនៅភូមិកោះបៀ ឃុំគគីរ ស្រុកកៀនស្វាយ ខេត្តកណ្តាល មកដេកនៅបន្ទប់ជួល(យីហោ រដ្ឋា១៦៨) ជាមួយសង្សារ ស្ថិតនៅភូមិភូមិធំ ឃុំភូមិធំ ស្រុកកៀនស្វាយ ខេត្តកណ្តាល ពេលមកដល់បន្ទប់ជួល ជនរងគ្រោះ បានចតម៉ូតូនៅក្បែរជណ្តើរ ហើយដើរឡើងទៅដេកក្នុងបន្ទប់ជួលខាងលើ លុះដល់វេលាម៉ោង០២:០០នាទី ថ្ងៃទី០៦ ខែមិថុនា ឆ្នាំ២០២៥ ទើបសង្សារជនរងគ្រោះឈ្មោះស្រីណេត ចេញពីធ្វើការនៅហាង KTV ដើរមកបន្ទប់ជួល ក៏មិនឃើញម៉ូតូជនរងគ្រោះ ក៏ឡើងទៅដល់បន្ទប់ជួល ហើយសួរជនរងគ្រោះថា ជិះម៉ូតូមក ឬក៏ឲ្យគេជូនមក ជនរងគ្រោះឆ្លើយថា ជិះម៉ូតូមក ទុកនៅខាងក្រោម ហើយនាំគ្នាដើរមកមើលម៉ូតូ តែមិនឃើញ ក៏បានផ្អើលឆោឡោឡើង ហើយឲ្យម្ចាស់ផ្ទះជួលឆែកកាមេរ៉ា ទើបឃើញសកម្មភាពជនសង្ស័យទាំងបីនាក់ខាងលើ បានលួចយកម៉ូតូរបស់ជនរងគ្រោះជិះឡើងទៅភ្នំពេញ ។
លុះដល់ម៉ោង០៩ និង០០នាទីថ្ងៃខែឆ្នាំដដែល ជនរងគ្រោះ បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋភូមិធំ ពេលទទួលពាក្យបណ្តឹងភ្លាម កម្លាំងប៉ុស្តិ៍ភូមិធំ សហការជាមួយកម្លាំងជំនាញព្រហ្មទណ្ឌស្រុកកៀនស្វាយ ចុះស្រាវជ្រាវស្វែងរកមុខសញ្ញាជនសង្ស័យ រហូតមកដល់ថ្ងៃទី២០ ខែមិថុនា ឆ្នាំ២០២៥ វេលាម៉ោង០៦ និង ០០នាទី កម្លាំងផ្នែកជំនាញ ព្រហ្មទណ្ឌស្រុក បានទទួលពត៌មានពីម្ចាស់ដើមបណ្តឹងថា ជនសង្ស័យដែលលួចម៉ូតូរបស់ខ្លួនកំពង់ស្នាក់នៅក្នុងឃុំក្អមសំណ ស្រុកលើកដែក ពេលបានទទួលពត៌មានភ្លាម កម្លាំងផ្នែកជំនាញព្រហ្មទណ្ឌស្រុកកៀនស្វាយ សហការជាមួយកម្លាំងស្រុកលើកដែក នឹងកម្លាំងប៉ុស្តិ៍ក្អមសំណ ឃាត់ខ្លួនជនសង្ស័យចំនួន០២នាក់ យកមកអធិការដ្ឋាននគរបាលស្រុកកៀនស្វាយ ដើម្បីសាកសួរ ។
នៅចំពោះមុខ នគរបាលជនសង្ស័យទាំង០២នាក់ បានសារភាពថា ៖ ពួកខ្លួនបានលួចម៉ូតូរបស់ជនរងគ្រោះរួច រុញទៅដល់មុខវត្តបុទម ក្រុងភ្នំពេញ ឲ្យជាងធ្វើសោ រួចរាល់ហើយ ពួកខ្លួនបាននាំគ្នាជិះម៉ូតូទៅខេត្តបាត់ដំបង រួចលក់ម៉ូតូឲ្យទៅអ្នកមិនស្គាល់ឈ្មោះ ក្នុងតម្លៃ៤៥០$ លុះមកដល់ថ្ងៃទី១៩ មិថុនា ២០២៥ ម៉ោង០៨និង៣០នាទី ពួកខ្លួនបានជិះម៉ូតូម៉ាក SUZUKI Nex ពណ៌ខៀវស សំដៅមកផ្ទះសង្សាររបស់ខ្លួននៅឃុំក្អមសំណ ស្រុកលើកដែក ទើបនគរបាលឃាត់ខ្លួន ។ មូលហេតុខឹងនឹងបងប្រុសរបស់ជនរងគ្រោះ បបួលកាប់គ្នា ។
បច្ចុប្បន្ន ជនសង្ស័យ រួមជាមួយវត្ថុតាងត្រូវបានកម្លាំងជំនាញ នៃអធិការដ្ឋាននគរបាលស្រុកកៀនស្វាយ កំពុងកសាងសំណុំរឿងចាត់ការតាមច្បាប់។ ចំណែកជនសង្ស័យម្នាក់ ដែលរត់គេចខ្លួន កម្លាំងជំនាញកំពុងបន្តស្រាវជ្រាវតាមចាប់ខ្លួនយកអនុវត្តតាមនីតិវិធីច្បាប់ ៕
ចែករំលែកព័តមាននេះ