ខេត្តកំពង់ចាម ៖ ក្នុងឆ្នាំ២០១៨កន្លងទៅ ភ្ញៀវទេសចរជាតិទៅលេងកម្សាន្ដនៅតាមរមណីយដ្ឋាននានាក្នុងខេត្តកំពង់់កើនឡើងប្រមាណ១៧% ខណៈភ្ញៀវទេសចរអន្តរជាតិធ្លាក់ចុះបន្ដិច បើធៀបនឹងឆ្នាំ២០១៧ ។ ទោះបីជាយ៉ាងណា ដើម្បីស្រូបចំណូលពីវិស័យនេះ សម្រាប់ទិសដៅក្នុងឆ្នាំ២០១៩…
ខេត្តកំពង់ចាម ៖ ក្នុងឆ្នាំ២០១៨កន្លងទៅ ភ្ញៀវទេសចរជាតិទៅលេងកម្សាន្ដនៅតាមរមណីយដ្ឋាននានាក្នុងខេត្តកំពង់់កើនឡើងប្រមាណ១៧% ខណៈភ្ញៀវទេសចរអន្តរជាតិធ្លាក់ចុះបន្ដិច បើធៀបនឹងឆ្នាំ២០១៧ ។ ទោះបីជាយ៉ាងណា ដើម្បីស្រូបចំណូលពីវិស័យនេះ សម្រាប់ទិសដៅក្នុងឆ្នាំ២០១៩ អាជ្ញាធរខេត្តនឹងប្រឹងប្រែងធ្វើយ៉ាងណាទាក់ទាញឲ្យភ្ញៀវមកលេងកម្សាន្ដកាន់តែច្រើនឡើងថែមទៀត ។
លោក ស៊ាន សុគុន ប្រធានមន្ទីរទេសចរណ៍ខេត្ត មានប្រសាសន៍ប្រាប់កោះសន្ដិភាពនាពេលថ្មីៗនេះថា ខេត្តមានរមណីយដ្ឋានប្រវត្តិសាស្ត្រ និងរមណីយដ្ឋានធម្មជាតិជាច្រើនកន្លែងដែលកំពុងមានសក្ដានុពលទាក់ទាញទេសចរមកលេងកម្សាន្ដ ក្នុងនោះដូចជា ប្រាសាទនគរបាជ័យ, ភ្នំប្រុសភ្នំស្រី, ភ្នំហាន់ជ័យ, ទឹកឆា, ឆ្នេរខ្សាច់កោះប៉ែន, ភ្នំជើងព្រៃ និងរមណីយដ្ឋានកែច្នៃមួយចំនួនទៀត ។
លោកបន្ដថា ៖« ដោយមានការណែនាំពីរដ្ឋមន្ត្រីក្រសួងទេសចរណ៍ ក៏ដូចជាលោក គួច ចំរើន អភិបាលខេត្ត បានជំរុញឲ្យស្ថាប័នជំនាញទេសចរណ៍ខេត្ត ត្រូវបង្កើនការយកចិត្តទុកដាក់ក្នុងការអភិវឌ្ឈនៅតាមរមណីយដ្ឋាននានា ឲ្យមានសោភ័ណភាពស្រស់ស្អាត ដើម្បីទាក់ទាញភ្ញៀវជាតិ និងអន្តរជាតិឲ្យមានកំណើនថែមទាំង ពិសេសគឺត្រូវគិតគូរពីការផ្ដល់សេវា អនាម័យ បរិស្ថានស្អាត »។
លោកប្រធានមន្ទីរបានបន្តថា ៖« នៅឆ្នាំ២០១៩នេះ ដើម្បីទាក់ទាញភ្ញៀវទេសចរមកទស្សនាឲ្យកាន់តែមានកំណើននោះ យើងបានរៀបចំចលនាប្រឡងប្រណាំងរមណីយដ្ឋានស្អាត ដោយមានរៀបចំដាក់ធុងសំរាម ដើម្បីឲ្យភ្ញៀវដែលមកលេងត្រូវចោលសំរាមក្នុងធុងសំរាម ដើម្បីឲ្យមានបរិស្ថានស្អាត នាំមកនូវសុខភាពល្អ »។
ជាមួយគ្នានេះ ក្នុងរដូវបុណ្យទាន មន្ត្រីរបស់មន្ទីរទេសចរណ៍ខេត្ត បានចុះណែនាំដល់ម្ចាស់រមណីយដ្ឋានមិនឲ្យមានការឡើងថ្លៃម្ហូបអាហារនោះទេ ។ ជាក់ស្ដែងក្នុងឆ្នាំ២០១៨កន្លងទៅ មន្ទីរបានចុះបង្រៀនដល់ស្រុកចំនួន៣ គឺ ចំការលើ កំពង់សៀម និងស្រុកបាធាយ ពីរបៀបបដិសណ្ឋារកិច្ច ជាដើម ហើយនៅឆ្នាំ២០១៩នេះ នឹងគ្រោងបង្រៀនដល់ស្រុកមួយចំនួនទៀតយ៉ាងហោចណាស់ ក៏ឲ្យបានចំនួន៥ស្រុកដើម្បីឲ្យនៅតាមផ្ទះសំណាក់ សណ្ឋាគារ យល់ដឹងកាន់តែប្រសើរ និងធ្វើយ៉ាងណាឲ្យភ្ញៀវពេញចិត្ត ។
បើតាមតួលេខពីមន្ទីរទេសចរណ៍ខេត្ត ភ្ញៀវជាតិដែលមកលេងកម្សាន្ដក្នុងខេត្តកំពង់ចាមកាលពីឆ្នាំ២០១៨ មានចំនួន៥០៤.៤៨២នាក់ បើធៀបឆ្នាំ២០១៧ មានការកើនឡើង១៧%។ ចំណែកភ្ញៀវអន្តរជាតិវិញមានចំនួន១៥.៦២៩នាក់ បើធៀបនឹងឆ្នាំ២០១៧ថយចុះ៥% ។
សម្រាប់រមណីយដ្ឋានដែលទាក់ទាញទេសចរបំផុត គឺកោះប៉ែន មានភ្ញៀវអន្តរជាតិបានជិះកង់ទៅលេងរាល់ថ្ងៃ ហើយមន្ទីរក៏នឹងរៀបចំបោះសៀវភៅមគ្គុទេសទេសចរណ៍ ដើម្បីឲ្យភ្ញៀវបានស្គាល់ពីភូមិសាស្ត្រដែលមានដាំបន្លែបង្កាធម្មជាតិ និងមានកិច្ចការសហការជាមួយនឹងមន្ទីរកសិកម្មខេត្តផងដែរធ្វើយ៉ាងណាឲ្យប្រជាកសិករ លក់កសិផលបានចំណូលក្នុងគ្រួសារ ។
អ្នកជំនាញក្នុងវិស័យទេសចរណ៍ លើកឡើងថា ដើម្បីទាក់ទាញភ្ញៀវទេសចរឲ្យកាន់តែច្រើនថែមទៀត នៅតាមរមណីយដ្ឋាននានា គួរយកចិត្តទុកដាក់លើការការពារ និងការថែរក្សាបរិស្ថាន និងអនាម័យឲ្យបានស្អាត ព្រោះសំរាមជាសត្រូវរបស់ភ្ញៀវទេសចរ ។ ជាមួយគ្នានេះ ដើម្បីបង្កើនចំណូលដល់ប្រជាពលរដ្ឋក្នុងមូលដ្ឋាន សហគមន៍ទេសចរណ៍ត្រូវជួយជំរុញបន្ថែមលើការផលិតនូវវត្ថុអនុស្សាវរីយ៍ក្នុងស្រុកឲ្យបានច្រើន ដើម្បីឆ្លើយតបទៅនឹងកំណើនភ្ញៀវទេសចរ ព្រោះថាបើក្រឡេកមើលទីផ្សារភាគច្រើនជាផលិត ផលដែលនាំចូល ៕
ចែករំលែកព័តមាននេះ