រាជធានីភ្នំពេញ ៖ ប្រធានសមាគមនីហ្សេរីយ៉ាម្នាក់ ត្រូវនគរបាលការិយាល័យកណ្តាលសន្តិសុខនៃស្នងការដ្ឋាននគរបាលរាជធានីភ្នំពេញចាប់ឃាត់ខ្លួនកាលពីថ្ងៃទី២២ មីនា ២០១១ វេលាម៉ោង៣និង៣០នាទីរសៀល ខណៈពេលដែលជននោះកំពុងជិះរថយន្តក្នុងភូមិសាស្ត្រសង្កាត់បឹងរាំង ខណ្ឌដូនពេញ ហើយធ្វើឡើងបន្ទាប់ពីសមត្ថកិច្ចឃាត់ខ្លួនស្ត្រីជនជាតិហ៊្វីលីពីនម្នាក់នៅព្រលានយន្តហោះអន្តរជាតិភ្នំពេញ កាលពីថ្ងៃអាទិត្យ កន្លងមកនេះ និងដកហូតបានគ្រឿងញៀនមេតំហ្វេតាមីនជាង៣គីឡូក្រាម ។
បុរសសង្ស័យពាក់ព័ន្ធរត់ពន្ធគ្រឿងញៀនដែលសមត្ថកិច្ចឃាត់ខ្លួនឈ្មោះ OKERE UGOCHU KWU EMMANNEL អាយុ៣៧ឆ្នាំ លិខិតឆ្លងដែនលេខ A00775315 ជនជាតិនីហ្សេរីយ៉ាប្រធានសមាគមនីហ្សេរីយ៉ានៅកម្ពុជា ទីលំនៅសង្កាត់ផ្សារកណ្តាលទី២ ខណ្ឌដូនពេញ ។ សមត្ថកិច្ចជំនាញបានបង្ហើបឱ្យដឹងថា កាលពីថ្ងៃទី២០ មីនា ២០១១ វេលាម៉ោង១១និង៣០នាទីព្រឹក នគរបាលក្រសួងមហាផ្ទៃសហការជាមួយព្រះរាជអាជ្ញាអមសាលាដំបូងរាជធានីភ្នំពេញ បានឃាត់ខ្លួនស្រ្តីជនជាតិហ៊្វីលីពីន ម្នាក់ឈ្មោះបុកស៊ីឡូ ដេយ៉ាណា អាយុ២៦ឆ្នាំ កាន់លិខិតឆ្លងដែនលេខ XX1521474 ខណៈពេលស្ត្រីនោះធ្វើដំណើរតាមជើងយន្តហោះឌូបៃ-ម៉ាឡេស៊ី-ភ្នំពេញ ហើយសមត្ថកិច្ចរកឃើញគ្រឿងញៀនប្រភេទមេតំហ្វេតាមីនជាង៣គីឡូក្រាម ដែលលាក់ជាប់នឹងខ្លួន។
បន្ទាប់ពីឃាត់ខ្លួនស្រ្តីរូបស្រស់ខាងលើ ទើបសមត្ថកិច្ចជំនាញឈានទៅឃាត់ខ្លួនបុរសជនជាតិនីហ្សេរីយ៉ា ឈ្មោះ OKERE UGOCHU KWU EMMANNEL ជាប្រធានសមាគមនីហ្សេរីយ៉ានៅកម្ពុជា។ ពេលឃាត់ខ្លួនជននេះសមត្ថកិច្ចដកហូតបានរថយន្តមួយគ្រឿងម៉ាកឡង់គ្រីស្ស័រគ្មានស្លាកលេខ។ ការឃាត់ខ្លួនបុរសខាងលើគឺពាក់ព័ន្ធការរត់ពន្ធគ្រឿងញៀនមេតំហ្វេតាមីនជាង៣គីឡូក្រាមឆ្លងកាត់ព្រលានយន្តហោះអន្តរជាតិភ្នំពេញក្រោយពីចាប់ខ្លួនស្រ្តីជនជាតិហ្វីលីពីន ហើយស្រ្តីនោះសារភាពពីមេខ្លោង ៕
ចែករំលែកព័តមាននេះ