រាជធានីភ្នំពេញ ៖ បុរសម្នាក់ស្រវឹងខ្លាំងបានបើករថយន្តមួយគ្រឿងក្នុងល្បឿនយ៉ាងលឿនជ្រុលទៅបុកក្បាលព្រួញពុះចែកទ្រូងផ្លូវកាលពីវេលាម៉ោង១២អធ្រាត្រថ្ងៃទី២៧ ខែធ្នូ ឆ្នាំ២០១៨ ត្រង់ចំណុចខាងមុខផ្សារស៊ីនជូរី តាមបណ្ដោយមហាវិថីសហព័ន្ធរុស្ស៊ី ស្ថិតក្នុងសង្កាត់កាកាបទី១ ខណ្ឌពោធិ៍សែនជ័យ។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញបុរសមិនស្គាល់អត្តសញ្ញាណម្នាក់ខាងលើបើកបររថយន្តមួយគ្រឿងម៉ាកឡិចស៊ីស 470 ពណ៌ស្ករ ពាក់ស្លាកលេខ ភ្នំពេញ២AB-២៦១០ ក្នុងសភាពស្រវឹងជោក បើកបរក្នុងល្បឿនលឿនតាមបណ្ដោយមហាវិថីសហព័ន្ធរុស្ស៊ី ក្នុងទិសដៅពីស្ពានអាកាសផ្សារដីហុយឆ្ពោះទៅព្រលានយន្តហោះ ។
លុះមកដល់ចំណុចកើតហេតុ ស្រាប់តែរថយន្តខាងលើក៏រេចង្កូតជ្រុលទៅបុកក្បាលព្រួញពុះចែកទ្រូងផ្លូវចំពេញទំហឹង បណ្ដាលឲ្យរថយន្តកៀបជាប់នឹងក្បាលព្រួញពុះចែកទ្រូងផ្លូវទៅមុខលែងរួច រងការខូចខាតផ្នែកខាងមុខយ៉ាងដំណំ រីឯក្បាលព្រួញពុះចែកទ្រូងផ្លូវរងការខូចខាតវៀចបន្តិចបន្តួច តែសំណាងល្អដែលមិនបង្កឲ្យនរណាម្នាក់រងរបួសឡើយ។
ក្រោយពេលកើតហេតុ សមត្ថកិច្ចមូលដ្ឋានក៏បានចុះមកដល់ចំណុចកើតហេតុបានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងដើម្បីស្ទូចយករថយន្ត ព្រមទាំងឃាត់ខ្លួនអ្នកបើកបរ បញ្ជូនទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយ៕
ចែករំលែកព័តមាននេះ