សហរដ្ឋអាមេរិក ៖ ប្រធានាធិបតីអាមេរិកលោកដូណាល់ត្រាំ អះអាងកាលពីថ្ងៃទី៦មករាថា ជនឈ្មោះJAMAL AL BADAOUI ចាត់ទុកជាមេគំនិតនៃការវាយប្រហារអត្តឃាត កាលពីថ្ងៃទី១២តុលាឆ្នាំ២០០០ ប្រឆាំងនាវាពិឃាតអាមេរិក USS COLEត្រូវកងទ័ពអាមេរិកតាមសម្លាប់បានហើយ។ មិនដល់១ឆ្នាំផងក្រោយពីការវាយប្រហារនោះក្រុមអាល់កៃដា បានវាយប្រហារអគារភ្លោះនៃមជ្ឈមណ្ឌលពាណិជ្ជកម្មពិភពលោក WTCថ្ងៃទិី១១កញ្ញានៅក្រុងញូវយ៉ក។
តាមTWITTERលោកត្រាំសរសេរថា កងទ័ពរបស់យើង បានរកយុត្តិធម៌ជូនដល់បណ្ដាវីរបុរសរបស់យើងដែលត្រូវស្លាប់និងរងរបួស ក្នុងការវាយប្រហារដ៏កំសាក ប្រឆាំងនាវា USS COLE។ យើងទើបនឹងសម្លាប់មេដឹកនាំនៃការវាយប្រហារនោះ ឈ្មោះJAMAL AL BADAOUI ។ យើងនឹងមិនបញ្ឈប់ដាច់ខាត ការប្រយុទ្ធរបស់យើងប្រឆាំងភេរវកម្មអ៊ិស្លាមនិយមរ៉ាឌីកាល់។
កាលពីថ្ងៃទី៤មករាទីបញ្ជាការកណ្ដាលកងទ័ពអាមេរិកគូសបញ្ជាក់ថា កងទ័ពបានធ្វើការវាយប្រហារយ៉ាងច្បាស់មួយ នាថ្ងៃទី១មករាក្នុងខេត្តម៉ារីបយេម៉ែន សំដៅគោលដៅជនឈ្មោះJAMAL AL BADAOUI។
ថ្ងៃទី១២តុលាឆ្នាំ២០០០កាណូតមួយគ្រឿងបើកដោយជនអត្តឃាត២នាក់ បានបំផ្ទុះប្រឆាំងនាវាពិឃាតUSS COLEពេលចូលចាក់ប្រេងនៅកំពង់ផែក្រុងអាដេន បណ្ដាលឲ្យធ្លាយចង្កេះនាវានោះ។ ការវាយប្រហារនេះបណ្ដាលឲ្យទាហានអាមេរិកស្លាប់១៧នាក់ ព្រមទាំងជនអត្តឃាតទាំង២នាក់ ហើយប្រកាសទទួលខុសត្រូវដោយប្រមុខអាល់កៃដា អូសាម៉ាប៊ីនឡាដេន៕
ចែករំលែកព័តមាននេះ