ការដែលយើងចេះតែមានទុក្ខ សម្បូរកិលេស ក៏ព្រោះតែមកអំពីការព្យាយាមចេះតែចង់បាននេះ ចង់បាននោះទៅតាមអំណាចនៃចិត្តចង់ដែលសុទ្ធតែជារបស់ក្រៅខ្លួន នេះឯងជាទុក្ខ ។
នៅក្នុងសកលចក្កវាឡនេះ មិនមែនកើតឡើងមកដើម្បីតម្រូវទៅនឹងសេចក្ដីត្រូវការរបស់អ្នកណាមួយឡើយ គឺវាប្រព្រឹត្តទៅតាមតែច្បាប់ធម្មជាតិប៉ុណ្ណោះ បើទោះជាវាកើតមានស្របតាមសេចក្ដីប្រាថ្នាខ្លះ ក៏បានត្រឹមតែមួយរយៈដែលវាប្រព្រឹត្តទៅតែប៉ុណ្ណឹងឯងមិនឋិតថេរទេ។
ដូច្នេះបើយើងមិនបានសិក្សាឲ្យឃើញពីលោកនេះទៅតាមសេចក្ដីពិតទេ យើងនឹងអន្ទះសាដេញចាប់របស់ដែលជាតម្រូវការរបស់ចិត្តនោះគ្មានទីបំផុតឡើយ នេះជាទុក្ខធំណាស់ ។
ពិតណាស់អ្វីៗក្នុងលោកនេះសុទ្ធតែជាធម្មជាតិ មិនស្ដាប់បង្គាប់អ្នកណាឡើយ គឺប្រព្រឹត្តទៅតាមតែហេតុ តាមតែបច្ច័យប៉ុណ្ណោះ។ យើងអាចអប់រំចិត្ត អប់រំចរិយា និងរៀបចំដំណើរនៃជីវិតទៅតាមសេចក្ដីពិតនៃលោកនេះ កុំលោតហក់ទៅតាមចំណង់ពេក នេះឯងជាដំណើរដ៏ល្អនៃជីវិត ។
ចែករំលែកព័តមាននេះ