AFP ផ្សាយថា ក្រុមហ៊ុនគ្រឿងសម្អាងកាណេបូរបស់ជប៉ុនប្រកាសប្រមូលផលិតផលក្រែមលាបឱ្យស្បែកសចំនួន៥៤ប្រភេទពីប្រទេស១០នៅអាស៊ី កាលពីថ្ងៃទី៤ កក្កដា ២០១៣ ក្រោយពីប្រទះឃើញថា អាចបង្កឱ្យស្បែករបស់អ្នកប្រើប្រាស់មានស្នាមអុជខ្មៅ-ស ឬស្បែកមិនរៀបស្មើ ។
ក្រែមលាបឱ្យស្បែកសនោះមានសារធាតុ 4HPB ដែលក្រុមហ៊ុនកាណេបូ ជាអ្នកផលិតផ្ទាល់ ។ ស្ត្រីអ្នកនាំពាក្យរបស់ក្រុមហ៊ុនបានថ្លែងថា «អតិថិជនមួយចំនួនបានអះអាងថា ស្បែកកើតមានសភាពអុជខ្មៅ-ស ក្រោយពីប្រើផលិតផលរបស់ក្រុមហ៊ុន ដោយសន្និដ្ឋានថា មកពីពាក់ព័ន្ធជាមួយសារធាតុ 4HPB » ។
ក្រុមហ៊ុនកាណេបូបានប្រកាសប្រមូលផលិតផលដែលលក់ចំនួន៤៥០.០០០ប្រអប់ រួមទាំងទំនិញដែលសេសសល់មានដាក់លក់នៅជប៉ុន និងនៅបរទេស ។ ការប្រមូលផលិតផលរបស់ក្រុមហ៊ុនលើកនេះបានលាតសន្ធឹងទៅលើប្រទេស១០នៅអាស៊ី រួមមានតៃវ៉ាន់ ហុងកុង កូរ៉េខាងត្បូង សិង្ហបុរី ម៉ាឡេស៊ី ឥណ្ឌូណេស៊ី ភូមា ហ្វ៊ីលីពីន វៀតណាម និងថៃ ៕
ចែករំលែកព័តមាននេះ