ខេត្តប៉ៃលិន ៖ បន្ទាប់ពីប្រជាពលរដ្ឋរិះគន់ខ្លាំងៗទៅលើអាជ្ញាធរ ដែលបណ្តែតបណ្តោយឱ្យក្រុមឈ្មួញយកគ្រឿងចក្រទៅជីកកកាយដីភ្នំស្ទើរខ្ទេចខ្ទីអស់ ដឹកលក់ធ្វើអាជីវកម្ម ទើបក្រោយមកកម្លាំងសមត្ថកិច្ចនគរបាលប៉ុស្តិ៍ឃុំស្ទឹងត្រង់ សហការជាមួយក្រុមប្រឹក្សាឃុំស្ទឹងត្រង់ ចុះទៅណែនាំហាមឃាត់ និងបញ្ឈប់ការធ្វើសកម្មភាពជីកកកាយដីភ្នំមួយកន្លែង ។
ហេតុការណ៍ចុះបង្ក្រាបករណីជីកដីភ្នំលក់នេះ បានកើតឡើងកាលពីម៉ោង៩និង១០នាទីព្រឹក ថ្ងៃទី១៥ ខែធ្នូ ឆ្នាំ២០១៨ ស្ថិតក្នុងភូមិភ្នំព្រាល ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ដើម្បីឱ្យម្ចាស់អាជីវកម្មធ្វើច្បាប់អនុញ្ញាតិឱ្យបានត្រឹមត្រូវ ។
ប្រភពបន្តទៀតថា ភ្នំព្រាលជិតរលាយសាបសូន្យអស់ទៅហើយ ខណ:ឈ្មួញបាននាំគ្នាយកគ្រឿងចក្រទៅជីកកកាយដីដឹកលក់តាមភូមិយ៉ាងគគ្រឹកគគ្រេង ដោយគេមិនឃើញមានមន្ត្រីណាម្នាក់ចេញមុខការពារភ្នំទាំងអស់នេះនោះឡើយ ដោយពួកគេដឹកលក់មួយថ្ងៃៗ រហូតដល់ខូចផ្លូវអស់ជាច្រើនកន្លែងថែមទៀតផង ។
ប្រជាពលរដ្ឋមានការសោកស្តាយយ៉ាងខ្លាំង ខណ:ឃើញភ្នំជាច្រើនកន្លែងនៅក្នុងខេត្តប៉ៃលិន ត្រូវបានគេនាំគ្នាជីកកកាយ ជាពិសេសនៅចំណុចខាងលើ ដែលឈ្មួញកំពុងតែសប្បាយក្នុងការជីកកកាយធនធានធម្មជាតិ ដែលជាកេរ្តិ៍ដូនតា អស់រយ:ពេលជាយូរលង់ណាស់មកហើយ។
ទោះបីជាយ៉ាងណាក៏ដោយ ពួកគាត់មានការសប្បាយចិត្ត ខណ:ឃើញខាងមន្ត្រីនគរបាល ក៏ដូចជាខាងអាជ្ញាធរបានចុះទៅហាមឃាត់ទាន់ពេល កុំអីភ្នំព្រាលទាំងមូលប្រហែលជារលាយគ្មានសល់នោះទេ ៕
ចែករំលែកព័តមាននេះ