ខេត្តព្រៃវែង ៖ ជាការកត់សម្គាល់ ផលិតផលកសិកម្មរបស់កសិករស្ទើរគ្រប់ប្រភេទ កាលពីឆ្នាំ២០១៨ដែលទើបតែកន្លងផុតនេះ មានទាំងទីផ្សារ និងតម្លៃខ្ពស់ ធ្វើឲ្យកសិករមានទឹកចិត្តសប្បាយរីករាយគ្រប់គ្នា ដោយពុំមានបាតុភាពណាមួយកើនឡើងឡើយ ហើយពេលនេះ កំពុងបង្កើនការដាំដុះ ដោយរំពឹងថា ឆ្នាំថ្មីនេះ នឹងកាន់តែល្អប្រសើរថែមទៀត ។
ស្រុកស្វាយអន្ទរ ខេត្តព្រៃវែង គឺជាតំបន់ដែលអំណោយផលខ្ពស់ទៅលើដំណាំអំពៅ ដែលកសិករភាគច្រើនចាប់យកដំណាំនេះធ្វើជាមុខរបរស្នូលក្នុងការរកចំណូលទ្រទ្រង់សេដ្ឋកិច្ចគ្រួសារ ។
បើតាមការបញ្ជាក់ពីកសិករដាំអំពៅនៅតំបន់នេះ បានឲ្យដឹងថា ដោយសារតែអំពៅកំពុងមានទីផ្សារខ្ពស់ និងតម្លៃល្អប្រសើរផងនោះ ពេលនេះកសិករកំពុងតែមមាញឹកក្នុងការដាំដុះឡើងវិញ ដោយរំពឹងថា ឆ្នាំថ្មីនេះនឹងកាន់តែល្អប្រសើរថែមទៀត ។
លោក ភាន គឿន ជាកសិករដាំអំពៅនៅភូមិឃុំជាខ្លា ស្រុកស្វាយអន្ទរ បានប្រាប់កោះសន្តិភាពថា ក្នុងឆ្នាំ២០១៨ ដំណាំអំពៅទទួលបានទិន្នផលខ្ពស់ ហើយតម្លៃវិញ ក៏ថ្លៃគួរសមអាចទទួលយកបានដែរ ។ មិនតែប៉ុណ្ណោះ ឈ្មួញក៏មិនសាំញ៉ាំច្រើន ដោយមកទិញដល់កន្លែង ដឹកតាមរថយន្ដយកទៅលក់នៅភ្នំពេញតែម្តង ។ លោកបានបញ្ជាក់ថា ៖« ជាទូទៅ ដំណាំអំពៅនេះ យើងចាប់ផ្តើមបណ្ដុះពូជនៅដើមខែតុលា ដោយប្រើរយៈពេលជាង២ខែ ពេលអំពៅលូតលាស់ល្អអាចដាំបានហើយ ទើបយើងយកមកដាំដុះ ពិសេសគឺនៅចុងខែឆ្នូតែម្តង »។ លោកថា ៖« ជាធម្មតា ក្នុងដី១ហិកតា យើងអាចដាំអំពៅបានពី៦ម៉ឺនទៅ៦ម៉ឺន៥ពាន់ដើម ដោយប្រើរយៈពេលចន្លោះពី៧ទៅ៨ខែ ទើបអាចប្រមូលផលអំពៅបាន »។ លោកបន្ថែមថា ៖« ក្នុងឆ្នាំ២០១៨ អំពៅ១ដើម លក់តម្លៃចន្លោះពី៦០០ទៅ៧០០រៀល បើធៀបនឹងឆ្នាំ២០១៧មុន តម្លៃតែ៤០០ទៅ៥៥០រៀលប៉ុណ្ណោះ ធ្វើឲ្យកសិករដាំដុះដំណាំនេះ មានទឹកចិត្តសប្បាយរីករាយគ្រប់គ្នា ពិសេសគឺនាំគ្នាបន្តដាំកាន់តែច្រើន ដោយរំពឹងថា ឆ្នាំក្រោយ អាចនឹងបានថ្លៃដូចឆ្នាំនេះទៀត »។
លោក ភាន គឿន ដែលមានបទពិសោធន៍រាប់សិបឆ្នាំក្នុងការដាំដុះដំណាំនេះ បានឲ្យដឹងទៀតថា អំពៅជាដំណាំកសិ-ឧស្សាហកម្មមួយដែលត្រូវចំណាយដើមទុនខ្ពស់ និងមើលថែដិតដល់ ទើបទទួលបានទិន្នផលល្អ ។ អ្នកឯកទេសរូបនេះមានប្រសាសន៍ថា ៖« ជាទូទៅ អំពៅក្នុង១ហិកតា យើងចំណាយចន្លោះពី១០លាន ទៅ១៥លានរៀល ទៅលើថ្លៃថ្នាំសង្កូវ ជី និងកម្មករដាំដុះ រហូតដល់ពេលប្រមូលផល »។ លោកបន្ថែមថា ៖« ប្រសិនបើឆ្នាំណាដែលអំពៅចុះថោក ក្នុង១ហិកតា យើងអាចលក់បានប្រមាណ២៥លានរៀល តែបើអំពៅបានថ្លៃ អាចលក់បានពី២៨ទៅ៣០លានរៀល ហើយបើទូទាត់កាត់ថ្លៃដើមចេញ យើងអាចចំណេញពី១០ទៅ១៥លានរៀលក្នុងការប្រមូលផលម្ដង »។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តព្រៃវែង លោក អ៊ុក សំណាង បានឲ្យដឹងដែរថា នៅទូទាំងខេត្តព្រៃវែង មានកសិករប្រកបមុខរបរដាំអំពៅសរុបប្រមាណជាង៣០០គ្រួសារ លើផ្ទះដីជាង៥០០ហិកតា ក្នុងនោះស្រុកស្វាយអន្ទរមានអ្នកដាំច្រើនជាងគេ ។ លោកបន្ថែមថា ៖« ចំណែកនៅស្រុកបាភ្នំ និងស្រុកព្រះស្តេច ក៏មានអ្នកដាំដែរ ប៉ុន្តែក្នុងទ្រង់ទ្រាយតូចជាលក្ខណៈគ្រួសារប៉ុណ្ណោះ ។ រីឯនៅតាមបណ្តាស្រុកមួយចំនួនទៀត ក៏កំពុងចាប់ផ្តើមសាកល្បងដាំជាលក្ខណៈគ្រួសារខ្លះៗដែរ ព្រោះដំណាំនេះបច្ចុប្បន្នមានទីផ្សារ និងតម្លៃល្អ »។
មន្ត្រីជាន់ខ្ពស់នៃរាជរដ្ឋាភិបាលកម្ពុជា បានសន្យាកាលពីពេលថ្មីៗនេះថា ក្នុងឆ្នាំ២០១៩នេះ នឹងប្ដេជ្ញាការពារទប់ស្កាត់មិនឲ្យតម្លៃកសិផលរបស់ប្រជាកសិករធ្លាក់ចុះឡើយ ហើយសន្យាថា នឹងអនុវត្តឲ្យបានម៉ឺងម៉ាត់នូវគោលនយោបាយរបស់រាជរដ្ឋាភិបាលកម្ពុជា ក្នុងការរក្សាតម្លៃកសិផល និងផលិតផលក្នុងស្រុកដទៃទៀត ។
លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ក្នុងឆ្នាំ២០១៩នេះ លោកនឹងជំរុញឲ្យមន្ត្រីពាក់ព័ន្ធទាំងអស់ត្រូវបន្តអនុវត្តឲ្យបាននូវគោលនយោបាយរបស់រដ្ឋាភិបាលកម្ពុជា ដូចជា ធានានូវតម្លៃកសិផលរបស់ប្រជាកសិករដែលផលិតបាន ដូច្នេះកសិករដែលផលិតបានហើយ នឹងមិនមានការព្រួយបារម្ភពីការធ្លាក់ចុះនៃតម្លៃកសិផលទៀតឡើយ ហើយចំណុចទាំងនេះមានសារសំខាន់ណាស់ក្នុងការគ្រប់គ្រងស្ថានភាពសេដ្ឋកិច្ច ៕
ចែករំលែកព័តមាននេះ