រាជធានីភ្នំពេញ ៖ នាយករដ្ឋមន្ត្រីថៃ លោកជំទាវ យីងឡាក់ ស៊ីណាវ៉ាត្រា និងនាយករដ្ឋមន្ត្រីឡាវលោក ថងស៊ីង ថាំម៉ាវង្ស ព្រមទាំងក្រុមគណៈប្រតិភូចលនាអាវក្រហមដឹកនាំដោយលោកស្រី ធិតា ថាវ៉នសេត បានធ្វើដំណើរមកដល់ព្រះរាជាណាចក្រកម្ពុជាបន្តបន្ទាប់គ្នា កាលពីរសៀលថ្ងៃទី១៦ កក្កដា ដើម្បីចូលរួមគោរពវិញ្ញាណក្ខន្ធអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង
រាជធានីភ្នំពេញ ៖ នាយករដ្ឋមន្ត្រីថៃ លោកជំទាវ យីងឡាក់ ស៊ីណាវ៉ាត្រា និងនាយករដ្ឋមន្ត្រីឡាវលោក ថងស៊ីង ថាំម៉ាវង្ស ព្រមទាំងក្រុមគណៈប្រតិភូចលនាអាវក្រហមដឹកនាំដោយលោកស្រី ធិតា ថាវ៉នសេត បានធ្វើដំណើរមកដល់ព្រះរាជាណាចក្រកម្ពុជាបន្តបន្ទាប់គ្នា កាលពីរសៀលថ្ងៃទី១៦ កក្កដា ដើម្បីចូលរួមគោរពវិញ្ញាណក្ខន្ធអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង បិតាបង្កើតសម្តេចតេជោ ហ៊ុន សែន ដែលបានទទួលមរណភាពកាលពីវេលាទៀបភ្លឺ ថ្ងៃទី១២ កក្កដា ដោយសារជរាពាធ ។
តាមព័ត៌មានឱ្យដឹងថា នាយករដ្ឋមន្ត្រីឡាវ លោក ថងស៊ីង ថាំម៉ាវង្ស និងគណៈប្រតិភូរបស់លោកបានអញ្ជើញមកដល់ព្រលានយន្តហោះអន្តរជាតិភ្នំពេញ កាលពីវេលាម៉ោង២និង២០នាទីរសៀល ។ ចំណែកនាយករដ្ឋមន្ត្រីថៃ លោកជំទាវ យីងឡាក់ ស៊ីណាវ៉ាត្រា និងគណៈប្រតិភូបានអញ្ជើញមកដល់នាម៉ោង២និង៣០នាទីរសៀល ។ ទោះបីជាយ៉ាងណា ក្បួនរថយន្តលោកជំទាវ យីងឡាក់ ស៊ីណាវ៉ាត្រា បានចាកចេញដំណើរពីព្រលានយន្តហោះមុននាយករដ្ឋមន្ត្រីឡាវ បន្ទាប់ពីបានឈប់សម្តែងការគួរសម ហើយបានធ្វើដំណើរទៅគោរពវិញ្ញាណក្ខន្ធអ្នកឧកញ៉ាមហាភក្តីសប្បុរិសភោគាធិបតិ ហ៊ុន នាង ជាបន្តបន្ទាប់គ្នា ។
ជាការកត់សម្គាល់ថា កាលពី២ថ្ងៃមុនអតីតនាយករដ្ឋមន្ត្រីថៃ គឺលោក ថាក់ស៊ីន ស៊ីណាវ៉ាត្រា ជាបងបង្កើតរបស់លោកជំទាវ យីងឡាក់ ក៏បានអញ្ជើញមកគោរពវិញ្ញាណក្ខន្ធអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង ផងដែរ ។
ដោយឡែក នៅវេលាម៉ោង២ និង៤៥នាទីរសៀល ថ្ងៃទី១៦ កក្កដា គណៈប្រតិភូក្រុមចលនាអាវក្រហមថៃ ប្រមាណជាង១០នាក់ដឹកនាំដោយលោកស្រី ធិតា ថាវ៉នសេត ជាប្រធានក៏បានធ្វើដំណើរមកដល់អាកាសយានដ្ឋានអន្តរជាតិភ្នំពេញ ក្នុងបំណងចូលរួមរំលែកមរណទុក្ខជាមួយសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងចូលរួមគោរពវិញ្ញាណក្ខន្ធអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង។ ក្នុងដំណើរមកដល់របស់ក្រុមចលនាអាវក្រហមថៃ ត្រូវបានទទួលការស្វាគមន៍យ៉ាងរាក់ទាក់ពីសំណាក់លោក ឃ្លាំង ហួត ជំនួយការសម្តេចតេជោ ហ៊ុន សែន ដល់អាកាសយានដ្ឋានអន្តរជាតិភ្នំពេញ ។ ទោះបីជាយ៉ាងណា បន្ទាប់ពីចូលរួមគោរពវិញ្ញាណក្ខន្ធសពអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង រួចមក នាយករដ្ឋមន្ត្រីនៃប្រទេសទាំងពីរ ព្រមទាំងក្រុមចលនាអាវក្រហម បានវិលត្រឡប់ទៅវិញនារសៀលថ្ងៃដដែលនោះផងដែរ។
គួរបញ្ជាក់ថា សពអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង នឹងត្រូវបានដង្ហែចេញពីភូមិគ្រឹះសម្តេចតេជោ ក្បែរវិមានឯករាជ្យ នៅថ្ងៃទី១៧ កក្កដា ដើម្បីទៅបញ្ចុះនៅវត្តព្រះបារមីវង្កដ្ឋបុរី ស្ថិតនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ ៕
ចែករំលែកព័តមាននេះ