រាជធានីភ្នំពេញ ៖ សព្វថ្ងៃតំបន់តាមបណ្ដោយមហាវិថីព្រះមុនីវង្សស្ទើរតែគ្មានដីទំនេរសម្រាប់លក់ទៅហើយ ព្រោះជាមហាវិថីមួយដែលមានសក្ដានុពលអាជីវកម្មខ្លាំងជាងគេ បើធៀបនឹងមហាវិថីនានានៅរាជធានីភ្នំពេញ ។ ចំណែកតម្លៃដីធ្លី និងសកម្មភាពទិញលក់ ក៏មិនសូវមានសន្ទុះ និងមមាញឹកដូចតំបន់ផ្សេងដែរ…
រាជធានីភ្នំពេញ ៖ សព្វថ្ងៃតំបន់តាមបណ្ដោយមហាវិថីព្រះមុនីវង្សស្ទើរតែគ្មានដីទំនេរសម្រាប់លក់ទៅហើយ ព្រោះជាមហាវិថីមួយដែលមានសក្ដានុពលអាជីវកម្មខ្លាំងជាងគេ បើធៀបនឹងមហាវិថីនានានៅរាជធានីភ្នំពេញ ។ ចំណែកតម្លៃដីធ្លី និងសកម្មភាពទិញលក់ ក៏មិនសូវមានសន្ទុះ និងមមាញឹកដូចតំបន់ផ្សេងដែរ ព្រោះតែវាជាតំបន់ដែលអភិវឌ្ឍន៍រួចទៅហើយ ដូច្នេះតម្លៃដីក៏ឡើងកប់យូរមកហើយដែរ ។
បើតាមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាអាណត្តិទី៦ លោក ច្រឹក សុខនីម ដែលទើបជាប់ឆ្នោតកាលពីពេលថ្មីៗនេះ បានឲ្យដឹងកាលពីថ្ងៃទី២១ ធ្នូ ម្សិលមិញថា តម្លៃដីដែលស្ថិតនៅតាមបណ្តាផ្លូវ និងមហាវិថីសំខាន់ៗក្នុងរាជធានីភ្នំពេញ ត្រូវបានគេបែងចែកខុសៗគ្នា ហើយមិនសូវមានការទិញលក់យ៉ាងគគ្រឹកគគ្រេងដូចដីនៅតំបន់ផ្សេងទេ រហូតត្រូវបានអ្នកជំនួញលើវិស័យនេះចាត់ទុកថា ជាតំបន់ដីកម្រទៅហើយ ។
លោកប្រធានសមាគម និងជាអគ្គនាយកក្រុមហ៊ុន Century21 Mekong រូបនេះ បានបន្ដថា ដីដែលស្ថិតនៅតាមបណ្តាផ្លូវខាងលើនេះគឺត្រូវបានគេគិតតម្លៃជាចំណែកផ្សេងៗពីគ្នា ។ លោកថា ៖« នៅតាមបណ្ដោយមហាវិថីព្រះមុនីវង្ស បើគិតត្រឹមតែពីម្ដុំផ្សារធំថ្មីមកដល់តំបន់ពេទ្យចិន អាចមានតម្លៃចន្លោះពី៥.០០០ទៅ៦.០០០ដុល្លារក្នុង១ម៉ែត្រការ៉េ ហើយចាប់ពីម្ដុំពេទ្យចិនរហូតដល់ម្ដុំស្តុបបូគោ អាចមានចន្លោះ៤.០០០ទៅ៥.០០០ដុល្លារ ។ ដោយឡែកចាប់ពីចំណុចស្តុបបូគោរហូតដល់ចំណុចក្បាលថ្នល់ អាចនៅចន្លោះប្រមាណ៣.០០០ទៅ៤.០០០ដុល្លារ »។
ទោះយ៉ាងនេះក្ដី លោកបញ្ជាក់ថា តម្លៃដីខាងលើនេះក៏អាស្រ័យលើទីតាំង និងទំហំដីផងដែរ ពិសេសគឺការចង់បានរបស់អ្នកវិនិយោគ ឬអ្នកដែលមានតម្រូវការខ្ពស់ក្នុងតំបន់ដែលពួកគេចង់ទិញ ។
វិស័យដីធ្លីមិនថានៅពេលបច្ចុប្បន្ន ក៏ដូចជាអនាគតនោះទេ សន្ទស្សន៍នៃតម្លៃគឺនៅតែមានកំណើនជានិច្ច ដោយសារតែកំណើនប្រជាសាស្ត្រ និងប្រាក់ចំណូលរបស់ប្រជាជនកាន់តែប្រសើរឡើង ។ អ្វីដែលជាកត្តាចម្បងនោះ គឺប្រទេសមានសុខសន្ដិភាព ស្ថិរភាពនយោបាយ និងសេដ្ឋកិច្ចជាតិបន្ដមានកំណើនរឹងមាំ ដែលជាកត្តាបន្ដទាក់ទាញវិនិយោគិនបរទេសមកបណ្ដាក់ទុនរកស៊ីនៅកម្ពុជា ។
លោក ច្រឹក សុខនីម មើលឃើញថា ៖« ប្រសិនបើកម្ពុជានៅតែអាចរក្សាបាននូវស្ថិរភាពសេដ្ឋកិច្ច និងនយោបាយដូចពេលបច្ចុប្បន្ននេះ សម្រាប់៥-១០ឆ្នាំខាងមុខទៀត តម្លៃដីនៅតែបន្តកើនឡើង ដែលគិតជាមធ្យមអាចក្នុងរង្វង់ជាង១០% ហើយចំពោះដីដែលស្ថិតក្នុងតំបន់ពាណិជ្ជកម្មពិសេស ដូចជាតំបន់ទីប្រជុំជនក្នុងខេត្ត ឬក្នុងក្រុង គឺអាចមានកំណើនតម្លៃខ្ពស់ជាងនេះទៅទៀត »។
ស្រដៀងគ្នានេះដែរ អ្នកនាង អាន សុធីតា នាយិកាប្រចាំប្រទេស ក្រុមហ៊ុនអចលនទ្រព្យលំដាប់អន្តរជាតិ CBRE Cambodia បានបង្ហាញពីភាពសុទិដ្ឋិនិយមទៅលើវិស័យដីធ្លីសម្រាប់ឆ្នាំ២១០៩ ផងដែរថា ៖« យើងពិតជាមានមោទនភាពរួចមកហើយ ដែលក្នុងរយៈពេល១០ឆ្នាំកន្លងទៅ តម្លៃដីធ្លីបានកើនឡើងរហូត ពោលគឺកាលពីអំឡុងឆ្នាំ២០០៨ តម្លៃដីដែលអាចលក់បានខ្ពស់ជាងគេបំផុតនោះ គឺត្រឹមតែ២.៨០០ដុល្លារក្នុង១ម៉ែត្រការ៉េប៉ុណ្ណោះ ប៉ុន្តែនៅត្រឹមឆ្នាំ២០១៨នេះ តម្លៃដីដែលខ្ពស់អាចឡើងរហូតដល់៦.៥០០ដុល្លារក្នុង១ម៉ែត្រការ៉េ ហើយវានឹងបន្តកើនឡើងខ្ពស់ជាងនេះទៀតនៅពេលខាងមុខនេះ »។
អ្នកនាងបានបន្តថា ៖« បើយើងធ្វើការព្យាករទៅថ្ងៃអនាគត ក្នុងចន្លោះចាប់ពី៥-១០ឆ្នាំខាងមុខទៀត តម្លៃដីនៅកម្ពុជានៅតែមានការកើនឡើងខ្ពស់ដដែល ដែលអាចក្នុងចន្លោះជាង៧%ឡើងទៅ »។ អ្នកនាងថា ៖« ចំពោះកំណើន៧%នេះ មិនមែនមានន័យថា ជាអត្រានៃកំណើនថេរប្រចាំឆ្នាំនោះទេ ប៉ុន្តែវាអាចមានឆ្នាំខ្លះឡើងបាន៥% ឆ្នាំខ្លះឡើងបាន៧% ហើយឆ្នាំខ្លះឡើងបានត្រឹម៣%ជាដើម ដែលការព្យាករចេញជាតួលេខនេះ ក៏ព្រោះតែយើងសម្អាងទៅលើភាពជាក់ស្ដែងនៃតម្រូវការទីផ្សារអចលនទ្រព្យនាពេលបច្ចុប្បន្ននៅកម្ពុជា ធៀបទៅនឹងប្រទេសជិតខាងក្នុងតំបន់ ជាពិសេសប្រទេសថៃ ដែលកំពុងមានលំហូរវិនិយោគយ៉ាងគំហុក ពីសំណាក់អ្នកវិនិយោគក្នុងស្រុក ក៏ដូចជាជនបរទេស ជាពិសេសជនជាតិចិនជា
ដើម »។
អ្នកនាងបញ្ជាក់ថា មានហេតុផលមួយចំនួនទៀត ដែលជាកក្តាជំរុញឱ្យវិស័យដីធ្លីកាន់តែឡើងតម្លៃខ្លាំង ក៏អាចបណ្តាមកពីដំណើរការវិវឌ្ឍន៍សេដ្ឋកិច្ចជាតិ ជាពិសេសការរីកចម្រើនប្រព័ន្ធហេដ្ឋារចនាសម្ព័ន្ធតែម្ដង៕
ចែករំលែកព័តមាននេះ