កម្ពុជាជាប្រទេស ដែលមានប្រជាជនរួសរាយរាក់ទាក់ បំផុត
- ភ្នំពេញ
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងក្នុងពិធីប្រគល់ជ័យលាភីបដិសណ្ឋារកិច្ចល្អ ក្នុងវិស័យទេសចរណ៍លើកទី១ ឆ្នាំ២០១៨ កាលពីពេលកន្លងមកថា…
រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងក្នុងពិធីប្រគល់ជ័យលាភីបដិសណ្ឋារកិច្ចល្អ ក្នុងវិស័យទេសចរណ៍លើកទី១ ឆ្នាំ២០១៨ កាលពីពេលកន្លងមកថា យោងតាមទស្សនាវដ្ដី Rough Guides គឺជាស្ថាប័នបោះពុម្ពផ្សាយនៅឆ្នាំ២០១៦ អំពីការធ្វើដំណើរទេសចរណ៍ដ៏ឈានមុខគេមួយនៅក្នុងក្នុងពិភពលោក បានបញ្ជាក់ថា « កម្ពុជាជាប្រទេសដែលមានប្រជាជនរួសរាយរាក់ទាក់បំផុតទី១ ក្នុងចំណោមប្រទេសមានប្រជាជនរួសរាយរាក់ទាក់ជាងគេទាំង១០ក្នុងពិភពលោក »។
ជាមួយនឹងការទទួលបាននូវកិត្តិនាមល្បីល្បាញនេះ លោករដ្ឋមន្ត្រីបានស្នើឱ្យគ្រប់មូលដ្ឋានអាជីវកម្មទេសចរណ៍បង្កើនការបណ្ដុះបណ្ដាលបដិសណ្ឋារកិច្ចល្អ ក្នុងវិស័យទេសចរណ៍ ដល់បុគ្គលិកឱ្យកាន់តែទូលំទូលាយទៅតាមកម្មវិធីសិក្សា (Curriculum) បដិសណ្ឋារកិច្ចល្អក្នុងវិស័យទេសចរណ៍ ដែលក្រសួងទេសចរណ៍បានដាក់ចេញ និងស្នើឱ្យមានការប្រឡងប្រណាំងផ្ទៃក្នុងដល់បុគ្គលិកតែម្ដង ដោយមូលដ្ឋានអាជីវកម្មជាអ្នកវាយតម្លៃដោយផ្ទាល់ ចំពោះការបម្រើសេវាបដិសណ្ឋារកិច្ចល្អរបស់បុគ្គលិកខ្លួនឯងដោយផ្ទាល់ ។
លោករដ្ឋមន្ត្រី បញ្ជាក់ថា ៖« តាមរយៈសមាគមក្នុងឧស្សាហកម្មទេសចរណ៍ តាមវិស័យនីមួយៗ នឹងជម្រុះបុគ្គលិកឆ្នើមៗរួចផ្ញើមកក្រសួងទេសចរណ៍ដើម្បីធ្វើការវាយតម្លៃនឹងទទួលស្គាល់បូកសរុបនៅកម្រិតថ្នាក់ជាតិជារៀងរាល់ឆ្នាំ »។ លោករដ្ឋមន្ដ្រីបានអំពាវនាវឱ្យបន្ដចូលរួមក្នុងចលនាប្រឡងប្រណាំង «ទីក្រុងស្អាត រមណីដ្ឋានស្អាត សេវាល្អ បដិសណ្ឋារកិច្ចល្អ» និងក៏បានលើកឡើងអំពីការអនុវត្តនូវស្ដង់ដានានាដែលកម្ពុជានិងអាស៊ានបានដាក់ចេញ ។ ជាងនេះទៅទៀត លោកក៏បានអំពាវនាវឱ្យគ្រប់ទីកន្លែងសាធារណៈទាំងអស់ ត្រូវតែស្អាត មានអនាម័យ និងគ្មានសំរាម ជាពិសេសសំរាមជាថង់ប្លាស្ទិក ។
លោករដ្ឋមន្ត្រី បានបន្ថែមថា ៖« ដើម្បីកម្ពុជាជាគោលដៅទសចរណ៍ ប្រកបដោយភាពទាក់ទាញ និងកក់ក្ដៅដល់ភ្ញៀវទេសចរ និងដើម្បីឆ្ពោះទៅព្រឹត្តការណ៍ SEA Game2023 ព្រមទាំងដើម្បីសម្រេចចក្ខុវិស័យរបស់ក្រសួងទេសចរណ៍ ក្នុងការទាក់ទាញទេសចរណ៍៧លាននាក់ក្នុងឆ្នាំ២០២០ និង១៥លាននាក់ ក្នុងឆ្នាំ២០៣០ យើងស្នើឱ្យគ្រប់ភាគីពាក់ព័ន្ធ ផ្នែកឯកជនបន្ដរួមគ្នាអនុវត្តទិសដៅយុទ្ធសាស្ដ្រសំខាន់២គឺ ភាពស្អាត និងបៃតង (Clean & Green) » ។
លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានថ្លែងថា សេវាបដិសណ្ឋារកិច្ចនៅកម្ពុជាពិតជាមានភាពល្អប្រសើរ ធៀបជាមួយបណ្តាប្រទេសនានានៅក្នុងតំបន់ ដោយសារសេវាកម្មរបស់យើងមានតម្លៃសមរម្យ ពិសេសភាពរួសរាយរាក់ទាក់របស់ប្រជាពលរដ្ឋខ្មែរ។ លោកជំទាវបន្តថា ជាមួយគ្នានេះការប្រកួតប្រជែងក្នុងវិស័យបដិសណ្ឋារកិច្ចបានកើនឡើង ប៉ុន្តែការប្រកួតកើនឡើងមានន័យថាវិស័យនេះកាន់តែរីកចម្រើន ។ លោកជំទាវមានប្រសាសន៍ថា ៖« នៅពេលការប្រកួតប្រជែងកើនឡើង នឹងធ្វើឲ្យគុណភាពប្រសើរឡើង ហើយអ្នកទទួលបានផលប្រយោជន៍គឺអតិថិជន »។
យោងតាមរបាយការណ៍ក្រសួងទេសចរណ៍បង្ហាញថា ក្នុងរយៈពេល១០ខែ ដើមឆ្នាំ២០១៨នេះ កម្ពុជាទទួលបានភ្ញៀវទេសចរបរទេសប្រមាណ៤,៨លាននាក់ គាំទ្រកំណើនសំខាន់ដោយភ្ញៀវទេសចរជនជាតិចិន ដែលមានរហូតដល់ជាង១,៦លាននាក់ ៕
ចែករំលែកព័តមាននេះ