រាជធានីភ្នំពេញ ៖ គម្រោងសាងសង់ផ្លូវល្បឿនលឿនភ្នំពេញ-ខេត្តព្រះសីហនុដែលមានប្រវែងសរុបចំនួន១៩០,៦៣គីឡូម៉ែត្រ ត្រូវបានចុះហត្ថលេខាជាមួយក្រុមហ៊ុនប្រឹក្សាបច្ចេកទេស ដើម្បីធានាបានគុណភាពប្រើប្រាស់យូរអង្វែង ស្របតាមបទដ្ឋានស្តង់ដាបច្ចេកទេសអន្តរជាតិ ខណៈការបើកការដ្ឋាន នឹងចាប់ផ្ដើមឆាប់ៗនេះ ។
លោក សួង ហេង រដ្ឋលេខាធិការក្រសួងសាធារណការ និងដឹកជញ្ជូន កាលពីថ្ងៃទី២៩ ខែមករា កន្លងមក បានអញ្ជើញជាអធិបតីក្នុងពិធីចុះហត្ថលេខាលើកិច្ចសន្យាទីប្រឹក្សាបច្ចេក ទេសសម្រាប់គម្រោងសាងសង់ផ្លូវល្បឿនលឿនភ្នំពេញ-ខេត្តព្រះសីហនុ រវាងក្រសួងសាធារណការ និងដឹកជញ្ជូន និងក្រុមហ៊ុនMINCONSULT SDN BHD ដោយមានការចូលរួមថ្នាក់ដឹកនាំក្រសួង និងប្រធានក្រុមហ៊ុនMINCONSULT SDN BHD ។
ពិធីចុះហត្ថលេខានេះ ធ្វើឡើងដើម្បីជំរុញឱ្យក្រុមហ៊ុនប្រឹក្សាបច្ចេកទេសគ្រប់គ្រង និងពិនិត្យតាមដាន ដោយយកចិត្តទុកដាក់ខ្ពស់លើការងារសាងសង់ សំដៅធានាបាននូវគុណភាពស្របតាមបទដ្ឋានស្តង់ដាបច្ចេកទេសអន្តរជាតិ ពោលគឺផ្លូវមានភាពរឹងមាំ និងអាចប្រើប្រាស់ជាប់បានយូរផងដែរ ។ ផ្លូវល្បឿនលឿននេះគ្រោងនឹងបើកការដ្ឋាននាពេលឆាប់ៗខាងមុខនេះ ខណៈគ្រឿងចក្រថ្មីៗសន្លាងដែលមានតម្លៃទឹកប្រាក់ប្រមាណ១០០លានដុល្លារ និងអ្នកជំនាញបានមកដល់កម្ពុជាហើយ ។
គ្រោងផ្លូវនេះ ត្រូវចំណាយថវិកាប្រមាណជិត២ពាន់លានដុល្លារ ដោយសាងសង់ជា៤គន្លង (២គន្លងទៅ ២គន្លងមក ខណ្ឌដោយសួនច្បារកណ្ដាលទ្រូងផ្លូវ) មានប្រវែងសរុបចំនួន ១៩០,៦៣ គីឡូម៉ែត្រ ទទឹង២៤ម៉ែត្រ ក្រាលកៅស៊ូACជាផ្លូវថ្មីទាំងស្រុង និងមានរបងបាំងសងខាងផ្លូវដើម្បីការពារសុវត្ថិភាព ដោយប្រើពេលសាងសង់រយៈពេលប្រមាណ៤ឆ្នាំ ។
បើតាមការបញ្ជាក់របស់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអះអាងប្រាប់ក្រុមអ្នកសារព័ត៌មានកាលពីដើមខែនេះថា នៅខែកុម្ភៈ ឬដើមខែមីនា ខាងមុខនេះ អាចបើកការដ្ឋានសាងសង់ផ្លូវល្បឿនលឿនពីភ្នំពេញទៅក្រុងព្រះសីហនុបានហើយ ខណៈគ្រឿងចក្រនិងអ្នកបច្ចេកទេស វិស្វកម្ម ជាង២០០នាក់បានមកដល់ហើយ ដើម្បីបើការដ្ឋាន ។
ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិត ម៉ី កល្យាណ បានថ្លែងកន្លងមកថា បញ្ហាហេដ្ឋារចនាសម្ព័ន្ធជាគឺជារឿងប្រឈមមួយក្នុងការអភិវឌ្ឍសេដ្ឋកិច្ចកម្ពុជា ប៉ុន្តែរាជរដ្ឋាភិបាលក្នុងប៉ុន្មានឆ្នាំចុងក្រោយនេះបានរៀបចំគោលនយោបាយ និងវិនិយោគលើហេដ្ឋារចនាសម្ព័ន្ធយ៉ាងច្រើន ដើម្បីជំរុញកំណើនសេដ្ឋកិច្ចជាតិ ។ លោកថ្លែងថា ៖« វាជារឿងចាំបាច់ដែលត្រូវកសាងហេដ្ឋារចនាសម្ព័ន្ធ ដើម្បីរុញសេដ្ឋកិច្ចកម្ពុជាទៅកាន់ដំណាក់កាលថ្មីមួយទៀត ព្រោះបើចង់ឲ្យសេដ្ឋកិច្ចកម្ពុជាកើនឡើង និងឈានទៅកាន់លំដាប់ថ្មី កម្ពុជាត្រូវការវិនិយោគលើហេដ្ឋារចនាសម្ព័ន្ធបន្ថែមទៀត »៕
ចែករំលែកព័តមាននេះ