រាជធានីភ្នំពេញ ៖ ក្រុមប្រឹក្សាអភិវឌ្ឍន៍កម្ពុជា(CDC)បានអនុម័តឲ្យក្រុមហ៊ុនធំមួយវិនិយោគទឹកប្រាក់ប្រមាណ៩៤,៥លានដុល្លារអាមេរិក ដើម្បីសាងសង់សណ្ឋាគារប្រណីត លំដាប់ផ្កាយ៥ នៅតំបន់ជ្រៃធំក្នុង ឃុំសំពៅពូន ស្រុកកោះធំ ខេត្តកណ្តាល ។
យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា(CDC)ដែលកោះសន្តិភាព ទទួលបាននាព្រឹកថ្ងៃទី២៥ ខែធ្នូ ម្សិលមិញថា គណៈកម្មការធិការវិនិយោគនៃក្រុមប្រឹក្សាអភិវឌ្ឍន៍កម្ពុជា បានអនុម័តឲ្យក្រុមហ៊ុន SCORPIO CAMTRIP CO.,LTD. វិនិយោគលើគម្រោងសាងសង់ និងធ្វើអាជីវកម្មសណ្ឋាគារថ្នាក់ផ្កាយ៥ ដែលមានចំនួន៦០០បន្ទប់ មានទីតាំងវិនិយោគស្ថិតនៅភូមិលេខ៨ ឃុំសំពៅលូន ស្រុកកោះធំ ខេត្តកណ្តាល ។ ឃុំសំពៅពូន ស្រុកកោះធំ ខេត្តកណ្តាល ត្រូវបានរៀបចំរៀបចំប្លង់គោលជិតរួចហើយ ដើម្បីរៀបចំទីរួមស្រុកនេះមានលក្ខណៈពិសេស និងមានបែបផែនពិសេសមួយ ដែលត្រូវបានរាជរដ្ឋាភិបាលអនុម័តរួចហើយ ។
លោកបណ្ឌិត វ៉ាន់ វ៉ាត អនុប្រធានមន្ទីររៀបចំដែនដី នគរូបនីយកម្ម និងសំណង់ ខេត្តកណ្តាល បានមានប្រសាសន៍នាព្រឹកថ្ងៃដដែលថា រាជរដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់ បានអនុម័តដាក់ឲ្យប្រើប្រាស់ប្លង់គោល ប្រើប្រាស់ដីទីប្រជុំជនជ្រៃធំ ដែលគ្របដណ្តប់លើភូមិចំនួន៣ និងមានប្រជាពលរដ្ឋរស់នៅប្រមាណ៧.០០០នាក់ ។
លោកបន្តថា ការរៀបចំប្លង់គោលប្រើប្រាស់ដីនេះ ជាការជំរុញការអភិវឌ្ឍនៅមូលដ្ឋានប្រកបដោយនិរន្តរភាព និងធ្វើយ៉ាងណាឲ្យការអភិវឌ្ឍនៅតំបន់នោះមានសណ្តាប់ធ្នាប់ និងរបៀបរៀបរយ ។
អភិបាលខេត្តកណ្តាល លោក ម៉ៅ ភិរុណ ធ្លាប់បានមានប្រសាសន៍ថា អាជ្ញាធរខេត្តបាននិងកំពុងរៀបចំតំបន់ជ្រៃធំ ជាតំបន់ពិសេសមួយតាមរយៈការរៀបចំហេដ្ឋារចនាសម្ព័ន្ឋនានាឲ្យមានភាពសមស្រប ដើម្បីទាក់ទាញការអភិវឌ្ឍពីអ្នកវិនិយោគជាតិ និងអន្តរជាតិ ។
លោកបន្តថា ៖« ដើម្បីទាក់ទាញក្រុមហ៊ុនវិនិយោគចូលមកអភិវឌ្ឍន៍តំបន់នេះ យើងត្រូវតែមានហេដ្ឋារចនាសម្ព័ន្ធសមស្រប ហើយយើងបាននិងកំពុងធ្វើការងារនេះ ដើម្បីអភិវឌ្ឍន៍តំបន់នេះជាទីប្រជុំជន មានលក្ខណៈទំនើប និងស៊ីវិល័យ »៕
ចែករំលែកព័តមាននេះ