រាជធានីភ្នំពេញ ៖ កាលពីដើមសប្តាហ៍នេះ ទីចាត់ការកោះសន្តិភាពបានទទួលលិខិតមួយច្បាប់ពីមិត្តអ្នកអាន របស់ខ្លួន ។ លិខិតនេះមានចំណងជើងថា “គំនិតគួរពិចារណា” ដូច្នេះបញ្ហាជាតិនិយមរបស់ពលរដ្ឋខ្មែរមួយរូបនេះស័ក្តិសមណាស់ ក្នុងការបញ្ចេញមតិក្នុងមនសិការជាតិ ។ ខាងក្រោមនេះគឺជាខ្លឹមសារលិខិតរបស់អ្នកអានរបស់យើងដោយមិនចាំ បាច់ធ្វើអត្ថាធិប្បាយបន្ថែមឡើយ ។
ព្រះរាជាណាចក្រកម្ពុជា
ជាតិ សាសនា ព្រះមហាក្សត្រ
ខ្ញុំបាទឈ្មោះ ប.ថ.ង ប្រជាជនខ្មែរម្នាក់រស់នៅរាជធានីភ្នំពេញ សូមលោកនាយកការផ្សាយមេត្តាជួយចុះផ្សាយនូវអត្ថបទ ” គួរពិចារណា ” របស់ខ្ញុំបាទដោយក្តីអនុគ្រោះផង ។ ខ្ញុំបាទសូមអរគុណទុកជាមុន។
“គំនិតគួរពិចារណា”
ខ្ញុំបាទជាកូនខ្មែរមួយរូប ក៏ដូចជាកូនខ្មែរដទៃទៀតដែរ ស្រលាញ់ទឹកដីមាតុភូមិរបស់ខ្លួនស្មើនឹងជីវិត ។ ហេតុដូចនេះរាល់ការឈ្លានពានទឹកដីខ្មែរពីសំណាក់ប្រជាជន និងកងទ័ពថៃ ពិសេសនៅតំបន់ប្រាសាទព្រះវិហារ ខ្ញុំសូមសំណូមពរអោយរាជរដ្ឋាភិបាលកម្ពុជា ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលប្រជាជនកម្ពុជាទាំងក្នុង និងក្រៅប្រទេសផ្ញើវាសនាលើសម្តេចដោះស្រាយព្រំដែនទឹកដីកម្ពុជា ឈរលើអនុសញ្ញាឆ្នាំ១៩០៤ និងសន្ធិសញ្ញាឆ្នាំ១៩០៧ រវាងបារាំង-សៀម១០០% ព្រោះនោះជាអនុសញ្ញា និងសន្ធិសញ្ញាដែលអន្តរជាតិទទួលស្គាល់ជាផ្លូវការ ។ ហេតុដូចនេះខ្ញុំបាទសំណូមពរសម្តេចប្តឹងទៅអង្គការសហប្រជាជាតិ អោយបានលឿន ព្រោះបើពុំនោះទេ រាល់ការឈ្លានពានទឹកដីកម្ពុជាពីសំណាក់ប្រជាជន និងកងទ័ពថៃក្លាយជាជំងឺរ៉ាំរ៉ៃពិបាកព្យាបាល និងរកថ្នាំព្យាបាលអោយត្រូវណាស់ ។
ខ្ញុំសួរថា ប្រាសាទព្រះវិហារដែលប្រជាជនថៃថារបស់ខ្លួននោះ តើប្រជាជនថៃស្គាល់ថា តើប្រាសាទព្រះវិហារចាប់កសាងពីសតវត្សរ៍ទីប៉ុន្មាន? តើប្រជាជនថៃដឹងទឹកដីរបស់ខ្លួនសព្វថ្ងៃនេះកើតនៅសតវត្សរ៍ទី ប៉ុន្មាន និងបានមកពីណាទេ ។ ខ្ញុំសូមប្រាប់ប្រជាជនថៃគ្រប់រូបអោយបានដឹងច្បាស់ឈប់ល្ងង់តទៅ ទៀតទៅ គឺប្រាសាទព្រះវិហារចាប់កសាងពីសតវត្សរ៍ទី៩ បើគិតមកដល់សតវត្សរ៍ទី២១ គឺមានអាយុ១.២០០ឆ្នាំហើយ ឯប្រទេសថៃសព្វថ្ងៃពីមុនឈ្មោះថាសៀមនោះកើតឡើងនៅចុងសតវត្សរ៍ ទី១៣ បើគិតដល់សតវត្សរ៍ទី២១ គឺទើបតែមានអាយុ៨០០ឆ្នាំ គឺកើតក្រោយប្រាសាទព្រះវិហារ៤០០ឆ្នាំ (គិតលេខគត់) ។ សូមសារព័ត៌មានផ្សាយកន្លងមកកុំផ្សាយជាង៩០០ឆ្នាំ គឺប្រាសាទព្រះវិហារចាប់កសាងរហូតដល់បច្ចុប្បន្នមានអាយុ១.២០០ ឆ្នាំមកហើយ ។ ខ្ញុំបាទសូមអោយខ្មែរយើងគ្រប់រូបត្រូវតែមានការប្រយ័ត្នប្រយែង ក្នុងការនិយាយអំពីប្រវត្តិសាស្ត្រ និងព្រំដែនកម្ពុជា ព្រោះប្រវត្តិសាស្ត្រ និងព្រំដែនបើមានពីគេ មិនមែនហៅថាប្រវត្តិសាស្ត្រ និងព្រំដែនឡើយ ។
ខ្ញុំបាទសូមបញ្ចេញទស្សនៈផ្ទាល់ខ្លួន និង ” គំនិតគួរពិចារណា ” ដូចខាងក្រោម ៖
កម្ពុជាប្តឹងអង្គការសហប្រជាជាតិ ៖
១-ប្តឹងអោយថៃគោរពអនុសញ្ញាឆ្នាំ១៩០៤ និងសន្ធិសញ្ញាឆ្នាំ១៩០៧បារាំង-សៀមអោយបាន១០០% ។
២-ប្តឹងថៃគូសផែនទីឯកតោភាគីឈ្លានពានទឹកដីកម្ពុជា ពិសេសតំបន់ប្រាសាទព្រះវិហារ ។
៣-ប្តឹងពីកងទ័ពថៃបានឈ្លានពានកាន់កាប់វត្តកែវសិក្ខាគិរី ស្វារៈ ហៅវត្តព្រះវិហារ និងតំបន់មួយចំនួនទៀតកាលពីថ្ងៃទី១៥ កក្កដា ឆ្នាំ២០០៨ រហូតដល់សព្វថ្ងៃ ពុំទាន់ដកចេញ ។
៤-ប្តឹងអោយថៃត្រូវតែដកកងទ័ពចេញពីទឹកដីកម្ពុជា ដែលថៃបានកាន់កាប់ និងសងមកវិញនូវរាល់ព្រៃឈើ និងទ្រព្យសម្បត្តិផ្សេងៗដែលបានបាត់បង់ ។
៥-ប្តឹងអោយថៃសងជំងឺចិត្តដល់ប្រជាជនកម្ពុជាជាង១៤លាននាក់ ក្នុងម្នាក់ៗ១០.០០០ដុល្លារ (មួយម៉ឺនដុល្លារអាមេរិក) ដើម្បីអោយថៃរាងចាលកុំអោយឈ្លានពានទឹកដីកម្ពុជាលើកក្រោយទៀត ។
សូមបញ្ជាក់ថា ទឹកដីកម្ពុជា-ថៃ ៖
១-គ្មានតំបន់ត្រួតស៊ីគ្នា ។
២-គ្មានតំបន់ជំលោះ ។
៣-គ្មានជំលោះព្រំដែនកម្ពុជា-ថៃ ។
៤-មានតែតំបន់ដែលកងទ័ពថៃចូលឈ្លានពានទឹកដីកម្ពុជាប៉ុណ្ណោះ ។
៥-គ្មានតំបន់៤,៦គីឡូម៉ែត្រការ៉េ ។
៦-រាល់ការចរចាព្រំដែនត្រូវតែសមភាព គ្មានការសំរួល ឬធ្វើសម្បទានជាដាច់ខាត ។
ដូចនេះខ្ញុំបាទសូមអោយប្រជាជនខ្មែរគ្រប់ស្រទាប់វណ្ណៈឈប់ប្រើ ពាក្យ ” ជំលោះព្រំដែនកម្ពុជា-ថៃ ” ប្រើពាក្យថា កងទ័ពថៃចូលឈ្លានទឹកដីកម្ពុជាវិញ ។
ភ្នំពេញ, ថ្ងៃទី១៥ ខែសីហា ឆ្នាំ២០១០
ពីប្រជាជនខ្មែរម្នាក់ (ប.ថ.ង)
ចែករំលែកព័តមាននេះ