ខេត្តកំពង់ស្ពឺ ៖ ទំនប់ ឬអាងស្តុកទឹកអូរក្រាំងអំបិលមិនយូរឡើយនឹងបាត់រូបរាងត្រូវមនុស្សលោភៈលេបអស់មិនខានព្រោះពេលនេះអ្នកដែលមានប័ណ្ណគ្របលើទំនប់នេះកំពុងស្វែងរកការអន្តរាគមន៍ ដើម្បីចាក់ដីលុបបឹងខណៈអ្នកទាំងនោះសុំច្បាប់ចាក់ដីលុបដែរតែខាងស្រុកមិនអនុញាតិនេះ ។ បើតាមការបង្ហើបប្រាប់ពីមន្ត្រីសាលាស្រុកសំរោងទងមួយរូប។
ទំនប់អាងស្តុកទឹកអូរក្រាំងអំបិលដែលជាកន្លែងបញ្ចៀសការជន់លិចទឹកដោយប្រការផ្សេងៗនោះពេលនេះបានក្លាយជាដីកម្មសិទ្ធិបុគ្គលឯកជនអស់ទៅហើយ ខណៈដីនៅជាប់ផ្លូវជាតិកំពុងឡើងថ្លៃ និងមានសន្ទុះយ៉ាងខ្លាំងផងដែរនោះ ក៏ស្រាប់តែបុគ្គលដែលមានលុយ និងអំណាចបានសុំច្បាប់អនុញាតិ ដើម្បីចាក់ដីលុបបឹង ឬអាងស្តុកទឹកទំនប់អូក្រាំងអំបិលនេះដើម្បីលក់បម្រើអោយប្រយោជន៍ខ្លួន និងបក្ខពួក ។
បើតាមមន្ត្រីសាលាស្រុកមួយរូបបង្ហើបថា ដោយសំអាងថា ខ្លួនមានប័ណ្ណកម្មសិទ្ធិគ្របសង្កត់លើទំនប់អូរក្រាំងអំបិលនេះម្ចាស់ដីបឹងទាំងនេះបានរិះរកគ្រប់មធ្យោបាយក្នុងការបំពេញមហិច្ឆតារបស់ខ្លួន ដើម្បីបានចាក់ដីលុបបឹងមួយនេះ ។ ដោយយល់ថា ការចាក់ដីលុបបឹងអូរក្រាំងអំបិលនេះ ធ្វើអោយប៉ះពាល់ដល់ផលប្រយោជន៍សាធារណៈលោកអភិបាលស្រុកមិនបានឯកភាពតាមការស្នើសុំនោះទេ បើទោះជាម្ចាស់ទាំងនោះសំអាងថា ខ្លួនមានប័ណ្ណកម្មសិទ្ធិក៏ដោយ ។
ក្រោយពេលដែលបំណងរបស់ខ្លួនបរាជ័យក្រុមមនុស្សដែលគិតតែប្រយោជន៍ខ្លួនទាំងនោះបានហៅលោកអភិបាលស្រុកសំរោងទងថា ជាចៅហ្វាយស្រុកក្បាលរឹងទៀតផង ។ មិនដឹងថា តើតទៅក្រុមមនុស្សទាំងនោះប្រើវិធីណាទៀតនោះទេ ដើម្បីបំពេញបំណងខ្លួន និងបក្ខពួកខ្លួនក្នុងការចាក់ដីលុបបឹង ឬទំនប់អូរក្រាំងអំបិលនេះ ព្រោះថា បើលោកអភិបាលស្រុកសព្វថ្ងៃគាត់មិនអនុញាតិអោយចាក់ដីលុបជាដាច់ខាត ។
ប្រភពបន្តថា ប័ណ្ណកម្មសិទ្ធិទាំងអស់ដែលគ្របដណ្តប់លើដីបឹង ឬទំនប់អូរក្រាំងអំបិលនេះ គឺគេធ្វើឡើងតាំងពីអភិបាលស្រុកចាស់មកម្លេះ ហើយការធ្វើប័ណ្ណទៀតសោត គេធ្វើយ៉ាងអាថកំបាំងបំផុត តាមរយៈបក្ខពួករបស់គេដែលឃុបឃិតគ្នាតាមជំនាញ និងជាប្រព័ន្ធទៀតផង ។
មានការលើកឡើងថា តើអ្នកចុះហត្ថលេខាចេញប័ណ្ណកម្មសិទ្ធិគាត់មិនបានចាត់មន្ត្រីអោយចុះពិនិត្យទេ ឬយ៉ាងណា បានជាចេញប័ណ្ណមកគ្របដណ្តប់លើបឹង ឬទំនប់អូរក្រាំងអំបិលដែលជាអាងស្តុកទឹកបែបនេះទៅកើត ? ព័ត៌មានពិស្តារមាននៅកាសែតកោះសន្តិភាព ។
ចែករំលែកព័តមាននេះ