ខេត្តព្រះសីហនុ ៖ នាវេលាម៉ោង០៩ និង៣០នាទីព្រឹកថ្ងៃទី៦ ខែមករា នៅចំណុចផ្លូវដែកឆ្លងកាត់ភូមិព្រែកទាល់ ឃុំទឹកថ្លា ស្រុកព្រៃនប់ មានករណីគ្រោះថ្នាក់មួយកើតឡើង រវាងរថយន្តបែន១គ្រឿងម៉ាកហុីយ៉ាន់ដាយ ពណ៌.ស គ្មានផ្លាកលេខ ត្រូវរថភ្លើងបុកខ្ទេចកាប៊ីនមុខ តែមិបណ្តាលឱ្យអ្នកបើកបររថយន្តរងរបួសទេ ហើយក្រោយកើតហេតុបានរត់គេចខ្លួនបាត់ ដោយទុកខ្មោចរថយន្តនៅកន្លែងកើតហេតុ ។
តាមប្រភពព័ត៌មានឲ្យដឹងថា មុនពេលកើតហេតុគេឃើញរថយន្តបែន បើកឆ្លងផ្លូវដែកដែលកាត់ផ្លូវលំ ។ ខណៈនោះរថភ្លើងមកដល់ល្មម ក៏បុកចំកាប៊ីនរថយន្តតែម្ដង បណ្តាលឱ្យខ្ទាតចេញពីផ្លូវដែកទទួលរងខូចខាតធ្ងន់ គឺខ្ទេចមុខរយះរយាយទាំងស្រុងមើលទៅគួរឱ្យរន្ធត់មែនទែន ។ រីឯរថភ្លើងខូចខាតធ្លាយធុងប្រេងម៉ាស៊ូត ។
ក្រោយកើតហេតុ រថយន្តត្រូវបានសមត្ថកិច្ចយកទៅរក្សាទុកបណ្ដោះអាសន្ននៅអធិការដ្ឋាននគរបាលស្រុកព្រៃនប់ ។ ចំណែករថភ្លើងបានបន្តដំណើរ ឆ្ពោះទៅរាជធានីភ្នំពេញបាត់ទៅ ។ ក្នុងភូមិសាស្ត្រស្រុកព្រៃនប់ ផ្លូវដែកឆ្លងកាត់តាមភូមិនានា សម្បូរទៅដោយផ្លូវលំឆ្លងកាត់ ដែលបញ្ហានេះ ការបុកប៉ះអាចនឹងកើតឡើង ប្រសិនបើអ្នកបើកបររថយន្តធ្វេសប្រហែសឬ ប្រសិនបើមានការបំពានផ្លូវដែក ដោយមិនមើលឆ្វេងស្តាំជាមុន ដូចករណីខាងលើនេះជាដើម ព្រោះទីនោះស្រឡះល្វឹង អាចមើលផ្លូវដែកទៅទីឆ្ងាយបាន ហេតុអីមិនឃើញរថភ្លើងមកដល់ ?
ចែករំលែកព័តមាននេះ