រាជធានីភ្នំពេញ ៖លោក គង់ គាំ អតីតប្រធានគណបក្សសម រង្ស៊ី និងជាមន្ត្រីជំនិតរបស់លោកសម រង្ស៊ី អតីតគណបក្សសង្គ្រោះជាតិក្នុងចំណោម១១៨នាក់បានបញ្ជាក់ប្រាប់កោះសន្តិភាពកាលពីថ្ងៃទី៩ ខែមករា…
រាជធានីភ្នំពេញ ៖លោក គង់ គាំ អតីតប្រធានគណបក្សសម រង្ស៊ី និងជាមន្ត្រីជំនិតរបស់លោកសម រង្ស៊ី អតីតគណបក្សសង្គ្រោះជាតិក្នុងចំណោម១១៨នាក់បានបញ្ជាក់ប្រាប់កោះសន្តិភាពកាលពីថ្ងៃទី៩ ខែមករា ឆ្នាំ២០១៩ថា លោកបានដាក់ពាក្យទៅក្រសួងមហាផ្ទៃ ដើម្បីសុំសិទ្ធិធ្វើនយោបាយឡើងវិញ បន្ទាប់ពីមានការដកបម្រាមដែលតុលាការកំពូលហាមឃាត់ និងច្បាប់មាត្រា៤៥ថ្មី បានអនុញ្ញាតឲ្យស្នើសុំទៅក្រសួងមហាផ្ទៃ ។
លោក គង់ គាំ បានបញ្ជាក់តាមទូរស័ព្ទថា«ខ្ញុំដាក់ចូលទៅក្រសួងមហាផ្ទៃរួចហើយ ។ ខ្ញុំបានទទួលព័ត៌មានថា ក្រសួងមហាផ្ទៃបានទទួលពាក្យសុំរបស់ខ្ញុំហើយ» ។ ក្នុងទំនាក់ទំនងតាមទូរស័ព្ទដែលលោកកំពុងស្ថិតនៅតាមបណ្តាខេត្តលោក គង់ គាំ មិនបានបញ្ជាក់ច្បាប់ទេថា មានមន្ត្រីអតីតជាន់ខ្ពស់របស់គណបក្សសង្គ្រោះជាតិដែលជាប់បម្រាមប៉ុន្មាននាក់បានដាក់ពាក្យសុំទេ ព្រោះទំនាក់ទំនងមិនសូវច្បាស់ ។
យោងតាមច្បាប់ស្តីពីគណបក្សនយោបាយមាត្រា៤៥ថ្មី (ស្ទូន) ដែលទើបតែធ្វើវិសោធនកម្មនាពេលថ្មីនេះបានបើកផ្លូវដល់អ្នកនយោបាយទាំង១១៨នាក់ជាប់បម្រាមក្នុងការធ្វើនយោបាយដែលសម្រេចដោយតុលាការកំពូល កាលពីថ្ងៃទី១៦ ខែវិច្ឆិកា ឆ្នាំ២០១៧កន្លងមកមានសិទ្ធិស្នើសុំទៅក្រសួងមហាផ្ទៃ រួចបន្តបញ្ជូនទៅសម្តេចនាយករដ្ឋមន្ត្រី និងស្នើសុំទៅព្រះមហាក្សត្រក្នុងការផ្តល់នីតិសម្បទាដល់អ្នកនយោបាយជាប់បម្រាមទាំងនោះបានទទួលសិទ្ធិក្នុងការធ្វើនយោបាយឡើងវិញ ។
ប្រភពពីក្រសួងមហាផ្ទៃបានបញ្ជាក់ប្រាប់អ្នកសារព័ត៌មាននៅថ្ងៃទី៩ ខែមករា ឆ្នាំ២០១៩ថាក្រសួងមហាផ្ទៃ កាលពីវេលាម៉ោង១០និង៣០នាទីថ្ងៃទី១៩ មករា ឆ្នាំ២០១៩ បានទទួលលិខិតរបស់លោក គង់ គាំ ដើម្បីសុំធ្វើនយោបាយឡើងវិញ ។ ទោះបីយ៉ាងណាកាលពីពេលថ្មីៗនេះលោក គង់ គាំ និងកូនប្រុសលោកឈ្មោះ គង់ បូរ៉ា អតីតថ្នាក់ដឹកនាំគណបក្សសង្គ្រោះជាតិថាបានដាក់ពាក្យស្នើសុំធ្វើនយោបាយឡើងវិញដែរ តែខាងក្រសួងមហាផ្ទៃមិនទាន់បញ្ជាក់នៅឡើយទេ ។
យោងតាមច្បាប់ដែលវិសោធនកម្មមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយបានចែងថា «បុគ្គលត្រូវបានតុលាការសម្រេចហាមឃាត់ការធ្វើសកម្មភាពនយោបាយមិនអាចបង្កើតគណបក្សនយោបាយ ឬចូលរួមក្នុងគណបក្សនយោបាយណាមួយ ឬឈរឈ្មោះឲ្យគេបោះឆ្នោត ឬធ្វើសកម្មភាពណាមួយគាំទ្រ ឬប្រឆាំងគណបក្សណាមួយបានឡើយ ។ បុគ្គលដែលបានតុលាការសម្រេចហាមឃាត់ការធ្វើសកម្មភាពនយោបាយនេះនឹងអាចទទួលបានវិញនូវសិទ្ធិនយោបាយពេញលេញដោយពេញច្បាប់ បន្ទាប់ពីផុតរយៈពេលនៃការហាមឃាត់ ដែលកំណត់ដោយសាលដីការបស់តុលាការកំពូល ឬក្នុងករណីដែលបុគ្គលនោះត្រូវបានផ្តល់នីតិសម្បទាឡើងវិញ ដោយព្រះមហាក្សត្រ តាមសំណើរបស់នាយករដ្ឋមន្ត្រី តាមសេចក្តីស្នើសុំរបស់រដ្ឋមន្ត្រីក្រសួងមហាផ្ទៃ ។
សូមបញ្ជាក់ថា លោកគង់ គាំ និង លោកគង់ បូរ៉ា រួមទាំងអតីតថ្នាក់ដឹកនាំអតីតគណបក្សសង្គ្រោះជាតិសរុបចំនួន១១៨នាក់ត្រូវបានតុលាការកំពូលចេញសាលដីកាផ្អាកសកម្មភាពនយោបាយរយៈពេល៥ឆ្នាំ កាលពីថ្ងៃទី១៦ ខែវិច្ឆិកា ឆ្នាំ២០១៧ បន្ទាប់ពីរកឃើញថា អតីតគណបក្សសង្គ្រោះជាតិបានឃុបឃិតជាមួយបរទេសក្នុងគោលបំណងផ្តួលរំលំរាជរដ្ឋាភិបាលស្របច្បាប់នៅកម្ពុជា៕
ចែករំលែកព័តមាននេះ