ទីក្រុងម៉ូស្គូ៖ ប្រទេសរុស្ស៊ីប្រហែលជាអត់ទ្រាំតទៅទៀតមិនបានទេនឹងពាក្យសម្ដីរបស់អតីតនាយករដ្ឋមន្ត្រីអង់គ្លេស និងបច្ចុប្បន្នជារដ្ឋមន្ត្រីការបរទេសអង់គ្លេស លោកដេវីដ កាំម៉្រុន ដែលទៅបំពេញទស្សនកិច្ចនៅអ៊ុយក្រែន និងថ្លែងសារនយោបាយថាទី១-អង់គ្លេសនឹងបន្តជួយអ៊ុយក្រែនដោយឥតកំណត់ពេលវេលា និងទី២-អង់គ្លេសមិនយល់ទាស់ទេបើអ៊ុយក្រែនចង់ប្រើប្រាស់អាវុធអង់គ្លេសបាញ់ប្រហារចូលទឹកដីរុស្ស៊ី។ លោកយល់ថាអ៊ុយក្រែនមានសិទ្ធិពេញលេញដើម្បីធ្វើដូច្នេះ។
ត្រង់សារនយោបាយទី២នេះហើយដែលធ្វើឱ្យរដ្ឋាភិបាលទីក្រុងម៉ូស្គូខឹងដាច់ក្បាលដាច់កន្ទុយ។ រុស្ស៊ីបញ្ចេញប្រតិកម្មតបតាមរយៈអ្នកនាំពាក្យក្រសួងការបរទេសផង និងអ្នកនាំពាក្យវិមានក្រឹមឡាំងផង។ យោងតាមអ្នកនាំពាក្យរុស្ស៊ី, ពាក្យសម្ដីនេះជាការបញ្ជាក់ថាអឺរ៉ុបកំពុងធ្វើសង្គ្រាមប្រយោល ហើយពួកគេចង់អូសទាញប្លុកទាំង២ឱ្យធ្លាក់ចូលទៅក្នុងជម្លោះប្រដាប់អាវុធដោយផ្ទាល់។
ថ្ងៃនេះ រុស្ស៊ីព្រមានកាន់តែធ្ងន់ថាខ្លួនអាចនឹងវាយប្រហារទីតាំងយោធារបស់អង់គ្លេសនាពេលអនាគត។ ឯកអគ្គរាជទូតអង់គ្លេសប្រចាំទីក្រុងម៉ូស្គូត្រូវក្រសួងការបរទេសរុស្ស៊ីកោះហៅទៅជួបដើម្បីសម្ដែងការកើតទុក្ខមិនសុខចិត្ត និងថ្លែងសារព្រមានចំពោះពាក្យសម្ដីរបស់លោកកាំម៉្រុន។ រុស្ស៊ីថាបើសិនអ៊ុយក្រែនហ៊ានប្រើអាវុធអង់គ្លេសបាញ់ចូលទឹកដីរុស្ស៊ីមែន រុស្ស៊ីនឹងវាយប្រហារមូលដ្ឋានយោធាអង់គ្លេស និងគ្រឿងបរិក្ខារយោធាអង់គ្លេសនៅលើទឹកដីអ៊ុយក្រែន និងនៅទីកន្លែងដទៃទៀត។
ក្រសួងការបរទេសរុស្ស៊ីថ្លែងថាពាក្យសម្ដីរបស់លោកកាំម៉្រុននេះជាការទទួលស្គាល់ថាអង់គ្លេសពិតជាបានចូលរួមនៅក្នុងសង្គ្រាមអ៊ុយក្រែនដោយផ្ទាល់។ ក្រសួងថ្លែងបន្តទៀតថាខ្លួនបានព្រមានទូតអង់គ្លេសថាបើសិនអ៊ុយក្រែនហ៊ានធ្វើតាមពាក្យសម្ដីរបស់លោកកាំម៉្រុនមែន មូលដ្ឋានយោធាអង់គ្លេស និងឃ្លាំងអាវុធអង់គ្លេសនៅអ៊ុយក្រែន និងនៅប្រទេសដទៃទៀតនឹងក្លាយជាគោលដៅដែលត្រូវវាយប្រហារ។
ក្រសួងបញ្ជាក់ថាការកោះហៅទូតអង់គ្លេសទៅឆ្លើយបំភ្លឺនេះដើម្បីបញ្ជាក់ថារុស្ស៊ីមិនអាចបណ្ដោយឱ្យលោកកាំម៉្រុននិយាយស្រេចតែនឹងចិត្តទេ។ អង់គ្លេសត្រូវតែទទួលខុសត្រូវចំពោះផលវិបាកធ្ងន់ធ្ងរដែលអាចនឹងកើតមានដោយសារពាក្យសម្ដីនេះ។ និយាយតែមាត់ទទេមិនសូវអីប៉ុន្មានទេ។ ប៉ុន្តែបើអ៊ុយក្រែនហ៊ានធ្វើតាមពាក្យសម្ដីនេះនឹងក្លាយជាការបង្កហេតុយ៉ាងពិតប្រាកដ។
សូមរំលឹកថានៅក្នុងការថ្លែងសុន្ទរកថានៅទីក្រុងកៀវកាលពីប៉ុន្មានថ្ងៃមុននេះ លោកកាំម៉្រុនមិនបាននិយាយចាក់រុកដោយផ្ទាល់ឱ្យអ៊ុយក្រែនបាញ់កាំភ្លើងចូលទឹកដីរុស្ស៊ីទេ។ លោកគ្រាន់តែនិយាយថាអ៊ុយក្រែនមានសិទ្ធិប្រើអាវុធដែលផ្ដល់ដោយអង់គ្លេសបើសិនរដ្ឋាភិបាលទីក្រុងកៀវចង់ធ្វើដូច្នេះ។ លោកនិយាយរបៀបឆ្កឹះជាគំនិតថារុស្ស៊ីអាចបាញ់កាំភ្លើងចូលទឹកដីអ៊ុយក្រែនបាន។ រឿងអីអ៊ុយក្រែនគ្មានសិទ្ធិបាញ់ចូលរុស្ស៊ីវិញ។ លោកយល់ថាអ៊ុយក្រែនត្រូវតែមានសិទ្ធិការពារខ្លួន។
លោកថ្លែងថាវាជាសិទ្ធិស្វ័យសម្រេចរបស់អ៊ុយក្រែនថាត្រូវធ្វើដូច្នេះ ឬយ៉ាងណា។ ប្រហែលជាលោកចង់មានន័យថាអ៊ុយក្រែនត្រូវតែទទួលខុសត្រូវដោយខ្លួនឯង។ ប៉ុន្តែនៅក្នុងក្រសែភ្នែករបស់រុស្ស៊ី រុស្ស៊ីយល់ថានេះជាការនិយាយពន្យុះ និងបង្កហេតុរវាងអង់គ្លេស និងរុស្ស៊ី។ រុស្ស៊ីមិនមែននិយាយតែមាត់ទេ។ ថ្ងៃនេះ រុស្ស៊ីចាប់ផ្ដើមធ្វើសមយុទ្ធយោធាដោយផ្ដោតសំខាន់ទៅលើវិញ្ញាសាហាត់ប្រើប្រាស់អាវុធនុយក្លេអ៊ែរ៕
ចែករំលែកព័តមាននេះ