ខេត្តក្រចេះ ៖ បុរសជាប្តីដៃដល់ម្នាក់ដែលបានធ្វើសកម្មភាពវាយដំលើប្រពន្ធយ៉ាងចាស់ ដៃរហូតដល់ស្លាប់ក៏ព្រោះតែខឹងនឹងស្ត្រីជាប្រពន្ធដែលស្រវឹងស្រា និងបានជេម្តាយជនដៃដល់ជាប្តីយ៉ាងកប់ៗមាត់ ត្រូវបាននគរបាលឃាត់ខ្លួនពីបទហិង្សាដោយចេតនា មានស្ថានទំងន់ទោស ។
ករណីអំពើហិង្សារវាងជនដៃដល់ជាប្តីជាមួយនឹងស្ត្រីជាប្រពន្ធត្រូវបានអ្នកភូមិនិយាយថា តែងតែកើតមានជាញឹកញាប់នៅពេលដែលគ្រួសារនេះផឹកស្រាស្រវឹងរៀងខ្លួនម្តងៗ តែយ៉ាងណាការប្រើអំពើហិង្សារហូតដល់ប្រពន្ធស្លាប់ពីសំណាក់បុរសដៃដល់ជាប្តីនេះបានកើតមានជាលើកចុងក្រោយកាលពីយប់ថ្ងៃទី៣០ ខែធ្នូ ឆ្នាំ២០១៨ នៅពេលដែលប្តីក៏ស្រវឹងស្រាហើយប្រពន្ធក៏ស្រវឹងស្រាដូចគ្នា ។
នាយផ្នែកនគរបាលព្រហ្មទណ្ឌស្រុកចិត្របុរីលោក ហេង ប៊ុនធឿន បានឲ្យដឹងថា ជនដៃដល់ជាប្តីត្រូវបានកម្លាំងនគរបាលស្រុកចុះទៅចាប់ខ្លួនក្រោយបង្កហេតុបានមួយថ្ងៃ ជនសង្ស័យដៃដល់ឈ្មោះ ស៊ន ឡា អាយុ៥២ឆ្នាំ ចំណែកឯស្ត្រីជាប្រពន្ធឈ្មោះ សុខ ឌឿ អាយុ៤៩ឆ្នាំ ។ គ្រួសារជនរងគ្រោះមានកូន៤នាក់ ស្រី២នាក់ ហើយសព្វថ្ងៃស្នាក់នៅរោងស្រែដាច់ស្រយ៉ាលពីឃុំថ្មី ស្រុកចិត្របុរី ។
លោកនាយផ្នែកបានស្រង់ចម្លើយសារភាពរបស់ជនសង្ស័យដៃដល់ជាប្តីរូបនេះថា នៅយប់ថ្ងៃទី៣០ ខែធ្នូ ឆ្នាំ២០១៨ នៅពេលប្រពន្ធស្រវឹងស្រាខ្លួនបានដាំបបរ និងបានហៅប្រពន្ធឲ្យងើបហូបបបរ តែក្រោយពីប្រពន្ធងើបក៏ជេម្តាយរូបគេពេញៗមាត់ ។
ក្រោយកើតការខឹងសម្បារបុរសដៃដល់រូបនេះបានវាយលើប្រពន្ធពីដៃចំកញ្ចឹង.កបណ្តាលឲ្យស្ត្រីរងគ្រោះបោកក្បាលនៅនឹងថ្មចង្ក្រាន បន្ទាប់មករូបគេក៏បានក្រៀស្ត្រីជាប្រពន្ធឲ្យមកដេកតែបានស្លាប់នៅពេលពាក់កណ្តាលយប់ ។
នគរបាលស្រុកចិត្របុរី បានឲ្យដឹងទៀតថា ស្ត្រីរងគ្រោះជាប្រពន្ធបានរងរបួសលើរាងកាយ ផ្ទៃមុខ និងកញ្ចឹងក ៕
ចែករំលែកព័តមាននេះ