រាជធានីភ្នំពេញ ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានបញ្ជាក់ថា ការអនុវត្តកសិកម្មតាមកិច្ចសន្យាបានផ្តល់អត្ថប្រយោជន៍ច្រើនដល់កសិករដែលជាអ្នកផលិតនិងម្ចាស់ក្រុមហ៊ុន ឬសហគ្រាស ក្រៅពីជួយរក្សាបាននូវតម្លៃថេរនៅលើទីផ្សារ ហើយកំពុងតែមានការគាំទ្រពីកសិករផងដែរ ។
លោក វេង សាខុន រដ្ឋមន្ត្រីក្រសួង កសិកម្ម រុក្ខាប្រមាញ់ និងនេសាទ បានលើកឡើងក្នុងដំណើរចុះពិនិត្យកសិដ្ឋានចិញ្ចឹមមាន់នៅភូមិស្រក ឃុំស្រក ស្រុកកំពង់សៀម ខេត្តកំពង់ចាម កាលពីថ្ងៃទី៥ មករា កន្លងមកថា ការអនុវត្តផលិតកម្មកសិកម្មតាមកិច្ចសន្យាបានផ្តល់អត្ថប្រយោជន៍យ៉ាងច្រើនដល់ភាគីផលិត និងភាគីអ្នកទិញ ជាអាទិ៍ គឺជួយរក្សាបាននូវតម្លៃថេរមួយ, ធានាបាននូវបរិមាណផ្គត់ផ្គង់ និងការផ្គត់ផ្គង់មាននិរន្តរភាព, អ្នកផលិតទទួលបានបច្ចេកទេសពីក្រុមហ៊ុន ឬទុនវិនិយោគបន្ថែម, គុណភាពផលិតផលត្រូវបានលើកកម្ពស់ និងគាំទ្រដោយក្រសួង ប្រសិនបើកិច្ចសន្យានេះត្រូវបានទទួលស្គាល់ដោយអគ្គនាយកដ្ឋានកសិកម្ម អគ្គនាយកដ្ឋានផលិតកម្មសត្វ និងសុខភាពសត្វ និងនាយកដ្ឋានកសិ-ឧស្សាហកម្ម ។
លោករដ្ឋមន្ត្រីបញ្ជាក់ថា ៖« ផ្អែកលើហេតុផលនេះ បច្ចុប្បន្នក្រសួងបាននិងកំពុងជំរុញគាំទ្រ និងលើកទឹកចិត្តឱ្យគ្រប់ភាគីពាក់ព័ន្ធបន្តធ្វើការផ្សព្វផ្សាយ និងអនុវត្តច្បាប់នេះឱ្យបានទូលំទូលាយ និងមានប្រសិទ្ធភាពខ្ពស់ ប្រយោជន៍ដើម្បីបង្កើនផលិតភាពផលិតកម្មក្នុងស្រុក ធានាដល់ការផ្គត់ផ្គង់តម្រូវការទីផ្សារក្នុងស្រុក កាត់បន្ថយការនាំចូល និងឈានទៅធ្វើការនាំចេញ »។
អ្នកស្រី តុង ចាន់ធាង នាយិការប្រតិបត្តិការអង្គការសេដាក បានប្រាប់កោះសន្ដិភាពតាមបណ្ដាញសង្គម កាលពីថ្ងៃទី៦ មករា ឆ្នាំ២០១៩ ថា ៖« ការអនុវត្តកសិកម្មតាមកិច្ចសន្យាមកដល់បច្ចុប្បន្ន ប្រជាកសិករមានការយល់ដឹងកើនឡើង ពិសេសតាមរយៈការគាំទ្រពីគម្រោង ឬកម្មវិធីរបស់ដៃគូអភិវឌ្ឍន៍ដែលធ្វើការលើវិស័យកសិកម្ម »។ អ្នកស្រីលើកឡើងថា ៖« យើងឃើញថាមានគម្រោងកសិកម្មជាច្រើននាពេលថ្មីៗនេះ ជំរុញកសិកម្មតាមកិច្ចសន្យា ដើម្បីលើកកម្ពស់ទីផ្សារសម្រាប់កសិករខ្នាតតូច ជាពិសេសវិស័យស្រូវអង្ករ ផ្លែឈើ និងបន្លែសុវត្ថិភាព សរីរាង្គ ជាដើម »។
អ្នកស្រីបន្តថា ការអនុវត្តកសិកម្មតាមកិច្ចសន្យា វាជាសញ្ញាល្អសម្រាប់កសិករខ្មែរក្នុងការធានាតម្លៃ ដែលកន្លងមកបានជួបបញ្ហាច្រើនក្នុងការរកទីផ្សារលក់នៅពេលផលិតបានច្រើន។ ចំពោះក្រុមហ៊ុន ទទួលបានការផ្គត់ផ្គង់កសិផលមានប្រភពជាក់លាក់ ទាំងបរិមាណ និងគុណភាព នាំឱ្យពួកគាត់ងាយស្រួលលក់នៅលើទីផ្សារ ។ អ្នកស្រីសង្កត់ធ្ងន់ថា ៖« យើងក៏សង្កេតឃើញថា អ្នកបរិភោគក៏មាននិន្នាការគាំទ្រផលិតផលមានគុណភាពល្អប្រកបដោយសុខភាព ជាពិសេសដែលផលិតដោយកសិករខ្នាតតូចក្រីក្រ ដូចនេះ កសិកម្មតាមកិច្ចសន្យាជាមួយកសិករកម្ពុជាដែលភាគច្រើនជាកសិករខ្នាតតូច នោះនាំឱ្យក្រុមហ៊ុនទទួលប្រយោជន៍បន្ថែមនូវការទទួលខុសត្រូវសង្គម ដែលជាទិសដៅអភិវឌ្ឍន៍សាកលនៅពេលអនាគត » ៕
ចែករំលែកព័តមាននេះ