រាជធានីភ្នំពេញ ៖ ក្នុងចំណោមសិស្សគុនដែលមានជំនាញល្បុក្កតោទាំងអស់ សម្រាប់កីឡាករគេឃើញមានចំនួនច្រើននាក់ដែលមានទីផ្សារនៅក្នុងវិស័យសម្ដែង ប៉ុន្តែកីឡាករទាំងនោះមិនសូវមានទីផ្សារបានយូរអង្វែងទេ ដោយបានសម្ដែងតែមួយរឿងពីររឿងក៏បាត់មុខឈឹង លើកលែងតែតារាស្រីៗដែលមានទីផ្សារល្អជាង ។ ក្នុងចំណោមកីឡាការិនីល្បុក្កតោ ដែលបានចូលសម្ដែងក្នុងវិស័យភាពយន្តគឺមានតែ២រូបប៉ុណ្ណោះ ដែលបានឈរជើងជាតារាសម្ដែងមានកេរ្តិ៍ឈ្មោះបោះសំឡេងមកទល់នឹងបច្ចុប្បន្ន។
ផ្អែកតាមការតាមដាន កីឡាការិនីល្បុក្កតោ២រូបនោះមានទីផ្សារខ្លាំងក្លា ហើយក្លាយជាតារាល្បីល្បាញខាងវិស័យសម្ដែងដូចគ្នា ដោយមកទល់នឹងបច្ចុប្បន្ន តារាទាំង២ក៏មានតម្លៃខ្លួនខ្ពស់ដោយសូម្បីតែការសម្ដែងក្នុងរឿងខ្លី ឬក្នុងបទចម្រៀង ក៏អ្នកទាំងពីរទទួលបានប្រាក់កម្រៃខ្ពស់ផងដែរ។
កីឡាការិនីទាំងពីរនោះ គឺកញ្ញា សម ថារ័ត្ន ដែលជាគ្រូគុនល្បុក្កតោផង និងជាកីឡាការិនីជម្រើសជាតិផង និងកីឡាការិនី ពេជ្រ ចរណៃ ដែលក្នុងពេលនេះ កំពុងបោះជំហានក្លាយជាតួរងក្នុងភាពយន្ត និងមានទីផ្សារឡើងកូដស្ទើរតែមានអ្នកខ្លះមិនចាប់អារម្មណ៍ថានាងគឺជាអ្នកជំនាញល្បុក្កតោ ។ អ្នកទាំងពីរត្រូវបានគេស្គាល់ថាជាតារាសម្ដែងច្រើនជាងឱកាសចេញប្រកួតនោះផង ជាពិសេសបន្ទាប់ពីអ្នកទាំងពីរលេចមុខលេចមាត់កាន់តែខ្លាំងនៅក្នុងភាពយន្តនារយៈពេលចុងក្រោយ ។ អ្វីដែលគួរសរសើរគឺអ្នកទាំងពីរមិនបានបោះបង់ការងារជាអ្នកល្បុក្កតោនោះទេ ដោយនៅតែលេចមុខហ្វឹកហាត់ និងមានសកម្មភាពសស្រាក់សស្រាំជាមួយល្បុក្កតោមិនដែលខាន បើទោះជាទីផ្សារសម្ដែងរបស់ខ្លួនមានការឈានឡើងក្ដី។
សម ថារ័ត្ន មានឱកាសបានសម្ដែងក្នុងខ្សែភាពយន្តមិនតិចរឿងនោះទេ ពោលគឺតាំងពីនាងបានក្លាយជាកីឡាការិនីជម្រើសជាតិផ្នែកល្បុក្កតោដំបូងៗមកម្ល៉េះ ប៉ុន្តែនាងទើបតែត្រូវគេស្គាល់ខ្លាំងតាមរយៈការសម្ដែងក្នុងរឿង«មុនដំបូងខ្មែរក្រហមសម្លាប់ប៉ាខ្ញុំ» ដែលជាស្នាដៃរបស់អ្នកស្រីអែនជេលីណាជូលី ដោយនាងបានតំណែងជាតួអង្គមេកងនៅក្នុងសម័យប៉ុលពត និងជាតួដែលមានសកម្មភាពរហ័សរហួន ហើយមានចរិតម៉ឺងម៉ាត់ស័ក្ដិសមនឹងចរិតរបស់នាងនៅខាងក្រៅ ។
នាងធ្លាប់ប្រកាសថា មិនសូវមានជំនាញជាអ្នកសម្ដែងនោះទេ ប៉ុន្តែដោយសារតែមានតម្រូវការ ហើយនាងក៏ចង់បានលុយ និងចង់សាកល្បងសមត្ថភាពផង ទើបនាងទទួលយកការងារសម្ដែងមកទល់នឹងពេលនេះ ។ នាងកាន់តែជក់ចិត្តនឹងការសម្ដែងខ្លាំងថែមទៀតនៅពេលប្រឡូកបានមួយរយៈ ហើយត្រូវបានផលិតករទាក់ទងឱ្យថតជាហូរហែ ហើយអ្វីដែលធ្វើឱ្យនាងសប្បាយចិត្តគឺបានសម្ដែងជាតួអង្គលេចធ្លោនិងបានតម្លៃខ្លួនខ្ពស់ ។ ក្រៅពីសម្ដែងជាតួនារីជើងខ្លាំង និងមានចរិតជាប្រុស នាងក៏ធ្លាប់ថតបង្ហាញម៉ូដដោយតែងតួជានារីស្រគត់ស្រគំដែលធ្វើឱ្យអ្នកណាក៏លង់នឹងសម្រស់របស់នាងផងដែរ ជាពិសេសអ្នកមិនធ្លាប់ឃើញនាងគ្រងឈុតនារីស្រគត់ស្រគំ ហើយធ្វើសក់ឱ្យលេចសម្រស់របស់ខ្លួនខ្យូតៗ។
នាងអះអាងថា ខ្លួនមានផលិតករទាក់ទងឱ្យចេញសម្ដែងពីមួយទៅមួយមិនសូវអាក់ខាននោះទេ ប៉ុន្តែអាចមកពីនាងមិនដាច់អាល័យពីក្លិបល្បុក្កតោ និងនៅតែទទួលប្រកួតជាហូរហែ ទើបធ្វើឱ្យការសម្ដែងខ្លះនាងបដិសេធ ដោយសុខចិត្តទទួលប្រកួតច្រើនជាង ។
សម ថារ័ត្ន និយាយថា ឪពុកនាងគឺជាតន្ត្រីករ ចំណែករូបនាងបែរជាចូលចិត្តកីឡា ប៉ុន្តែចុងក្រោយនាងក៏បានក្លាយជាតារាសម្ដែងដែលជាជំនាញសិល្បៈតាមលំនាំឪពុករបស់នាង ខណៈដែលនាងក៏នៅតែចង់ស្នងឪពុករបស់នាងដើម្បីអាចលេងវីយូឡុង ឬនិពន្ធបទចម្រៀងបានមួយចំនួន ដូចគ្នានឹងលោកឪពុកផងដែរ ។ ប៉ុន្តែនាងសម្ដែងការសោកស្ដាយដែលឪពុករបស់នាងបានធ្លាក់ខ្លួនពិការ ក្នុងពេលដែលនាងមិនទាន់ទាំងត្រៀមខ្លួនឱ្យឪពុកបង្រៀនផង ខណៈដែលក្នុងពេលឪពុកជារូបនាងរវល់តែរឿងចេញប្រកួត និងចេញសម្ដែង ប៉ុន្តែក្នុងពេលចាប់ផ្ដើមត្រៀមខ្លួន បែរជាឪពុកមិនអាចបង្រៀនបាន។
ចំណែកពេជ្រ ចរណៃ គឺជាសិស្សគណក្នុងសាលាគុនល្បុក្កតោវត្តថាន់ជាយូរឆ្នាំមកហើយ តែនាងមិនសូវមានអ្នកស្គាល់នោះទេក្នុងពេលហ្វឹកហាត់ល្បុក្កតោដំបូងៗ ។ ក្រោយមកនាងត្រូវបានផលិតករផ្ដល់ឱកាសឱ្យសម្ដែងជាតួវាយតប់ និងជាតួបាញ់បោះ ហើយដោយសារតែនាងមានរូបសម្រស់ស្រស់ស្អាត ទើបនាងចាប់ផ្ដើមមានទីផ្សារសម្ដែងច្រើនឡើងៗ។
នាងត្រូវបានគេស្គាល់កាន់តែច្បាស់នៅពេលបានក្លាយជាសមាជិកគ្រួសារតារាកម្ពុជា ហើយស្រាប់តែមានជំងឺដាច់សរសៃប្រឹសបេះដូង និងប្រហោងបេះដូងប្រឈមការស្លាប់ទាំងវ័យក្មេង ហើយត្រូវបានគ្រួសារតារាកម្ពុជាចេញមុខប្រកូកប្រកាសស្វែងរកជំនួយជួយនាង ។ នាងកាន់តែក្លាយជាតារាដែលមានគេស្គាល់ខ្លាំងឡើង បន្ទាប់ពីជំងឺរបស់នាងត្រូវបានដឹងដល់លោក ខៃ ប្រសិទ្ធិ ហើយលោកចេញមុខផ្ដល់លុយម៉ឺនដុល្លារដើម្បីឱ្យនាងបានវះកាត់បេះដូង។ ក្រោយការវះកាត់បានជោគជ័យនៅមន្ទីរពេទ្យថៃ នាងក៏បានក្លាយជាតារាដែលមានឈ្មោះបោះសំឡេង ហើយមានទីផ្សារសម្ដែងចង់លប់លើសតារាសម្ដែងទៅទៀត ដោយអ្នកខ្លះសឹងមិនចាប់អារម្មណ៍ថា នាងគឺជាកីឡាការិនីល្បុក្កតោប្រចាំវត្តថាន់ផង។
យ៉ាងណាមិញ ពេជ្រ ចរណៃ មិនបានបោះបង់ក្លិបល្បុក្កតោវត្តថាន់របស់ខ្លួននោះទេ ដោយនាងនៅតែលេចមុខហ្វឹកហាត់ក្នុងក្លិបក្រោយពេលជាមកទល់នឹងពេលនេះ បើទោះជាការសម្ដែងរបស់នាងស្ទើររកពេលឱ្យនាងសម្រាកមិនបាន។ ពេជ្រ ចរណៃ បញ្ជាក់ថា នាងក្រោយពេលជាគឺមានផលិតករហៅសម្ដែងជាតួធំៗខុសប្លែកពីមុន ប៉ុន្តែនាងមិនចោលល្បុក្កតោនោះទេ ដោយសារតែនាងស្រឡាញ់ និងចង់ចូលរួមថែរក្សាក្បាច់គុនដូនតាមួយនេះបន្តទៀត ។
សំខាន់គឺនាងចង់ស្វែងយល់ក្បាច់គុនល្បុក្កតោឱ្យបានស៊ីជម្រៅ ទើបនាងមិនអាចចោលបាន ដោយអះអាងថាលើកលែងតែរវល់ថតទៅហាត់មិនបានប៉ុណ្ណោះ ទើបនាងអវត្តមានពីក្លិបល្បុក្កតោវត្តថាន់៕
ចែករំលែកព័តមាននេះ