ទីក្រុងបាងកក៖ ភ្លៀងចាប់ផ្ដើមធ្លាក់ជាបណ្ដើរៗហើយនៅក្នុងប្រទេសខ្លះនៃតំបន់អាស៊ីអាគ្នេយ៍។ នៅប្រទេសថៃភាគឦសាន មិនត្រឹមតែមានភ្លៀងធ្លាក់ធម្មតាប៉ុណ្ណោះទេ ប៉ុន្តែជាភ្លៀងលាយគ្រាប់ព្រិលធំៗធ្លាក់ចុះមកក្រោមៗយ៉ាងខ្លាំងក្លាប្រៀបបាននឹងគេយកដុំថ្មគប់គ្រវែងពីលើមេឃដូច្នោះដែរ។ គ្រាន់តែភ្លៀងលាយផ្គរ រន្ទះ និងគ្រាប់ព្រិលកាលពីថ្ងៃសុក្រ និងថ្ងៃសៅរ៍សប្ដាហ៍មុននោះបានសម្លាប់មនុស្សយ៉ាងតិចបីនាក់។ ពួកគេជាកម្មករសំណង់នៅខេត្តបឹងកាន (Bueng Kan)។
មន្ទីរគ្រប់គ្រងគ្រោះមហន្តរាយខេត្តបឹងកានថ្លែងថាខេត្តនេះមានភ្លៀងធ្លាក់ខ្លាំងលាយឡំដោយគ្រាប់ព្រិលធំៗពេញមួយយប់ថ្ងៃសុក្ររហូតដល់ព្រឹកថ្ងៃសៅរ៍ក៏មិនទាន់ស្ងប់ស្ងាត់ទៅវិញដែរ។ ខ្យល់កន្ត្រាក់ និងការធ្លាក់ព្រិលនោះប៉ះពាល់ផ្ទះ១៨៤ខ្នងនៅក្នុងភូមិចំនួន៥១។ កម្មករសំណង់ដែលរងគ្រោះដល់បាត់បង់ជីវិតទាំងបីនាក់នោះកំពុងធ្វើការសុខៗស្រាប់តែខ្យល់បក់ខ្លាំងធ្វើឱ្យដងស្ទូចមួយគ្រឿងផ្អៀងទៅម្ខាង និងសង្កត់ពីលើពួកគេ។
នៅតំបន់ជ័យភូមិ មន្ត្រីថ្នាក់មូលដ្ឋានប្រាប់ថាភ្លៀងលាយខ្យល់កន្ត្រាក់ និងការធ្លាក់ព្រិលវាយប្រហារស្រុកចំនួនបួនកាលពីយប់ថ្ងៃសៅរ៍ និងធ្វើឱ្យដាច់ភ្លើងអគ្គិសនីប្រហែល២ម៉ោងកន្លះ។ អ្នកស្រុករស់នៅម្ដុំនោះប្រាប់ថាគ្រាប់ព្រិលធំៗប៉ុនពងមាន់បានធ្លាក់ទៅលើដំបូលផ្ទះរបស់ពួកគាត់ឮសូរក្ឌាំងៗ ខណៈដែលដើមឈើរក៏ត្រូវបាក់រលើងគ្រេងៗដោយអានុភាពនៃកម្លាំងខ្យល់បក់។
នៅខេត្តឧទ័យធានី (Uthai Thani) អាជ្ញាធរប្រាប់ថាផ្ទះរបស់អ្នកស្រុកប្រហែល៧០ខ្នងបានរងការខូចខាតដោយសារខ្យល់កន្ត្រាក់ និងការធ្លាក់ព្រិលកាលពីយប់ថ្ងៃសៅរ៍។ ខ្យល់កន្ត្រាក់ក៏បានបោកផ្ដួលបង្គោលភ្លើងឱ្យបាក់ជាច្រើនដើម ហើយធ្វើឱ្យដាច់ភ្លើងជាង២ម៉ោង។ អ្នកភូមិប្រាប់ថាម៉ោងប្រហែល៥:៣០ល្ងាចថ្ងៃសៅរ៍ ខ្យល់ចាប់ផ្ដើមបក់មកវូៗប្រហែលកន្លះម៉ោង។
គ្រួសាររបស់ពួកគេមិនហ៊ានស្នាក់នៅក្នុងផ្ទះទេ ត្រូវតែរត់ចេញទៅខាងក្រៅផ្ទះបន្ទាប់ពីដើមឈើ១ដើមបាក់លើដំបូលផ្ទះ។ ពួកគេត្រូវស្នាក់នៅខាងក្រៅផ្ទះទាំងសភាពងងឹតសូន្យរយៈពេល២ម៉ោង។ កាលនោះ ខ្យល់កន្ត្រាក់ក៏បានពាំនាំមកជាមួយនូវគ្រាប់ព្រិលធំៗធ្លាក់ទៅលើដំបូលផ្ទះឮសូរគ្រាំងៗ ធ្វើឱ្យអ្នករស់នៅក្នុងផ្ទះមានអារម្មណ៍តក់ស្លុត និងភិតភ័យគ្រប់ៗគ្នា៕
ចែករំលែកព័តមាននេះ