ខេត្តសៀមរាប៖ ស្នងការដ្ឋាននគរបាលខេត្តសៀមរាបបំភ្លឺថា មូលហេតុដែលរថយន្តVigo របស់ស្នងការបើកឆ្លងភ្លើងក្រហមទៅបុកម៉ូតូ បណ្ដាលឱ្យយុវជនម្នាក់ស្លាប់នោះ គឺកំពុងបំពេញប្រតិបត្តិតាមចាប់ជនជាតិចិនកាន់កាប់ និងប្រើប្រាស់អាវុធខុសច្បាប់ ។ នៅថ្ងៃទី០៣ ខែកញ្ញា…
ខេត្តសៀមរាប៖ ស្នងការដ្ឋាននគរបាលខេត្តសៀមរាបបំភ្លឺថា មូលហេតុដែលរថយន្តVigo របស់ស្នងការបើកឆ្លងភ្លើងក្រហមទៅបុកម៉ូតូ បណ្ដាលឱ្យយុវជនម្នាក់ស្លាប់នោះ គឺកំពុងបំពេញប្រតិបត្តិតាមចាប់ជនជាតិចិនកាន់កាប់ និងប្រើប្រាស់អាវុធខុសច្បាប់ ។
នៅថ្ងៃទី០៣ ខែកញ្ញា ឆ្នាំ២០២៥ ស្នងការដ្ឋាននគរបាលខេត្តសៀមរាប បានចេញសេចក្តីបំភ្លឺព័ត៌មានឆ្លើយតបទៅនឹងការផ្សព្វផ្សាយក្នុងខ្លឹមសារថា «កាលពីយប់ថ្ងៃទី២ ខែកញ្ញា ឆ្នាំ២០២៥ នេះមានបណ្តាញសារព័ត៌មាន និងបណ្តាញសង្គមមួយចំនួនបានផ្សព្វផ្សាយថា «ឡានអន្តរាគមន៍តម្រួតបទបញ្ជានៃស្នងការដ្ឋាននគរបាលខេត្តសៀមរាប បានបើកបំពានភ្លើងស្តុប មកបុកម៉ូតូយ៉ាងពេញទំហឹង បណ្តាលឱ្យយុវជនម្នាក់ស្លាប់ភ្លាមៗនៅនឹងទីតាំងកន្លែងកើតេហតុ(ព័ត៌មានបឋម)»។
ពាក់ព័ន្ធនឹងករណីនេះ ក្រុមការងារប្រតិកម្មរហ័ស និងជាអ្នកនាំពាក្យស្នងការដ្ឋាននគរបាលខេត្តសៀមរាប បានចេញមកបំភ្លឺជូនសាធារណជន ដោយរៀបរាប់លម្អិតយ៉ាងដូច្នេះថា «នៅវេលាម៉ោង ២១:៤០នាទី ថ្ងៃទី២ ខែកញ្ញា ឆ្នាំ២០២៥ លើផ្លូវជាតិលេខ៦ ត្រង់ចំណុច ស្តុបឈ្នះឈ្នះ ស្ថិតនៅភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប ពិតជាមានករណីគ្រោះថ្នាក់ចរាចរណ៍កើតឡើង រវាងម៉ូតូម៉ាកហុងដាឌ្រីម ពណ៌ខ្មៅ ផ្លាកលេខ សៀមរាប 1AA 4589 បើកបរទិសដៅពីត្បូងទៅជើង មកប៉ះជាមួយ រថយន្តម៉ាក TOYOTA Vigo ពណ៌ខ្មៅ ផ្លាកលេខ នគរបាល 2-0428 បើកបរទិសដៅពីលិចទៅកើត (ចេញពីស្នងការដ្ឋាននគរបាលខេត្ត) បណ្តាលឱ្យអ្នកបើកបរម៉ូតូបានស្លាប់នៅនឹងកន្លែងកើតហេតុប្រាដកមែន ។
ក្រុមការងារប្រតិកម្មរហ័សនៃស្នងការដ្ឋាននគរបាលខេត្តសៀមរាប បន្ថែមទៀតថា ដោយរថយន្តម៉ាក TOYOTA Vigo ពណ៌ខ្មៅ ផ្លាកលេខ នគរបាល 2-0428 ជារថយន្តរបស់ការិយាល័យ អន្តរាគមន៍ និងតម្រួតបទបញ្ជា នៃស្នងការដ្ឋាននគរបាលខេត្តសៀមរាប កំពុងចុះប្រតិបត្តិការបង្ក្រាបបទល្មើសជាក់ស្តែង (ករណីជនជាតិចិនកាន់កាប់ និងប្រើប្រាស់អាវុធខុសច្បាប់) នៅសង្កាត់សាលាកំរើក ក្រុងសៀមរាប ព្រមទាំង មានបើកភ្លើងសញ្ញាអាទិភាពនៅពីលើរថយន្ត។ ចំពោះករណីគ្រោះថ្នាក់ចរាចរណ៍នេះ ត្រូវអ្នកនាំពាក្យអះអាងដោយសង្កត់ធ្ងន់ថា ស្នងការដ្ឋាននគរបាលខេត្តសៀមរាប កំពុងឱ្យការិយាល័យនគរបាល ចរាចរណ៍ផ្លូវគោកធ្វើការស្រាវជ្រាវ និងចាត់ការតាមនីតិវិធីច្បាប់ ។
យោងតាមប្រភពពីផេកស្នងការដ្ឋាននគរបាលខេត្តសៀមរាប ក៏បានបង្ហាញមុខជនសង្ស័យជាជនជាតិចិនចំនួន២រូប ដែលត្រូវបានឃាត់ខ្លួន ពីបទកាន់កាប់ និងប្រើប្រាស់អាវុធខុសច្បាប់ ដោយបញ្ជាក់ថា នៅយប់ថ្ងៃទី២ ខែកញ្ញា ឆ្នាំ២០២៥ វេលាម៉ោងប្រហែល២០:៤០នាទី មានជនសង្ស័យម្នាក់ ភេទប្រុស ជនជាតិចិន ក្នុងស្ថានភាពស្រវឹងស្រា បានធ្វើសកម្មភាពដើរចូលទៅក្នុងបរិវេណលំនៅឋានរបស់ប្រជាពលរដ្ឋមួយកន្លែង ដែលស្ថិតនៅក្នុងភូមិសាលាកំរើក សង្កាត់សាលាកំរើក ក្រុងសៀមរាប ខេត្តសៀមរាប ដោយក្នុងដៃមានកាន់កាំភ្លើងខ្លី ០១ដើម មិនស្គាល់ម៉ាក ដោះបង់កាំភ្លើងចេញមកបង្ហាញ ហើយក៍ដើរចេញទៅវិញ បន្ទាប់មកពេលដែលប្រជាពលរដ្ឋហៅសួរនាំ ជនសង្ស័យបានបោះកាំភ្លើងនោះចោលទៅលើផ្លូវបេតុង ភ្លាមនោះប្រជាពលរដ្ឋក៍បាននាំគ្នាចូលទៅឃាត់ជនសង្ស័យ និងរាយការណ៍ជូនសមត្ថកិច្ចចុះអន្តរាគមន៍។
ក្រោយទទួលបានព័ត៌មាននេះភ្លាម លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប បានចាត់កម្លាំងអន្តរាគមន៍ និងតម្រួតបទបញ្ជា សហការណ៍ជាមួយ កម្លាំងនៃអធិការដ្ឋាននគរបាលក្រុងសៀមរាប ចុះដល់ត្រួតពិនិត្យភ្លាម និងធ្វើការឃាត់ខ្លួនជនសង្ស័យ ឈ្មោះ LIU YUNYOU ភេទប្រុស កើតថ្ងៃទី០៣.០៤.២០០៣ ជនជាតិចិន កាន់លិខិតឆ្លងដែនលេខEK៥៣៩០៤០៧ រួមទាំងអាវុធខ្លីចំនួន ០១ដើម ម៉ាកSIG SAUER P365 គ្រាប់ចំនួន ០៥គ្រាប់ ក្នុងនោះដែលកម្លាំងសមត្ថកិច្ចយើងបានបន្តការស្រាវជ្រាវ រហូតឈានដល់ការឃាត់ខ្លួនបក្ខពួកជនសង្ស័យម្នាក់ទៀតឈ្មោះ LI JIAN AN ភេទប្រុស កើតថ្ងៃទី០២.០៩.២០០៣ ជនជាតិចិន ក្នុងពេលដែលជនសង្ស័យរូបនេះកំពុងស្នាក់នៅក្នុងផ្ទះជួលលេខ១០១១ បុរីលុចនីដា ដែលស្ថិតនៅភូមិសាលាកំរើក សង្កាត់សាលាកំរើក ក្រុងសៀមរាប ខេត្តសៀមរាប។ បច្ចុប្បន្នជនសង្ស័យរួមទាំងវត្ថុតាងខាងលើ ត្រូវបាននាំខ្លួនមកកាន់ការិយាល័យជំនាញ នៃស្នងការដ្ឋាននគរបាលខេត្តសៀមរាប ដើម្បីកសាងសំណុំរឿងចាត់ការតាមនីតិវិធីច្បាប់៕
ចែករំលែកព័តមាននេះ