សហរដ្ឋអាមេរិក ៖ រដ្ឋាភិបាលរបស់លោកដូណាល់ត្រាំជួបការរង្គោះរង្គើថ្មី ដោយប្រធានាធិបតីអាមេរិក ប្រកាសនាថ្ងៃទី១៥ ធ្នូ ពីការចាកចេញរបស់រដ្ឋមន្ត្រីមហាផ្ទៃ លោកRYAN ZINKEជាអ្នកទទួលបន្ទុកអនុវត្តមួយផ្នែកធំ នៃនយោបាយរបស់លោក។
រដ្ឋមន្ត្រីមហាផ្ទៃរូបនោះនឹងចាកចេញពីរដ្ឋាភិបាលនាដំណាច់ឆ្នាំ ក្រោយកាន់តំណែងជិត២ឆ្នាំ។ លោកត្រាំក្រោយការប្រកាសពីការតែងតាំងប្រមុខខុន្ទកាល័យស្ដីទីរបស់លោក បានសរសេរតាម TWITTERថា លោកRYAN ZINKEបានបំពេញការងារជាច្រើនក្នុងអាណត្តិរបស់លោក ហើយខ្ញុំសុំថ្លែងអំណរគុណចំពោះការបម្រើប្រជាជាតិរបស់លោក។ លោកគួសបញ្ជាក់ទៀតថា នឹងប្រកាសពីឈ្មោះរដ្ឋមន្ត្រីមហាផ្ទៃថ្មីនាសប្ដាហ៍ខាងមុខនេះ។
នៅសហរដ្ឋអាមេរិក រដ្ឋមន្ត្រីមហាផ្ទៃទទួលបន្ទុកគ្រប់គ្រងបរិស្ថាន បណ្ដាឧទ្យានជាតិ ដែនដីសហព័ន្ធនិងកិច្ចការឯទៀតៗ។ លោកRYAN ZINKEជាអតិីតយោធានិងជាតំណាងរាស្ត្រនៃរដ្ឋម៉ុងតាណា។ លោកទទួលការរិះគន់ ពីការចំណាយច្រើនជ្រុល។ លោកបានឲ្យគេជួសជុលទ្វារធំ៣នៃការិយាល័យរបស់លោក ដោយចំណាយប្រាក់ដល់ទៅ៧៥០០០ដុល្លារ រួចអគ្គស្នងការក្រសួងលោក បានស៊ើបអង្កេតលើការចំណាយ ក្នុងការធ្វើដំណើរទៅណាមកណាតាមយន្តហោះឯកជនរបស់លោក។
ក្នុងសេចក្ដីប្រកាសមួយកាលពីថ្ងៃទី១៥ធ្នូលោកបានបញ្ចេញប្រតិកម្មថា ខ្ញុំពុំអាចលើកហេតុផលពីការចំណាយប្រាក់ច្រើនពាន់ដុល្លារសម្រាប់ការពារខ្លួនខ្ញុំនិងការពារគ្រួសារខ្ញុំ ប្រឆាំងការចោទប្រកាន់ខុសទាំងនោះ។ លោកបន្តថាយកល្អប្រធានាធិបតីនិងក្រសួងមហាផ្ទៃគួរផ្ដោតលើបណ្ដាសមិទ្ធិផលជាជាងលើការចោទប្រកាន់ខុសទាំងឡាយ។
ទោះបីយ៉ាងណាការគ្រប់គ្រងបរិស្ថានរបស់លោក ក៏រងការបរិហារផងដែរដោយពួកប្រឆាំង ដែលលោកជាអ្នកចូលចិត្តបរបាញ់សត្វ បែរជាទៅបង្កើតក្រុមប្រឹក្សាទទួលបន្ទុកបញ្ហាការពារជិវិតសត្វព្រៃ៕
ចែករំលែកព័តមាននេះ