ប្រតិបត្តិការបង្ក្រាបស្កេ.មអនឡាញ ឆែកឆេរ ៨៥ទីតាំង ឃាត់ខ្លួនជនសង្ស័យ ៣២នាក់ ផាកពិន័យ ១៣២លានរៀល
- ភ្នំពេញ
រាជធានីភ្នំពេញ ៖ ទីតាំងអគារខុនដូ អាផាតមិន បុរី ផ្ទះសំណាក់ និងសណ្ឋាគារមួយចំនួន នៅក្នុងភូមិសាស្ដ្ររាជធានីភ្នំពេញ ចំនួន៨៥ទីតាំងត្រូវបានគណៈបញ្ជាការឯកភាពរាជធានីភ្នំពេញនិងតាមបណ្ដាខណ្ឌទាំង១៤ បានចុះប្រតិបត្តិការឆែកឆេបង្ក្រាបករណីឆរបោកតាមប្រព័ន្ធបច្ចេកវិទ្យាដោយឃាត់ខ្លួនជនសង្ស័យចំនួន៣២នាក់ក្នុងនោះ១៨នាក់ស្នាក់នៅខុសច្បាប់ដោយពុំមានលិខិត ឆ្លងដែន,៦នាក់ពាក់ព័ន្ធប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) និង៨នាក់បើកល្បែងសុីសងខុសច្បាប់។
តាមរដ្ឋបាលរាជធានីភ្នំពេញបានឲ្យដឹងថា នៅថ្ងៃទី៨ ខែមិថុនា ឆ្នាំ២០២៦នេះ គណៈបញ្ជាការឯកភាពរដ្ឋបាលខណ្ឌទាំង១៤ ក្រោមការដឹកនាំបញ្ជាផ្ទាល់របស់ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ បានចុះត្រួតពិនិត្យតាមទីតាំងអគារខុនដូ អាផាតមិន បុរី ផ្ទះសំណាក់ និងសណ្ឋាគារមួយចំនួន ក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) និងចុះផ្សព្វផ្សាយអនុក្រឹត្យលេខ ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ របស់រាជរដ្ឋាភិបាលកម្ពុជា ស្ដីពីការគ្រប់គ្រងសន្ដិសុខសុវត្ថិភាពតាមទីតាំងរស់នៅប្រមូលផ្ដុំ ក្នុងភូមិសាស្ដ្ររាជធានីភ្នំពេញ បានចំនួន៨៥ទីតាំង។
ជាលទ្ធផលក្រុមការងារបានចុះត្រួតពិនិត្យទីតាំងរកឃើញជនបរទេសស្នាក់នៅសរុបចំនួន ៤៦៩នាក់ (ស្រី ១៣៩នាក់) ក្នុងនោះជនបរទេសដែលស្នាក់នៅដោយពុំមានលិខិត ឆ្លងដែនមានចំនួន ១៨នាក់។ ក្នុងចំណោម ៨៥ទីតាំងនេះ ក្នុងនោះក្រុមការងារបានពិនិត្យឃើញមាករណីការឆបោកតាមប្រព័ន្ធបច្ចេកវិទ្យា (ONLINE SCAMS) ចំនួន ១ករណី ស្ថិតនៅបុរីអាម៉ូរីសែនសុខ ផ្ទះលេខ១៨បេ ផ្លូវលេខ០៣ ភូមិរោងចក្រ១ សង្កាត់គោកឃ្លាង ខណ្ឌសែនសុខ ឃាត់ខ្លួនជនសង្ស័យចំនួន ៦នាក់ (ស្រី ១នាក់) គ្មានលិខិតឆ្លងដែន ៥នាក់ ក្នុងនោះមានជនជាតិចិន ៥នាក់ និងជនជាតិមីយ៉ាន់ម៉ា ១នាក់ (ស្រី) ព្រមទាំងដកហូតសម្ភារពាក់ព័ន្ធមួយចំនួន។ ជនសង្ស័យ និងសម្ភារត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្ដនីតិវិធី។
តាមរដ្ឋបាលបានអោយដឹងទៀតថា បន្ថែមពីនេះទៀតក្រុមការងារខណ្ឌកំបូលបានពិនិត្យឃើញមានទីតាំងបើកល្បែងសុីសងខុសច្បាប់ចំនួន ១ករណី ដោយបានឃាត់ខ្លួនជនសង្ស័យចំនួន ៨នាក់ ក្នុងនោះមានជនជាតិចិន ៧នាក់ និងជនជាតិខ្មែរ ១នាក់ ព្រមទាំងដកហូតសម្ភារពាក់ព័ន្ធមួយចំនួន។ ជនសង្ស័យ និងសម្ភារត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្ដនីតិវិធី។
ជាមួយគ្នានេះ ស្នងការដ្ឋាននគរបាលរាជធានីភ្នំពេញ បានអនុវត្តការផាកពិន័យចំពោះម្ចាស់ ឬអ្នកគ្រប់គ្រងទីតាំង រស់នៅប្រមូលផ្ដុំតាមអនុក្រឹត្យលេខ០៣ សរុបចំនួន ១២ទីតាំង មនុស្សចំនួន ៣៣នាក់ គិតជាថវិកាសរុបបានចំនួន ១៣២.០០០.០០០រៀល៕
ចែករំលែកព័តមាននេះ