រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន នាយករដ្ឋមន្ដ្រី បានថ្លែងថា កម្ពុជានាពេលបច្ចុប្បន្នទទួលបានចំណាត់ថ្នាក់ជាប្រទេសដែលមានកំណើនសេដ្ឋកិច្ចខ្ពស់ និងលឿនបំផុតនៅលំដាប់ទី៦លើពិភពលោក ដោយសម្រេចបានកំណើនជាមធ្យមជាង៧%ក្នុង១ឆ្នាំ ។
សម្តេចតេជោបានថ្លែងបែបនេះនៅក្នុងពិធីអបអរសាទរថ្ងៃជ័យជម្នះ ៧មករា ខួបលើកទី៤០ឆ្នាំ នៅពហុកីឡដ្ឋានជាតិអូឡាំពិក នៅថ្ងៃទី៧ ខែមករា ឆ្នាំ២០១៩ ។ សម្តេចតេជោបានបន្តថា សេដ្ឋកិច្ចកម្ពុជាសម្រេចបានសមិទ្ធផលយ៉ាងធំធេងគួរជាទីមោទនៈក្នុងរយៈពេលជាង២ទសវត្សរ៍ចុងក្រោយនេះ ។ ចាប់តាំងពីឆ្នាំ២០០០រហូតមកដល់ឆ្នាំ២០១៨ ផលិតផលក្នុងស្រុកសរុបមានតម្លៃប្រមាណជា២៤.៦០៥លានដុល្លារ ដូច្នេះរចនាសម្ព័ន្ធសេដ្ឋកិច្ចកម្ពុជា ក៏កំពុងផ្លាស់ប្ដូរពីប្រទេសដែលពឹងផ្អែកលើវិស័យកសិកម្មទៅជាប្រទេសដែលពឹងផ្អែកជាសំខាន់លើវិស័យឧស្សាហកម្ម និងសេវាកម្មវិញ ។
សម្ដេចតេជោថ្លែងថា ៖« កម្ពុជាទទួលបានចំណាត់ថ្នាក់ជាប្រទេសដែលមានកំណើនសេដ្ឋកិច្ចខ្ពស់ និងលឿនបំផុតនៅលំដាប់ទី៦លើពិភពលោកដោយសម្រេចបានកំណើនជាមធ្យមជាង៧%ក្នុង១ឆ្នាំ »។ សម្ដេចបន្ថែមថា ៖« ការរីកចម្រើនក្នុងកម្រិតដ៏ខ្ពស់ជាប់មិនដាច់នេះ ដោយសារកំណើននៃវិស័យឧស្សាហកម្មកម្មន្ដសាល សំណង់ កសិកម្ម សេវាកម្ម ទេសចរណ៍ អចលនទ្រព្យ គមនាគមន៍ និងការដឹកជញ្ជូន។ ជាលទ្ធផល សេដ្ឋកិច្ចជាតិបានរីកធំធាត់យ៉ាងឆាប់រហ័ស »។
សម្ដេចតេជោបន្ថែមថា ជាក់ស្ដែងផលិតផលក្នុងស្រុកសរុបបានកើនពីប្រមាណ៣.៦៤៩លានដុល្លារនៅឆ្នាំ២០០០ ដល់ប្រមាណ២៤.៦០៥លានដុល្លារនៅឆ្នាំ២០១៨។ រចនាសម្ព័ន្ធសេដ្ឋកិច្ចកម្ពុជា ក៏កំពុងផ្លាស់ប្ដូរពីប្រទេសដែលពឹងផ្អែកលើវិស័យកសិកម្មទៅជាប្រទេសដែលពឹងផ្អែកជាសំខាន់លើវិស័យ ឧស្សាហកម្ម និងសេវាកម្មវិញ។ ផ្លូវ ស្ពាន បណ្ដាញអគ្គិសនី ទឹកស្អាត ប្រព័ន្ធធារាសាស្ដ្រ មន្ទីរពេទ្យ សាលារៀន ត្រូវបានស្ថាបនាច្រើនពាសពេញផ្ទៃប្រទេស ជាពិសេសរោងចក្រ សហគ្រាស កសិដ្ឋាន មជ្ឈមណ្ឌលពាណិជ្ជកម្ម ផ្សារទំនើប អគារខ្ពស់ត្រូវបានកសាង និងពង្រឹកកាន់តែច្រើន ដែលបានផ្ដល់ការងារជូនប្រជាជនរាប់លាននាក់នៅគ្រប់ទិសទី ។ កម្ពុជាក៏ត្រូវបានមជ្ឈដ្ឋានវិនិយោគិនក្នុងស្រុក ក្រៅប្រទេស និងស្ថាប័នហិរញ្ញវត្ថុអន្ដរជាតិនានាវាយតម្លៃថា ជាប្រទេសដែលមានបរិយាកាសល្អសម្រាប់ការវិនិយោគ និងធុរកិច្ចផងដែរ ។
កម្ពុជារំពឹងថា នៅតែអាចសម្រេចបានកំណើនសេដ្ឋកិច្ចក្នុងរង្វង់៧%ក្នុង១ឆ្នាំ និងធានាបានស្ថិរភាពម៉ាក្រូសេដ្ឋកិច្ចរឹងមាំបន្ដទៀត ។
សម្ដេចតេជោ ហ៊ុន សែន បានលើកឡើងទៀតថា ជីវភាពរស់នៅរបស់ពលរដ្ឋទូទៅ ក៏ទទួលបានការកែលម្អកាន់តែប្រសើរឡើងជាលំដាប់ ។ ប្រការនេះត្រូវបានឆ្លុះបញ្ចាំងតាមរយៈកំណើនចំណូលមធ្យមសម្រាប់មនុស្សម្នាក់ពីប្រមាណ២៨៨ដុល្លារនៅឆ្នាំ២០០០ ដល់១.៥៦៣ដុល្លារនៅឆ្នាំ២០១៨ ។ អត្រានៃភាពក្រីក្របានធ្លាក់ចុះពីប្រមាណ៥៣,២% នៅឆ្នាំ២០០៤ មកនៅត្រឹមប្រមាណ១៣,៥% នៅឆ្នាំ២០១៤ និងត្រូវបានរំពឹងថា បន្ដថយចុះមកនៅក្នុងរង្វង់១០%នាបច្ចុប្បន្ន ។
កម្ពុជាបានឆ្លងកាត់ដោយជោគជ័យពីប្រទេសមានចំណូលទាបក្លាយជាប្រទេសមានចំណូលមធ្យមកម្រិតទាប ព្រមទាំងកំពុងប្រឹងប្រែងដើម្បីឈានទៅកាន់ប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ។ ប្រធាននាយកប្រតិបត្តិធនាគាអេស៊ីលីដា ភីអិលស៊ី លោកបណ្ឌិត អុិន ចាន់នី បានថ្លែងថា ផ្អែកលើកំណើនសេដ្ឋកិច្ចកម្ពុជាដែលសម្រេចបានកំនើន៧ភាគរយ កម្ពុជានឹងសម្រេចឬឈានដល់គោលដៅក្នុងការក្លាយខ្លួនជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ខាងមុខនេះ។
លោកបន្តថា កម្រិតប្រាក់ចំណូលកើនឡើងរបស់ប្រជាពលរដ្ឋជាកត្តាអំណោយផលមួយទៀតដល់អ្នកវិនិយោគអន្តរជាតិមកបោះទុនវិនិយោគ ព្រោះអ្នកវិនិយោគ ពួកគេនឹងមិនទៅកាន់ប្រទេសក្រីក្រនោះទេ ពួកគេសម្លឹងទៅកាន់ប្រទេសមានប្រាក់ចំណូលខ្ពស់ ដោយសារអំណាចនៃការទិញកើនឡើង ។
លោកបន្តថា ៖« កត្តាសុខសន្តិភាព ស្ថិរភាពសង្គម និងកំណើនសេដ្ឋកិច្ចរឹងមាំរបស់កម្ពុជា នឹងធ្វើឲ្យកម្ពុជាកាន់តែមានភាពរីកចម្រើន និងទាក់ទាញលំហូរវិនិយោគផ្ទាល់ពីបរទេសកើនឡើង »៕
ចែករំលែកព័តមាននេះ