ខេត្តកំពង់ធំ ៖ គ្រោះថ្នាក់ចរាចរណ៍រវាងម៉ូតូមួយគ្រឿងបុកជាមួយគោយន្តកន្ត្រៃ បណ្តាលឱ្យអ្នកបើកបរម៉ូតូស្លាប់ភ្លាមៗនៅនឹងកន្លែងកើតហេតុ ដែលហេតុការណ៍នេះកើតឡើងកាលពីវេលាម៉ោង៧និង១០នាទីយប់ថ្ងៃទី១៩ ខែមករា ឆ្នាំ២០១៩ នៅលើកណាត់ផ្លូវជាតិលេខ៦ ចន្លោះគីឡូម៉ែត្រលេខ១០៧-១០៨ ស្ថិតក្នុងភូមិឧទុម្ពរ ឃុំស្រឡៅ ស្រុកបារាយណ៍ ខេត្តកំពង់ធំ ។
សមត្ថកិច្ចប្រាប់ថា ភាគីម៉ូតូម៉ាកស៊ុយហ្ស៊ុយគីស្មាស់វី ពណ៌ស-ខ្មៅ ពាក់ស្លាកលេខ កណ្តាល ១M-០៧៥២ បើកបរដោយឈ្មោះ សាត់ គា ភេទប្រុស អាយុ២៤ឆ្នាំ នៅភូមិសិរីសាមគ្គីខាងជើង ឃុំស្រឡៅ ស្រុកបារាយណ៍ ខេត្តកំពង់ធំ (ស្លាប់នៅកន្លែងកើតហេតុ) ។ ចំណែកភាគីខាងគោយន្តកន្ត្រៃមានដឹកត្រីប្រហុក បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ពីកន្លែងកើតហេតុ។
សមត្ថកិច្ចប្រាប់ថា មុនពេលហេតុ គេឃើញបុរសម្នាក់បើកបរម៉ូតូមួយគ្រឿងក្នុងល្បឿនយ៉ាងលឿន ក្នុងទិសដៅពីជើងទៅត្បូង លុះមកដល់កន្លែងកើតហេតុបានបុកពីក្រោយគោយន្តដែលគ្មានភ្លើងបំភ្លឺក្រោយ បណ្តាលឱ្យអ្នកបើកបរម៉ូតូស្លាប់ភ្លាមៗនៅកន្លែងកើតហេតុ ។ បន្ទាប់ពីកើតហេតុ អ្នកបើកបរគោយន្តកន្ត្រៃបានបើកគេចចេញពីកន្លែងកើតហេតុ ហើយចតគោយន្តកន្ត្រៃចោលនៅផ្លូវលំមួយកន្លែងក្នុងភូមិគគរ ឃុំស្រឡៅ រួចអ្នកបើកបរបានរត់គេចខ្លួនបាត់ស្រមោល ។
ក្រោយកើតហេតុ ម៉ូតូត្រូវបានយកមករក្សាទុកនៅអធិការដ្ឋាននគរបាលស្រុកបារាយណ៍ ចំណែកគោយន្ដកន្ត្រៃត្រូវបានយកមករក្សាទុកនៅប៉ុស្តិ៍នគរបាលស្រឡៅ ដើម្បីចាត់ការតាមនីតិវិធី ៕
ចែករំលែកព័តមាននេះ