ខេត្តព្រៃវែង ៖ ថ្លែងនៅក្នុងកិច្ចប្រជុំបូកសរុបលទ្ធផលការងារឆ្នាំ២០១៨ និងលើកទិសដៅបន្តសម្រាប់ឆ្នាំ២០១៩ របស់មន្ទីរកសិកម្មខេត្ត ដែលបានធ្វើឡើងកាលពីថ្ងៃទី២០ ខែធ្នូកន្លងទៅ នៅសាលប្រជុំមន្ទីរកសិកម្មខេត្ត ។
លោក ចាន់ រ៉ាន់ អភិបាលរងខេត្ត មានប្រសាសន៍ថា ការងារធ្វើស្រែចម្ការរបស់ប្រជាកសិករនាពេលបច្ចុប្បន្ន កំពុងត្រូវបានបញ្ជ្រាបចូលនូវលក្ខណៈបច្ចេកទេសវិទ្យាសាស្ត្រដ៏ជឿនលឿន ដើម្បីបង្កើនផលិតភាពកសិកម្ម និងកាត់បន្ថយហានិភ័យទាំងឡាយ ដែលកសិករបាននិងកំពុងជួបប្រទះលើវិស័យកសិកម្ម ដូចជាផលប៉ះពាល់នៃបម្រែបម្រួលអាកាសធាតុ សត្វល្អិតចង្រៃ និងជំងឺផ្សេងៗជាដើម។
ដើម្បីជួយឲ្យកសិករធ្វើការងារកសិកម្មនេះកាន់តែទទួលបានប្រសិទ្ធភាពនិងប្រសិទ្ធផល មន្ទីរកសិកម្មខេត្តត្រូវតែត្រៀមខ្លួនរួចជាស្រេច ក្នុងការចុះជួយដល់កសិករ នៅពេលដែលមានបញ្ហាកើតឡើង និងត្រូវមានគ្រាប់ពូជដំណាំផ្សេងៗដែលធន់នឹងអាកាសធាតុ ធន់នឹងសត្វល្អិតចង្រៃ សម្រាប់ចែកជូនប្រជាកសិករដែលក្រីក្រ និងត្រូវការគ្រាប់ពូជជាចាំបាច់សម្រាប់ធ្វើការបង្កបង្កើនផល។
លោក អ៊ុក សំណាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានឲ្យដឹងថា សម្រាប់ឆ្នាំ២០១៨ ប្រជាកសិករនៅទូទាំងខេត្តព្រៃវែង បានធ្វើការបង្កបង្កើនផលនៅលើផ្ទៃដីដាំដុះសរុបចំនួន២៧៤.៦៧៦ហិកតា ស្មើនឹង១០៩,៨៧%នៃផ្ទៃដីដាំដុះសរុប ។ ដោយឡែកដំណាំស្រូវនៅទូទាំងខេត្ត កសិករធ្វើបានជាមធ្យម៣,១៦តោនក្នុងមួយហិកតា និងទិន្នផលសរុបទូទាំងខេត្តបរិមាណ៨៦១.៦៥៦តោន ។
ដោយឡែក សម្រាប់ទិសដៅបន្តនៅឆ្នាំ២០១៩ មន្ទីរនឹងជំរុញឱ្យកសិករបង្កើនការងារកសិកម្មថែមទៀត តាមរយៈសាលារៀនស្រែកសិករ បើកវគ្គបណ្តុះបណ្តាលការធ្វើស្រែបង្ហាញ ដោយសហការជាមួយដៃគូអភិវឌ្ឍន៍នានា ជំរុញការងារផលិតកម្មរបស់កសិករឱ្យស្របតាមតម្រូវការទីផ្សារ ដើម្បីឱ្យផលិតផលដែលផលិតបានទទួលបានតម្លៃខ្ពស់ ។ ពង្រីងការត្រួតពិនិត្យបទល្មើសចរាចរណ៍សត្វ ផលិតផលដែលមានដើមកំណើតពីសត្វឱ្យមានប្រសិទ្ធភាព ដើម្បីលើកកម្ពស់កសិផលក្នុងស្រុក ។ ពង្រឹងការអនុវត្តបទដ្ឋានគតិយុត្តនានា ក្នុងការទប់ស្កាត់បង្ក្រាបបទល្មើសព្រៃឈើ និងសត្វព្រៃគ្រប់ប្រភេទឱ្យមានប្រសិទ្ធភាព ។ ជំរុញការអនុវត្តការបង្ក្រាបបទល្មើសនេសាទគ្រប់ប្រភេទ និងពង្រឹងសមត្ថភាពសហគមន៍នេសាទ ដើម្បីបង្កើនធនធានត្រី និងការនេសាទប្រកបដោយចីរភាព ។ ជំរុញលើការងារសិក្សាស្រាវជ្រាវ និងការពិសោធន៍នានា ទាក់ទងទៅលើបច្ចេកទេសកសិកម្ម ដើម្បីរុករកបច្ចេកទេសថ្មីៗសម្រាប់ធ្វើការផ្សព្វផ្សាយដល់កសិករ ។
នៅក្នុងឱកាសនោះដែរ តាមរយៈកម្មវិធីជំរុញផលិតកម្មស្បៀងដល់សហគមន៍កសិករ មន្ទីរកសិកម្មខេត្ត បានចែកគោយន្តភ្ជួរដីចំនួន១១គ្រឿង ព្រមទាំងជី និងសម្ភារកសិកម្មមួយចំនួនទៀត ដល់សហគមន៍ឆ្នើមទាំង១១សហគមន៍នៅទូទាំងខេត្ត ដើម្បីជាការលើកទឹកចិត្តដល់បងប្អូនប្រជាកសិករគំរូផងដែរ ៕
ចែករំលែកព័តមាននេះ