រាជធានីភ្នំពេញ ៖ ប្រធានគណៈកម្មាធិការសិទ្ធិមនុស្សកម្ពុជា បានលើកឡើងថា ភាគរយតិចណាស់ ដែលអាចនឹងផ្ទុះអាវុធជាលើកទី៣ រវាងកម្ពុជា-ថៃ ហើយបើមានពិត ថៃនឹងខាតបង់កាន់តែខ្លាំង ។…
រាជធានីភ្នំពេញ ៖ ប្រធានគណៈកម្មាធិការសិទ្ធិមនុស្សកម្ពុជា បានលើកឡើងថា ភាគរយតិចណាស់ ដែលអាចនឹងផ្ទុះអាវុធជាលើកទី៣ រវាងកម្ពុជា-ថៃ ហើយបើមានពិត ថៃនឹងខាតបង់កាន់តែខ្លាំង ។
ឯកឧត្តម កែវ រ៉េ មី ប្រធានគណៈកម្មាធិការសិទ្ធិមនុស្សកម្ពុជា បានលើកឡើងតាមបណ្តាញសង្គម នៅថ្ងៃទី៥ ខែមករា ឆ្នាំ២០២៦ថា មានការជជែកគ្នាថា សង្គ្រាមលើកទី៣ រវាងថៃ និងកម្ពុជា អាចនឹងកើតមានឡើងជាថ្មីម្តងទៀតទេ ?
ឯកឧត្តមបានលើកឡើងថា ៖ សម្រាប់ការវិភាគរបស់ខ្ញុំ គឺភាគរយតិចណាស់ ដែលអាចនឹងផ្ទុះអាវុធជាលើកទី៣។ ពីព្រោះថាសង្គ្រាមធ្វើឲ្យថៃ ខាតបង់ច្រើនណាស់ ទាំងការចំណាយថវិកាធ្វើសង្គ្រាម សេដ្ឋកិច្ចធ្លាក់ខ្លាំង បើប្រៀបធៀបទៅនឹងកំណើតសេដ្ឋកិច្ច មុនពេលធ្វើសង្គ្រាមជាមួយកម្ពុជា។ ប្រជាជនថៃភាគច្រើន មិនចង់ឲ្យមានសង្គ្រាមទេ។ បើថៃ នៅតែបន្តសង្គ្រាមនោះថៃនឹងជួបការទទួលទណ្ឌកម្មការទូត រងសម្ពាធអន្តរជាតិ រងនូវបណ្តឹងជាច្រើន នៃការបំពានលើច្បាប់អន្តរជាតិ ច្បាប់សិទ្ធិមនុស្ស និងច្បាប់មនុស្សធម៌ ។
ឯកឧត្តម បន្ថែមថា ការបោះឆ្នោតកាន់តែខិតជិតមកដល់ បញ្ហាផ្ទៃក្នុង នៅក្នុងនយោបាយថៃ មានភាពចម្រូងចម្រាស ដែលចាំបាច់ត្រូវត្រៀមខ្លួនយកប្រៀបលើការបោះឆ្នោត ក្នុងខែ០២នេះ ។
ពាក់ព័ន្ធសមាជិកអាស៊ានវិញ ឯកឧត្តមបានលើកឡើងថា នៅក្នុងសហគមន៍អាស៊ាន មិនគាំទ្រ ឲ្យមានជម្លោះនៅក្នុងសមាជិកអាស៊ានខ្លួនឯង ។
ជាមួយគ្នានោះដែរ មេសិទ្ធិមនុស្សកម្ពុជា ក៏បានលើកឡើងថា ទោះបីជាថៃ កាន់កាប់ដីដោយខុសច្បាប់ បានមកពីការធ្វើសង្គ្រាមជាមួយកម្ពុជា ក៏ដោយ ក៏ថៃមិនអាចគ្រប់គ្រងដែនដីបានយូរនោះទេ ។
ឯកឧត្តម បានបញ្ជាក់ថា ជាសរុបសេចក្តីមក សង្គ្រាមលើកទី៣ អាចនឹងមិនកើតមានក្នុងរយៈពេលនេះបានទេ ៕
ចែករំលែកព័តមាននេះ