វៀតណាម ៖ ប៉ូ​លី​ស​វៀតណាម​បង្ក្រាប​ខ្សែបណ្តាញ​ផលិត និង​ចែកចាយ​ថ្នាំលាប​ពណ៌ រួម​ទាំង​ម្សៅ​បៀក​ជញ្ជាំង​ម៉ាក JOTUN ក្លែងក្លាយ​ក្នុង​ទ្រង់ទ្រាយ​ធំ​បំផុត​មិន​ធ្លាប់​មាន ។

នគរបាល​ស៊ើបអង្កេត​បទល្មើស​សេដ្ឋកិច្ច និង​បរិស្ថាន​នៃ​ស្នងការដ្ឋាន​នគរបាល​ក្រុង​ដា​ណាំង ប្រទេស​វៀតណាម បាន​ឆ្មក់​ចូល​បង្ក្រាប​ខ្សែបណ្តាញ​ផលិត និង​ជួញដូរ​ថ្នាំលាប​ពណ៌ រួម​នឹង​ម្សៅ​បៀក​ជញ្ជាំង​ក្លែងក្លាយ​ម៉ាក JOTUN ក្នុង​ទ្រង់ទ្រាយ​ធំ​បំផុត​មិន​ធ្លាប់​មាននៅ​ក្នុង​តំបន់ ។ នេះ​បើ​យោង​តាម​ការ​ចុះ​ផ្សាយ​របស់​ទីភ្នាក់ងារសារព័ត៌មាន រដ្ឋាភិបាល​វៀតណាម កាលពី​ថ្ងៃ​ទី​១០ ខែកុម្ភៈ ឆ្នាំ​២០២៦ ។

ប្រតិបត្តិការ​បង្ក្រាប​នេះ បាន​ធ្វើ​ឡើង​ក្រោយ​ទទួល​បាន​ពាក្យបណ្តឹង​ពី​ប្រជាពលរដ្ឋ និង​ក្រុមហ៊ុន​សំណង់​ជា​ច្រើន ដែល​បាន​កត់សម្គាល់​ឃើញ​វត្តមាន​ផលិតផល​ម៉ាក JOTUN ដាក់​លក់​ក្នុង​តម្លៃ​ថោក​ខុសធម្មតា ពោល គឺ​ថោក​ជាង​តម្លៃ​បោះ​ដុំ​របស់​តំណាង​ចែកចាយ​ស្របច្បាប់​ទៅ​ទៀត ដែល​នាំ​ឱ្យ​មាន​មន្ទិល​សង្ស័យ​ថា វា​អាច​ជា​ទំនិញ​ក្លែងក្លាយ និង​គ្មាន​គុណភាព​តាម​ស្តង់ដារ​បច្ចេកទេស ។

តាម​រយៈ​ការ​ស្រាវជ្រាវ​យ៉ាង​ច្បាស់លាស់ នគរបាល​បាន​កំណត់​មុខសញ្ញា គឺ​ក្រុមហ៊ុន​វិនិយោគ និង​ពាណិជ្ជកម្ម បាវ ង៉ុ​ក គ្លូ​ប៊​ល (Bao Ngoc Global)​។ អ្វី​ដែល​គួរ​ឱ្យ​ភ្ញាក់ផ្អើល ក្រុមហ៊ុន​នេះ មិនមែន​ជា​ភ្នាក់ងារ​ទទួល​បាន​សិទ្ធិ​ចែកចាយ​ពី​ក្រុមហ៊ុន JOTUN (​ប្រេ​ន​ដើម​ពី​ប្រទេស​ន័​រ​វែ​ស​) នោះ​ទេ ប៉ុន្តែ​បែរជា​មាន​លទ្ធភាព​ផ្គត់ផ្គង់​ទំនិញ​ក្លែងក្លាយ​ក្នុង​បរិមាណ​យ៉ាង​សន្ធឹកសន្ធាប់​ទៅ​កាន់​ទីផ្សារ ។

អាជ្ញាធរ បាន​កំណត់​អត្តសញ្ញាណ​មេខ្លោង​ជា​ប្តី​ប្រពន្ធ គឺ​ឈ្មោះ Lê Thái Bình និង​ភរិយា​ឈ្មោះ Mai Thị Thanh Sơn (​អាយុ​៤២​ឆ្នាំ​ដូច​គ្នា​) រួម​ជាមួយ​បុគ្គលិក​ដៃជើង​ម្នាក់​ឈ្មោះ Lê Thành Nhân ។

ក្រុម​ឈ្មួញ​ទុច្ចរិត​នេះ បាន​ប្រើប្រាស់​ល្បិច​កល​យ៉ាង​សាហាវ​ដូច​ជា ៖ បញ្ជា​ទិញ​សំបក​ធុង និង​កា​រ៉ុ​ង​ម្សៅ​បៀក ដែល​មាន​ម៉ាក JOTUN សុទ្ធ​ពី​បណ្តា​ខេត្ត​ភាគ​ខាងជើង ។ បិទ​តែម «QR Code» ក្លែងក្លាយ ដើម្បី​បោក​បញ្ឆោត​អ្នក​ប្រើប្រាស់​ឱ្យ​ជឿជាក់​លើ​ប្រភព​ដើម ។ យក​ថ្នាំលាប​ពណ៌ JOTUN សុទ្ធ ទៅ​លាយ​បញ្ចូល​គ្នា​ជាមួយ​ថ្នាំលាប​ថោក​ៗ​ប្រភេទ​ផ្សេង​ទៀត​តាម​រូបមន្ត​ផ្ទាល់ខ្លួន រួច​ច្រកចូល​ធុង បិទ​ជិត ធ្វើ​ឱ្យ​មើលទៅ​ដូច​ទំនិញ​ថ្មី​ចេះ ដើម្បី​ចែកចាយ​លើ​ទីផ្សារ ។

ជា​លទ្ធផល​នៃ​ប្រតិបត្តិការ កាលពី​ថ្ងៃ​ទី​៩ ខែកុម្ភៈ សមត្ថកិច្ច​បាន​ដកហូត​វត្ថុ​តាង​រួម​មាន ៖ ថ្នាំលាប និង​ម្សៅ​បៀក​ក្លែងក្លាយ ដែល​ផលិត​រួចរាល់​ជាង​៥ តោន​, សំបក​ធុង​, តែម​ម៉ាក​សញ្ញា និង​វត្ថុធាតុដើម​សម្រាប់​បម្រើ​ឱ្យ​ការ​ផលិត​ក្លែងក្លាយ​រាប់​ពាន់​មុខ​ផ្សេង​ទៀត ។

បច្ចុប្បន្ន មេខ្លោង​ជា​ប្តី​ត្រូវ​បាន​ឃាត់ខ្លួន រីឯ​ភរិយា និង​បុគ្គលិក ត្រូវ​បាន​ហាមឃាត់​មិន​ឱ្យ​ចាក​ចេញពី​លំនៅ​ឋាន ដើម្បី​រង់ចាំ​ការ​ស៊ើបអង្កេត​ពង្រីក​សំណុំរឿង​បន្ថែម ។

ជាមួយ​គ្នា​នេះ អាជ្ញាធរ​បាន​អំពាវនាវ​ដល់​ប្រជាពលរដ្ឋ និង​ក្រុមហ៊ុន​សំណង់ ត្រូវ​មានការ​ប្រុង​ប្រយ័ត្ន​ខ្ពស់ ដោយ​ជ្រើសរើស​ទិញ​ផលិតផល​ពី​ភ្នាក់ងារ​ដែល​មាន​អាជ្ញាប័ណ្ណ​ត្រឹមត្រូវ​។ ការ​ប្រើប្រាស់​ទំនិញ​ថោក​ខុសធម្មតា មិន​ត្រឹមតែ​ខាតបង់​ថវិកា ប៉ុន្តែ​អាច​ប៉ះពាល់​ធ្ងន់ធ្ងរ​ដល់​គុណភាព ភាព​ជាប់លាប់ និង​សុវត្ថិភាព​នៃ​សំណង់​អគារ​ទាំងមូល ៕