ខេត្តព្រះសីហនុ ៖ លោកឧត្តមសេនីយ៍ត្រី ណុប បញ្ញា ស្នងការរងទទួលការងារទេសចរណ៍ និងចរាចរណ៍ផ្លូវទឹកបានឲ្យដឹងថា នៅវេលាម៉ោង១៧ថ្ងៃទី១៥ ធ្នូ ជនជាតិចិនដែលមានគ្នា៦នាក់ បានជួលម៉ូតូទឹក៣គ្រឿងជិះលេងកម្សាន្តផ្លាស់ប្តូរគ្នាម្តងម្នាក់ៗ បានរយៈពេល១៥នាទីក៏នាំគ្នាជិះម៉ូតូទាំង៣គ្រឿង ទៅលេងជុំវិញកោះថាស ដែលមានចម្ងាយពីឆ្នេរអូរឈើទាលប្រមាណជាង១០គីឡូម៉ែត្រ ប៉ុន្តែមានបុរសម្នាក់មិនទាន់ត្រឡប់មកវិញទេ នៅបន្តជិះ១ជុំទៀតរហូតដល់ម៉ោង១៧ និង៣០នាទីក៏មិនឃើញត្រឡប់មកវិញ ទើបមានការផ្អើលឆោឡោ ។
លោកឧត្តមសេនីយ៍ត្រី ណុប បញ្ញា បានបញ្ជាក់ថា ក្រោយពេលទទួលបានព័ត៌មាននេះភ្លាម លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តបានបញ្ជាឲ្យកម្លាំងមានសមត្ថកិច្ចលេីផ្ទៃសមុទ្រ សហការគ្នាចេញរកជនជាតិចិនម្នាក់នោះជាបន្ទាន់ ។
លោកស្នងការរងបានដឹកនាំកម្លាំងនគរបាលចរាចរណ៍ផ្លូវទឹក និងទេសចរណ៍ប្រេីប្រាស់អូប័រចំនួន២គ្រឿង ចេញល្បាតលេីផ្ទៃសមុទ្រនិងម៉ូតូទឹកចំនួន៩គ្រឿង អូប័រ១គ្រឿង ព្រមទាំងបានទំនាក់ទំនងផ្តល់ព័ត៌មានទៅអង្គភាពព្រំដែនទឹក និងអង្គភាពសន្តិសុខលំហសមុទ្រ ដើម្បីជួយស្វែងរក ។
ប៉ុន្តែដោយសារយប់ងងឹតលើផ្ទៃសមុទ្ររកចាក់ភ្នែកមិនយល់ មិនអាចរកឃើញនោះឡេីយ ។ លុះដល់ភ្លឺឡើងស្វែងរកទៀត ទើបឃើញបុរសជនជាតិចិននោះ និងម៉ូតូទឹកដែលគាត់ជិះកំពុងរសាត់អណ្តែតនៅខាងត្បូងឆ្នេរសមុទ្រអូរឈើទាល ចម្ងាយប្រមាណជាង១០គីឡូម៉ែត្រ ។ ជនជាតិចិននេះមានឈ្មោះ RAO GUANG ភេទប្រុស អាយុ៣៧ឆ្នាំ កាន់លិខិតឆ្លងដែនលេខ ED ៩៧១៤៩៥៣ ចុះថ្ងៃទី៧ ខែសីហា ឆ្នាំ២០១៨ ។
លោក ណុប បញ្ញា បានបញ្ជាក់ថា តាមការសាកសួរពីមូលហេតុដែលគេមិនអាចបេីកម៉ូតូទឹកជិះត្រឡប់មកឆ្នេរវិញបាន ដោយសារម៉ូតូអស់សាំង ។ ពេលនាំមកដល់ដីគោក ជនរងគ្រោះហាក់មានសុខភាពហត់នឿយបន្តិច ប៉ុន្តែមិនមានសភាពធ្ងន់ធ្ងរនោះទេ ។
ចាត់ទុកជាសំណាងហើយ ដែលអាចរក្សាជីវិតកណ្តាលលំហសមុទ្រមួួយយប់ដោយសុវត្ថិភាព ប្រសិនបើរដូវមានព្យុះច្រើនរលកសមុទ្រមានកំពស់ពី១ទៅ២ម៉ែត្រ ប្រហែលជាយ៉ាប់ហើយ តែពេលនេះរលកស្ងប់ទើបអាចគេចរួចពីគ្រោះថ្នាក់ ៕
ចែករំលែកព័តមាននេះ