ទីក្រុងហូជីមិញ៖ ថ្មីៗនេះ ស្ត្រីវ័យ៦៤ឆ្នាំម្នាក់ជាជនជាតិអាមេរិកដើមកំណើតវៀតណាមបានស្លាប់ដោយសារការវះកាត់កែសម្ផស្សនៅមន្ទីរពេទ្យឯកជននៃទីក្រុងហូជីមិញ។ ពេលកំពុងទទួលសេវាវះកាត់សុខៗស្រាប់តែស្ត្រីរូបនោះស្រឺតបាត់មាត់បាត់ក និងសន្លប់ធំលែងដឹងខ្លួនមកវិញរយៈពេលមួយខែរហូតដល់ផុតដង្ហើម។ ស្ត្រីដែលគេមិនបានបង្ហាញអត្តសញ្ញាណរូបនោះបានទៅរកសេវាវះកាត់កែសម្ផស្សពីមន្ទីរពេទ្យតាន់ហុង (Tan Hung) កាលពិថ្ងៃទី២៧ ខែមីនា។
គ្រូពេទ្យប្រាប់ថាស្ត្រីរូបនេះបូមខ្លាញ់ជាច្រើនកន្លែងនៅលើរាងកាយរបស់គាត់ដូចជាខ្លាញ់ក្បាលពោះ ខ្លាញ់ភ្លៅ ខ្លាញ់ដើមដៃ។ មិនតែប៉ុណ្ណោះក្រោយពេលបូមខ្លាញ់ពោះរួច គាត់វះកាត់ស្បែកពោះឱ្យបានស្អាតល្អឡើងវិញ។ ស្ត្រីរូបនេះសម្រុកវះកាត់ច្រើនពេកនៅក្នុងពេលតែមួយ។ គ្រូពេទ្យប្រាប់ថាស្ត្រីរូបនេះក៏បានវះកាត់កំប៉េះគូទរបស់គាត់ដើម្បីឱ្យរីកធំជាងមុន, បូមខ្លាញ់ថ្នក់ក្រោមភ្នែក និងវះកាត់យកដុំស៊ីលីកូន (silicon) ចាស់ចេញពីដើមទ្រូងរបស់គាត់ដើម្បីដាក់ស៊ីលីកូនថ្មីជំនួសវិញ។
ការវះកាត់កែសម្ផស្សទាំងអស់នេះបានធ្វើចប់សព្វគ្រប់១កំផ្លេ។ ក្រោយពេលវះកាត់ថ្មីៗមិនមានបញ្ហាអ្វីទេ។ ប៉ុន្តែកន្លងផុតទៅបាន២ថ្ងៃ គាត់ចាប់ផ្ដើមមានអាការៈអស់កម្លាំងល្ហិតល្ហៃ, ដកដង្ហើមផុតៗដូចចង់ដាច់ខ្យល់ និងមានសម្ពាធឈាមធ្លាក់ចុះ។ មន្ទីរពេទ្យក៏ផ្ដល់សេវាសង្គ្រោះបន្ទាន់ចំពោះគាត់ និងដឹកជញ្ជូនគាត់ទៅសម្រាកព្យាបាលជំងឺនៅមន្ទីរពេទ្យយោធា។
គ្រូពេទ្យនៅមន្ទីរពេទ្យយោធាពិនិត្យឃើញថាស្ត្រីរូបនេះខូចគ្រឿងក្នុងជាច្រើនកន្លែងដោយសារអាលែកហ្ស៊ីថ្នាំ, ធ្វើទុក្ខបេះដូង និងឈាមកកនៅតាមសរសៃឈាមក្រោយការវះកាត់។ ស្ត្រីរូបនេះត្រូវគេបញ្ជូនទៅបន្ទប់សង្គ្រោះបន្ទាន់ និងដាក់ខ្យល់អុកស៊ីហ្សែនទាំងយប់ទាំងថ្ងៃ, លាងសម្អាតឈាមជាញឹកញាប់, បន្តោកសេរ៉ូមផ្លាស់ស្មា និងដាក់ម៉ាស៊ីនជំនួយផ្លូវដង្ហើម។
បន្ទាប់ពីប្រើប្រាស់វិធីទាំងនេះរួចហើយគ្មានលទ្ធផលល្អទេ។ ស្ថានភាពរបស់អ្នកជំងឺកាន់តែធ្ងន់ទៅៗ។ ក្រោយមកនៅថ្ងៃទី៣ ខែឧសភាថ្មីៗនេះ ស្ត្រីរូបនោះក៏លាចាកលោកនេះទៅ។ ពោលគឺគាត់ផុតដង្ហើមរយៈពេលជាងមួយខែក្រោយពេលទទួលសេវាវះកាត់កែសម្ផស្ស។ មន្ទីរពេទ្យយោធារកឃើញថាស្ត្រីរូបនេះមិនមែនមានបញ្ហាត្រឹមតែនៅកន្លែងវះកាត់មួយមុខទេ។ គាត់មានជំងឺដទៃទៀតដូចជាឧស្សាហ៍ធ្វើទុក្ខបេះដូង, ដំបៅក្រពះ, ហូរឈាមក្នុងពោះវៀនធំ និងប៉ោងសរសៃឈាមខួរក្បាល។
ជនរងគ្រោះក៏មានជំងឺហ្គាសនៅក្នុងពោះវៀនធំ, ផ្សិតនៅក្នុងបង្ហួរនោម, សម្ពាធឈាមធ្លាក់ចុះ និងស្នាមជាំខ្លាំងនៅដើមទ្រូងខាងឆ្វេងផងដែរ។ គ្រូពេទ្យពិនិត្យឃើញថានៅលើរាងកាយរបស់គាត់មានចំណុចកកឈាមជាច្រើនកន្លែងដូចជានៅសរសៃអាកទែនាំឈាមទៅសួត និងតម្រងនោម។ អាជ្ញាធរកំពុងធ្វើអធិការកិច្ចដើម្បីចង់ដឹងថាតើគ្រូពេទ្យកែសម្ផស្សបានអនុវត្តត្រឹមត្រូវតាមក្បួនវេជ្ជសាស្ត្រដែរឬទេ ឬក៏មានធាតុផ្សំនៃបទល្មើសព្រហ្មទណ្ឌដែលអាចនាំខ្លួនទៅទទួលខុសត្រូវនៅមុខច្បាប់។
គួរកត់សម្គាល់ថានៅវៀតណាមក៏មិនខុសពីប្រទេសដទៃទៀតតែងមានករណីមនុស្សស្លាប់ពេលវះកាត់កែសម្ផស្ស។ កែសម្ផស្សសើស្បែកធម្មតាមិនមានបញ្ហាទេ។ បញ្ហាគឺវះកាត់ និងចាក់ថ្នាំសណ្ដំ។ កាលពីខែធ្នូ ឆ្នាំ២០២២ ស្ត្រីវ័យ២៥ឆ្នាំស្លាប់ភ្លាមៗនៅនឹងគ្លីនិកកែសម្ផស្សតែម្ដងបន្ទាប់ពីវះកាត់សម្រកខ្លាញ់នៅលើដងខ្លួននៅគ្លីនិកឈ្មោះឃីប៊ីយូធី (Key Beauty) នៅទីក្រុងហូជីមិញ។ បន្ទាប់ពីគ្រូពេទ្យចាក់ថ្នាំសណ្ដំមិនបានប៉ុន្មានផង ស្ត្រីរូបនោះក៏ស្រឺតបាត់មាត់បាត់ក និងផុតដង្ហើមតែម្ដង។
ក្រោយមកទៀតនៅខែមីនា ឆ្នាំ២០២៤នេះ ស្ត្រីជនជាតិអាមេរិកដើមកំណើតវៀតណាមម្នាក់អាយុរហូតដល់ទៅ៧០ឆ្នាំទៅហើយនៅតែចង់កែសម្ផស្សទៀត។ គាត់បានទៅរកសេវាវះកាត់បំពេញខ្លាញ់នៅលើផ្ទៃមុខដើម្បីឱ្យមានទម្រង់មុខពេញរាងពងក្រពើ។ វះកាត់មិនបានប៉ុន្មានផង គាត់ចាប់ផ្ដើមមានអាការៈមិនស្រួលខ្លួនមួយរំពេច ហើយក៏ផុតដង្ហើមតែម្ដង៕
ចែករំលែកព័តមាននេះ