រាជធានីភ្នំពេញ ៖ សពបុរសម្នាក់ជាជនជាតិអ៊ុយក្រែនត្រូវបានគេប្រទះឃើញដេកស្លាប់នៅក្នុងថ្លុកឈាមលើចិញ្ចើមផ្លូវយ៉ាង អាណោចអាធ័ម ពេលជិះម៉ូតូចេញពីកន្លែងធ្វើការនៅហាងបារាំងមួយកន្លែង លុះពេលជិះម៉ូតូត្រឡប់ទៅផ្ទះវិញ ស្រាប់តែជួបគ្រោះថ្នាក់ចរាចរណ៍តាមផ្លូវ បណ្តាលឱ្យដួលបោកក្បាលស្លាប់នៅនឹងកន្លែង ហើយម៉ូតូ និងទ្រព្យសម្បត្តិមួយចំនួនត្រូវបានជនឆ្លៀតឱកាសលួចយកបាត់អស់គ្មានសល់ ។

ហេតុការណ៍នេះដែរបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៥និង៣០នាទីទៀបភ្លឺថ្ងៃទី១ ខែ មករា ឆ្នាំ២០១៩ នៅចំណុចមុខផ្ទះលេខ៩២ ផ្លូវលេខ ២៤០ ក្នុងសង្កាត់ចតុមុខ ខណ្ឌដូនពេញ។

តាមប្រភពព័ត៌មានពីនគរបាលបានឱ្យដឹងថា ជនរងគ្រោះដែលស្លាប់ឈ្មោះ TYMUR DMYTRIYENKO ភេទប្រុស អាយុ៣៥ឆ្នាំ មុខរបរបុគ្គលិកហាង Le Bouch Wine Bar ដែលមានទីតាំងនៅក្នុងសង្កាត់ផ្សារថ្មីទី៣ ខណ្ឌដូនពេញ កាន់លិខិតឆ្លងដែនលេខ PU256878 ស្នាក់នៅមិនពិតប្រាកដ។

តាមប្រភពព័ត៌មានបានឱ្យដឹងថា មុនពេលកើតហេតុ ដោយមានការរាយការណ៍ពីបុរសជាសន្តិសុខម្នាក់ដែលយាមនៅផ្ទះខាងលើមកថា បានប្រទះឃើញបុរសជាជនបរទេសម្នាក់ដេកស្លាប់ក្នុងថ្លុកឈាមនៅលើចិញ្ចើមផ្លូវខាងមុខផ្ទះខាងលើនោះ កម្លាំងសមត្ថកិច្ចក៏បានចុះទៅដល់កន្លែងកើតហេតុភ្លាមៗផងដែរ។

តាមប្រភពដដែលបានប្រាប់បន្តទៀតថា ពេលដែលកម្លាំងសមត្ថកិច្ចចុះទៅដល់កន្លែងកើតហេតុក៏បានប្រទះឃើញសពបុរសជាជនបរទេសម្នាក់ដេកស្លាប់នៅលើចិញ្ចើមផ្លូវពិតប្រាកដមែន ទើបឈានទៅធ្វើការត្រួតពិនិត្យ និងស្រាវជ្រាវឆែកកាមេរ៉ាសុវត្ថិ ភាព ដើម្បីអោយដឹងពីមូលហេតុផងដេរ។
តាមរយៈកាមេរ៉ាសុវត្ថិភាពបានបញ្ជាក់ថា មុនពេលកើតហេតុ បុរសជាជនបរទេសរងគ្រោះបានជិះម៉ូតូមិនស្គាល់ម៉ាកមួយគ្រឿងតែម្នាក់ឯង ដោយមានទ្រព្យសម្បត្តិមួយចំនួនជាប់នឹងខ្លួនផងដែរ ហើយធ្វើដំណើរតាមបណ្តោយផ្លូវលេខ ២៤០ ក្នុងទិសដៅពីលិចទៅកើតទំនងជាទើបចេញពីកន្លែងធ្វើការ និងជិះម៉ូតូត្រឡប់ទៅកន្លែងស្នាក់នៅរបស់គាត់វិញ។ លុះពេលបុរសជនបរទេសរងគ្រោះខាងលើជិះម៉ូតូតាមផ្លូវមកដល់ចំណុចកើតហេតុ ស្រាប់តែដួលខ្ទាតចេញពីម៉ូតូបោកក្បាលទៅលើចិញ្ចើមផ្លូវ បណ្តាលឱ្យស្លាប់នៅក្នុងថ្លុកឈាមភ្លាមៗតែម្តង។
ក្រោយពេលបុរសជាជនបរទេសដួលបោកក្បាលស្លាប់ហើយនោះ ម៉ូតូរបស់បុរសជាជនបរទេសជនរងគ្រោះ រួមទាំងទ្រព្យសម្បត្តិរបស់គាត់មួយចំនួនទៀត ត្រូវបានក្រុមជនឆ្លៀតឱកាសមកលួចយកបាត់អស់គ្មានសល់ ដោយបន្សល់ទុកតែមួកសុវត្ថិភាពមួយនៅក្បែរសពតែប៉ុណ្ណោះ។
ក្រោយពេលកើតហេតុ កម្លាំងសមត្ថកិច្ចមូលដ្ឋាន និងកម្លាំងជំនាញរបស់ការិយាល័យកោសល្យវិច្ច័យរាជធានីភ្នំពេញ បានរកឃើញថា បុរសជាជនបរទេសរងគ្រោះខាងលើបានស្លាប់ដោយសារប៉ះទង្គិចត្រង់ក្បាលធ្ងន់ធ្ងរ និងជាករណីគ្រោះថ្នាក់ចរាចរណ៍ ទើបសមត្ថកិច្ចដឹកយកសពទៅតម្កល់ទុកនៅមន្ទីរពេទ្យមិត្តភាពខ្មែរ សូវៀត ដើម្បីរង់ចាំក្រុម គ្រួសារមកទទួលយកទៅកាន់ប្រទេសកំណើតវិញផងដែរ ៕
ចែករំលែកព័តមាននេះ