ADផ្ទាំងផ្សព្វផ្សាយពាណិជ្ជកម្ម

Picture

កើតឡើង​ដដែល​ៗ…​មហន្តរាយ​លើ​ផ្លូវដែក​ក្នុង​រាជធានី​ភ្នំពេញ

5 ឆ្នាំ មុន
  • ភ្នំពេញ

រាជធានី​ភ្នំពេញ ៖ បុរស​ម្នាក់​បើករថយន្ត​ដឹក​គ្រួសារ ​ក្នុង​បំណង​ទៅ​ឡើងផ្ទះ​ឪពុក​នៅ​ទី​រួម​ខេត្តស្វាយរៀង ត្រូវ​រថភ្លើង​បុក​ បណ្តាល​ឲ្យ​រង​របួសធ្ងន់​ម្នាក់ និង​ស្រាល​២​នាក់ ។ ចំណែកឯ​រថយន្ត​ដាច់​កង់​ម្ខាង​រង​ការ​ខូចខាត​យ៉ាងដំណំ ធ្វើ​ឲ្យ​មានការ​ភ្ញាក់ផ្អើល…

រាជធានី​ភ្នំពេញ ៖ បុរស​ម្នាក់​បើករថយន្ត​ដឹក​គ្រួសារ ​ក្នុង​បំណង​ទៅ​ឡើងផ្ទះ​ឪពុក​នៅ​ទី​រួម​ខេត្តស្វាយរៀង ត្រូវ​រថភ្លើង​បុក​ បណ្តាល​ឲ្យ​រង​របួសធ្ងន់​ម្នាក់ និង​ស្រាល​២​នាក់ ។ ចំណែកឯ​រថយន្ត​ដាច់​កង់​ម្ខាង​រង​ការ​ខូចខាត​យ៉ាងដំណំ ធ្វើ​ឲ្យ​មានការ​ភ្ញាក់ផ្អើល កាលពី​វេលា​ម៉ោង​១​និង​៤៧​នាទី រំលង​អធ្រាត្រ​ឈាន​ចូល​ថ្ងៃ​ទី​៣០ ខែធ្នូ នៅ​តាម​បណ្ដោយ​ផ្លូវ​បេតុង ភូមិ​សាមគ្គី​២ សង្កាត់​ត្រពាំង​ក្រសាំង ខណ្ឌ​ពោធិ៍​សែន​ជ័យ ។

រថយន្ត​ដែល​រថភ្លើង​បុក​នេះ​ម៉ាក​ឡិច​ស៊ី​សRX៣០០​ពណ៌​ស ពាក់​ស្លាក​លេខ​ភ្នំពេញ​២AG-៩៥៩១ បើកបរ​ក្នុង​ទិស​ដៅ​ពី​លិចទៅ​កើត ។ ចំណែកឯ​រថភ្លើង​បើកបរ​ក្នុង​ទិស​ដៅ​ពី​ត្បូង​ទៅ​ជើង​គឺ​ពី​ខេត្ត​ព្រះ​សីហ​នុ ចូល​មក​រាជធានី​ភ្នំពេញ ។អ្នកបើកបរ​រថយន្ត​ឈ្មោះ មី សុខ​ខន ភេទ​ប្រុស អាយុ​៤០​ឆ្នាំ ជា​អ្នក​រត់​កង់​បី ស្នាក់​នៅ​ភូមិ​ត្រពាំង​អណ្តូង សង្កាត់​ត្រពាំង​ក្រសាំង ខណ្ឌ​ពោធិ៍​សែន​ជ័យ ។ តាម​ប្រភព​ព័ត៌មាន​ស្ត្រី​ជា​ប្រពន្ធ​បាន​ឲ្យ​ដឹង​ថា នៅ​មុន​ពេល​កើតហេតុ ប្តី​របស់​គាត់​រួម​ទាំង​ក្រុម​គ្រួសារ​និង​បងប្អូន​បាន​នាំ​គ្នា​ទៅ​ឡើងផ្ទះ​ឪពុក​នៅ​ឯ​ទី​រួម​ខេត្តស្វាយរៀង ស្ថិត​នៅ​ភូមិ​អូរ​ដំរី ឃុំ​ពោធិ៍​រាជ្យ ស្រុក​ស្វាយ​ជ្រំ ខេត្តស្វាយរៀង​ក្នុង​នោះ​រថយន្ត​របស់​គាត់​ជិះ​គ្នា​១០​នាក់ រួម​ទាំង​ក្មេង​៣​នាក់​ក្នុង​ទិស​ដៅ​ពី​លិចទៅ​កើត ។

ប្រភព​ដដែល​បាន​បញ្ជាក់​ទៀត​ថា នៅ​មុន​ពេល​កើតហេតុ​គាត់​ភ្ញាក់​តាំងពី​យប់ ដោយ​មាន​រថយន្ត​រួម​ដំណើរ​ជាមួយ​គ្នា​ចំនួន​៣​គ្រឿង ។ លុះ​បើក​មក​ដល់​ចំណុច​កើតហេតុ​ជា​ចំណុច​ផ្លូវ​រថភ្លើង​ឆ្លងកាត់ តែ​មិន​មាន​បា រាស់​បិទផ្លូវ​ទេ ហើយ​មិនដឹង​ថា មាន​រថភ្លើង​បើក​ឆ្លងកាត់​ទេ បន្ទាប់​មក​រថយន្ត​របស់​គាត់​ឆ្លង​បាន​ពាក់ កណ្ដាល​ផ្លូវដែក​ក៏ ​ត្រូវ​រថភ្លើង​មក​ដល់​បុក​ពេញទំហឹង បណ្តាល​ឲ្យ​អូស​ជាង​១០​ម៉ែត្រ​និង​បណ្តាល​ឲ្យ​ដាច់​កង់​ម្ខាង ហើយ​ខ្ទាត​ចេញពី​ផ្លូវ​រថភ្លើង ។ ចំណែក​រថភ្លើង​បាន​បើក​ទៅ​បាត់​អត់​មាន​ឈប់​ទេ ។ ហេតុការណ៍​នេះ​បង្ក​ឲ្យ​រង​របួសធ្ងន់​បុរស​ម្នាក់​និង​ក្មេង​ៗ២​នាក់​របួសស្រាល ។ ម្ចាស់​រថយន្ត​មានការ​សោកស្ដាយ​យ៉ាង​ខ្លាំង​ដោយ​ឃើញ​រថយន្ត​របស់​គាត់​រង​ការ​ខូចខាត​យ៉ាងធ្ងន់ធ្ងរ​បែប​នេះ ។

ប្រភព​ពី​ម្ចាស់​រថយន្ត​បាន​បញ្ជាក់​ទៀត​ថា រថភ្លើង​ខាងលើ បើកបរ​ដោយ​មាន​ភ្លើង​បំភ្លឺ​ផ្លូវ​តិច​ៗ ហើយ​ពុំ​មាន​ស៊ី​ផ្លេ​ឡើយ ។ ទោះបីជា​បែប​នេះ​ក្តី មិន​មានការ​បកស្រាយ​បែប​ណា​ពី​ភាគី​ខ្សែ​រថភ្លើង​នោះ​ទេ ។បើ​តាម​ប្រភព​ព័ត៌មាន​ប្រជាពលរដ្ឋ​នៅ​កន្លែង​កើតហេតុ​បាន​ឲ្យ​ដឹង​ថា ជា​រៀងរាល់ថ្ងៃ​រថភ្លើង​បើក​ឆ្លងកាត់​ផ្លូវ​ខាងលើ តែង​មាន​ស៊ី​ផ្លេ​លាន់​ខ្លាំង​ៗ​រក​ដេក​ពុំ​បាន តែ​យប់​កើតហេតុ បែរជា​មិន​ឮ​ស៊ី​ផ្លេ​សោះ ហើយ​បែរជា​ឮលាន់​ដូច​រន្ទះ​គឺ​រថភ្លើង​បុក​រថយន្ត​ខាងលើ​ទៅ​វិញ ។

ក្រោយ​ពេល​កើតហេតុ ដោយ​ពុំ​មាន​តំណាង​ខាង​រថភ្លើង មក​ដោះស្រាយ​ហើយ​ខាង​រថយន្ត​រង​គ្រោះ​មិន​អស់ចិត្ត​នឹង​អ្នក​បើក​រថភ្លើង សង្ស័យ​អ្នកបើកបរ​រថភ្លើង​ដេក​លក់​ក៏​មិនដឹង បន្ទាប់​មក​ម្ចាស់​រថយន្ត​រង​គ្រោះ​បាន​ហៅ​រថយន្ត​ស្ទូច ដើម្បី​យក​ទៅ​ជួសជុល​ខ្លួនឯង​បាត់​ទៅ ។ ហេតុការណ៍​ខាងលើ​នេះ​ជា​មេរៀន​សម្រាប់​អ្នកបើកបរ​យានយន្ត​នានា​ពេល​តម្រូវ​ឆ្លងកាត់​ផ្លូវដែក​គប្បី​មើល​ឆ្វេង​ស្តាំ​ផង ។

ជិះ​ម៉ូតូ​ឆ្លង​ផ្លូវដែក​ត្រូវ​រថភ្លើង​បុក​ស្លាប់​ម្នាក់ របួស​ម្នាក់

បុរស​២​នាក់​ជា​កម្មករ​សំណង់​ចេញពី​ធ្វើការ​ដោយសារ​ផ្លូវ​ស្ទះចរាចរណ៍​ខ្លាំង ក៏​ជិះ​ម៉ូតូ​កាត់​ផ្លូវដែក​ត្រូវ​រថភ្លើង​បើក​បុក​ពីក្រោយ​គូទ​ម៉ូតូ​ធ្លាក់​បុរស​នាក់​អង្គុយ​ពីក្រោយ បណ្តាល​ឲ្យ​បោក​ក្បាល​ស្លាប់ ចំណែក​អ្នក​បើក​ម៉ូតូ​រង​របួសស្រាល ។ ហេតុការណ៍​នេះ​បាន​កើតឡើង​កាលពី​វេលា​ម៉ោង​៥​នឹង​១៥​នាទី​ល្ងាច​ថ្ងៃ​ទី​២៨ ខែធ្នូ តាម​បណ្តោយ​ផ្លូវដែក នៅ​ចំណុច​ផ្លូវ​រថភ្លើង​ក្បែរ​វត្ត​នាគ​វ័ន ស្ថិត​នៅ​ក្នុង​សង្កាត់​ស្រះ​ចក ខណ្ឌដូនពេញ។

ជន​រង​គ្រោះ​ដែល​ស្លាប់​ឈ្មោះ ទុន សុ​ភ័ក្ត្រ ភេទ​ប្រុស អាយុ​១៨​ឆ្នាំ ជា​កម្មករ​សំណង់​នៅ ONE PARK ស្នាក់​នៅផ្ទះ​ជួល​ផ្លូវ​វេ​ង​ស្រេង សង្កាត់​ចោម​ចៅ ខណ្ឌ​ពោធិ៍​សែន​ជ័យ មានស្រុក​កំណើត​នៅ​ភូមិ​ត្រពាំង​ជិត ឃុំ​បឹង​ពាយ ស្រុក​ព្រៃឈរ ខេត្តកំពង់ចាម ។ចំណែក​អ្នក​របួសស្រាល​ជា​អ្នក​បើក​ម៉ូតូ​ឈ្មោះ ពុម ស៊ី​វុ​ល ភេទ​ប្រុស អាយុ​៣០​ឆ្នាំ ជា​កម្មករ​នៅ​ការ​ដ្ឋា​ម្តុំ​បឹង​កក់ ONE PARK ស្នាក់​នៅផ្ទះ​ជួល​ផ្លូវ​វេ​ង​ស្រេង សង្កាត់​ចោម​ចៅ ខណ្ឌ​ពោធិ៍​សែន​ជ័យ មានស្រុក​កំណើត​នៅ​ភូមិ​ជាមួយ​គ្នា ។

សាក្សី​ដែល​ឃើញ​ហេតុការណ៍​បាន​ឲ្យ​ដឹង​ថា មុន​ពេល​កើតហេតុ​គេ​បានឃើញ​បុរស​២​នាក់ ជិះ​ម៉ូតូ​មួយ​គ្រឿង​ម៉ាក​ហុងដា​ឌ្រី​ម​ពណ៌​ខ្មៅ ស៊េរី​២០០៨ ពាក់​ស្លាក​លេខ​ភ្នំពេញ​២AD-៥០៧៦ ចេញ​មក​ពី​ធ្វើការ​ក្នុង​គោលបំណង​ទៅ​ផ្ទះ​វិញ ។ ដោយសារ​តែ​ផ្លូវ​បឹង​កក់​ស្ទុះ​ចរាចរណ៍​ពេក ក៏​បើក​វាង​ផ្លូវ មក​តាម​ផ្លូវ​រថភ្លើង​ម្តុំ​វត្ត​នាគ​វ័ន ។

ភ្លាម​ៗ​នោះ​ដែរ មាន​រថភ្លើង​បើក​ឆ្លងកាត់​ពី​កើត​ទៅ​លិច មាន​បិទ​បារាស់​មិន​ឲ្យ​ឆ្លងកាត់​ទាំង​សងខាង ទើប​ជន​រង​គ្រោះ​ជិះ​វាង​ឆ្លងកាត់​ទៅ​ផ្លូវ​ម្ខាង​ទៀត​ហើយ​ភ្លាម​ៗ​នោះ​រថភ្លើង​ក៏​មក​ជិត​ដល់ ម៉ូតូ​ជន​រង​គ្រោះ​បើក​ទៅ​អត់​ទាន់​ផុត​ផង រថភ្លើង​បុក​គូទ​ម៉ូតូ​ហុងដា​ឌ្រី​ម​បណ្តាល​ឲ្យ​អ្នក​អង្គុយ​ពីក្រោយ​ដួល​បោក​ក្បាល ក៏​ត្រូវ​រថភ្លើង​កិន​បណ្តាល​ឲ្យ​ស្លាប់​ភ្លាម​ៗ​នៅ​នឹង​កន្លែង​កើតហេតុ ។ចំណែកឯ​អ្នក​ឌុ​ប​វិញ​រង​របួសស្រាល រីឯ​ម៉ូតូ​ជន​រង​គ្រោះ​ខូចខាត​ខ្ទេច​ក្បាល​ខាង​មុខ ។ ចំណែក​រថភ្លើង​បើក​ចេញ​បាត់​ទៅ ។

ក្រោយ​កើតហេតុ ក្រុម​គ្រួសារ​ជន​រង​គ្រោះ​មក​ដល់​កន្លែង​កើតហេតុ​បាន​ស្រែក​ទ្រហោយំ​បោក​ខ្លួន​សោក ស្តាយ​ជា​ពន់ពេក ។ ម៉ូតូ​របស់​ជន​រង​គ្រោះ​ត្រូវ​បាន​សមត្ថកិច្ច​យក​ទៅ​រក្សា​ទុក​នៅ​អធិការដ្ឋាន​ខណ្ឌដូនពេញ ។ ចំណែក​សព​សាច់ញាតិ​ដឹក​យក​ទៅ​ធ្វើបុណ្យ​តាម​ប្រពៃណី​នៅ​ស្រុក​កំណើត ។ គួរ​កត់​សម្គាល់ថា មហន្ត រាយ​លើ​ផ្លូវដែក ក្នុង​រាជធានី​ភ្នំពេញ​កើត​មាន​ញឹកញាប់​ណាស់​ជា​គ្រោះថ្នាក់​ដដែល​ៗ ៕

អត្ថបទសរសេរ ដោយ