ការធ្វើអ្វីៗស្រេចតែចិត្តខ្លួនឯង ដោយមិនបានប្រឹក្សាគ្នាជាមុននោះ គឺជាទង្វើផ្តាច់ការហើយ ។ តាមពិតទៅប្តីប្រពន្ធ ទោះបីថាមានរូបរាងផ្សេងគ្នា តែគួរមានបេះដូងតែមួយទើបក្នុងផ្ទះមានសុភមង្គល ។ ប្តីប្រពន្ធត្រូវតែជាមនុស្សយកហេតុផលជាសំខាន់ កុំធ្វើអ្វីៗ ស្រេចតែចិត្តចង់ កុំអាងខ្លួនឯងជាធំក្នុងផ្ទះឲ្យជ្រុលហួសហេតុពេក។ ពិតមែនតែគ្រួសារមិនបែកបាក់គ្នា តែត្រូវគេងបែរខ្នងដាក់គ្នា ព្រោះហេតុមិនសប្បាយចិត្ត និងមិនចុះសម្រុងគ្នា ។
នាងជាភរិយាច្រើនតែរអ៊ូរទាំនិយាយច្រើន ចំណែកបុរសជាស្វាមីក៏រអ៊ូខ្លះដែរ តែតិចតួច ដោយសារតែដើមហេតុមកពីមនុស្សនៅក្នុងផ្ទះមិនរួមដៃជួយកិច្ចការអ្វីៗ ហើយត្រូវធ្លាក់មកលើតែមនុស្សម្នាក់ទាំងការខាងក្រៅ ការងារខាងក្នុងត្រូវដោះស្រាយស្ទើរតែកើតរោគសរសៃប្រសាទទៅហើយ ។
ហេតុដូចនេះមានតែមនុស្សទាំងអស់នៅក្នុងផ្ទះទាំងម្តាយទាំងឪពុកទាំងកូនត្រូវរួមដៃគ្នា ធ្វើអ្វីដែលគួរជួយបានធ្វើបាន ក៏ជួយធ្វើគ្នាទៅ ។
មេផ្ទះដែលឆ្លាត មិនត្រូវចងការងារក្នុងផ្ទះសម្រាប់តែខ្លួនឯង អ្នកណាៗធ្វើមិនត្រូវចិត្តនោះទេ គួរបង្រៀនកូនៗ ឲ្យចេះដឹង ហើយឲ្យកូនធ្វើនូវកិច្ចការនោះជំនួសខ្លួន។ គ្រប់គ្នាត្រូវយល់ថា ការងារអ្វីក៏ដោយ បើយើងធ្វើទៅហើយមានផលឲ្យបានសុខទាំងអស់គ្នា ការងារនោះយើងត្រូវរីករាយនឹងធ្វើ ព្រោះជាកុសលបុណ្យក្នុងជីវិតប្រចាំថ្ងៃ រស់នៅដោយសុភមង្គល ។
ចែករំលែកព័តមាននេះ