រាជធានីភ្នំពេញ ៖ យោងតាមការសិក្សាថ្មីមួយរបស់ក្រុមហ៊ុន Key Real Estate បានរកឃើញថា តម្លៃដីធ្លីនៅក្រុងសៀមរាបបានកើនឡើងតិចតួច បើធៀបនឹងបណ្តាខេត្តមានសក្តានុពលសេដ្ឋកិច្ចដទៃទៀត ដោយសារតែដីនៅក្រុងវប្បធម៌ប្រវត្តិសាស្ត្រដ៏វ័យចំណាស់មួយនេះបានកើនខ្ពស់រួចទៅហើយ ។
ការសិក្សារបានឲ្យដឹងនៅដើមសប្តាហ៍នេះថា តម្លៃដីនៅក្នុងក្រុងសៀមរាប មានតម្លៃចាប់ពី ១០០ដុល្លារទៅដល់៥.៥០០ក្នុង១ម៉ែត្រការ៉េ។ តម្លៃអចលនទ្រព្យក្នុងក្រុងសៀមរាប កាលពីឆ្នាំមុន មិនបានកើនច្រើនទេ ព្រោះខេត្តសៀមរាបជាកន្លែងដែលមានការអភិវឌ្ឍ និងដីមានតម្លៃកើនខ្ពស់ជាយូរមកហើយ ។
ការសិក្សាដដែលបានឲ្យដឹងផងដែរថា ឆ្នាំ២០១៨ តម្លៃអចលនទ្រព្យក្នុងក្រុងសៀមរាបកើនឡើងចន្លោះពី៥ទៅ១០ភាគរយតែប៉ុណ្ណោះ ខុសពីខេត្តព្រះសីហនុ ដែលដីបានកើនឡើងយ៉ាងខ្ពស់ ដោយសារទីនោះជាតំបន់អភិវឌ្ឍន៍ថ្មី និងមានភ្ញៀវជនជាតិចិនជាច្រើនទៅសម្រាកកម្សាន្ត ។
ជាមួយគ្នានេះ វិស័យទេសចរណ៍ក្នុងខេត្តសៀមរាប ក៏សម្រេចបានកំណើនល្អប្រសើរផងដែរ ដោយយោងតាមរបាយការណ៍បញ្ចប់នៃឆ្នាំ២០១៨ បានបង្ហាញថា រមណីយដ្ឋានអង្គរ បានស្វាគមន៍ភ្ញៀវទេសចរចំនួន២,៥៩លាននាក់កើនឡើង៥,៤៥ភាគរយ បើធៀបនឹងឆ្នាំ២០១៧ ដោយរកប្រាក់ចំណូលបានជាង១១៦,៦៤លានដុល្លារ កើន៨ភាគរយ ។
លោក ចៅ សេងថៃ អគ្គនាយកក្រុមហ៊ុន Goal Property Service Co., Ltd. បានមានប្រសាសន៍ថា តម្លៃដីធ្លីក្នុងក្រុងសៀមរាប និងបណ្តាតំបន់ជុំវិញផ្លូវក្រវាត់ក្រុងបានកើនឡើងខ្លាំង ដោយសារគម្រោងវិនិយោគជាច្រើនបានចាប់ផ្តើម ហើយលំហូរវិនិយោគចិន អ្នកវិនិយោគក្នុងស្រុក និងអ្នកវិនិយោគអន្តរជាតិដទៃទៀតបានចូលមកកាន់តែច្រើន ធៀបនឹងបណ្តាប៉ុន្មានឆ្នាំមុន ។
លោកបន្តថា ការមកដល់នៃផ្សារបោះដុំ MAKRO, ការសាងសង់ព្រលានយន្តហោះអន្តរជាតិនៅស្រុកសូទ្រនិគម និងគម្រោងធំៗដទៃទៀត នឹងធ្វើឲ្យខេត្តសៀមរាបកាន់តែរីកចម្រើននាពេលអនាគត ។
លោកបន្តថា ៖« វាដល់ពេលដែលវិស័យអចលនទ្រព្យផ្ទុះនៅក្រុងសៀមរាបហើយ វាជាខេត្តលែងពឹងផ្អែកតែវិស័យទេសចរណ៍តែមួយមុខហើយ » ។
សៀមរាបគឺជាគោលដៅអភិវឌ្ឍន៍សំខាន់មួយក្នុងចំណោមប៉ូលសេដ្ឋកិច្ចសំខាន់ៗរបស់កម្ពុជា ។ ការអភិវឌ្ឍខេត្តសៀមរាបនាពេលបច្ចុប្បន្ន ត្រូវបានគេមើលឃើញថា កំពុងមានសន្ទុះខ្លាំង ដោយសារតែវាតំបន់ទេសចរណ៍ដ៏ទាក់ទាញមួយ ហើយអាកាសយានដ្ឋានអន្តរជាតិក្នុងខេត្តសៀមរាប ក៏មានការមមាញឹកផងដែរ ។
លោក ច្រឹក សុខនីម ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានឲ្យដឹងកន្លងមកថា ក្រុងសៀមរាបឲ្យតែចេញផុតពីតំបន់ ដែលស្ថិតក្នុងការអភិរក្សរបស់អាជ្ញាធរជាតិអប្សរា ជាតំបន់មានការអភិវឌ្ឍលឿន ប៉ុន្តែល្បឿននៃការអភិវឌ្ឍក្រុងសៀមរាប មិនលឿនដូចក្រុងព្រះសីហនុ ឬក្រុងប៉ោយប៉ែតនោះទេ តែការអភិវឌ្ឍបាននិងកំពុងធ្វើឡើងដោយសន្សឹមៗ ។
លោកបន្តថា ដោយសារក្រុងសៀមរាប កាន់តែមានការអភិវឌ្ឍលឿន ការកកស្ទះចរាចរណ៍កំពុងកើនឡើងដែរ ដូច្នេះហើយការពង្រីកហេដ្ឋារចនាសម្ព័ន្ធទៅតំបន់ជាយក្រុង ជាដំណោះស្រាយសមស្របមួយ។ លោកមានប្រសាសន៍ថា ៖« នៅពេលហេដ្ឋារចនាសម្ព័ន្ធរបស់រាជរដ្ឋាភិបាលអភិវឌ្ឍន៍នៅតំបន់ណា តំបន់នោះនឹងទាក់ទាញការវិនិយោគ និងធ្វើឲ្យតម្លៃដីធ្លីកើនឡើងផងដែរ » ៕
ចែករំលែកព័តមាននេះ