ករណីនំប៉័ងសាច់ នៅភាគខាងត្បូងវៀតណាម កើនឡើងដល់៥៦០នាក់
វៀតណាម ៖ យ៉ាងហោចណាស់មានមនុស្សចំនួន ៥៦០នាក់ មានរោគសញ្ញា នៃការពុលអាហារ បន្ទាប់ពីទិញនំប៉័ងសាច់ (Banh mi) មកបរិភោគ…
វៀតណាម ៖ យ៉ាងហោចណាស់មានមនុស្សចំនួន ៥៦០នាក់ មានរោគសញ្ញា នៃការពុលអាហារ បន្ទាប់ពីទិញនំប៉័ងសាច់ (Banh mi) មកបរិភោគ…
វៀតណាម ៖ យ៉ាងហោចណាស់មានមនុស្សចំនួន ៥៦០នាក់ មានរោគសញ្ញា នៃការពុលអាហារ បន្ទាប់ពីទិញនំប៉័ងសាច់ (Banh mi) មកបរិភោគ នៅហាងមួយកន្លែង ក្នុងខេត្តដុងណាយ ភាគខាងត្បូង ប្រទេសវៀតណាម ។
យោងតាមអាជ្ញាធរក្រុងឡុងខាញ់ ក្នុងចំណោមអ្នកពុលនំប៉័ងសាច់ នៅហាង «Bang» កាលពីថ្ងៃទី៣០ ខែមេសា មានចំនួនកើនឡើងដល់ទៅ ៥៦០នាក់ហើយ ត្រូវចូលសម្រាកព្យាបាលនៅមន្ទីរពេទ្យ រហូតមកដល់ថ្ងៃចន្ទ ទី០៦ ឧសភានេះ ខណៈដែលអ្នកផ្សេងទៀត ដែលមានរោគសញ្ញាស្រាល ក៏បានទៅមន្ទីរពេទ្យ ដើម្បីពិនិត្យ ផងដែរ។ ក្នុងចំណោមអ្នកចូលសម្រាកព្យាបាលនៅមន្ទីរពេទ្យ មាន ១២នាក់ ស្ថិតក្នុងស្ថានភាពធ្ងន់ធ្ងរ ហើយជាង ២០០នាក់ទៀត ក៏បានត្រឡប់ទៅផ្ទះវិញ ។
ករណីធ្ងន់ធ្ងរបំផុត គឺក្មេងប្រុសអាយុប្រាំមួយឆ្នាំម្នាក់ កំពុងសម្រាកព្យាបាលនៅមន្ទីរពេទ្យកុមារ ក្នុងទីក្រុងហូជីមិញ ដែលមានព្រំប្រទល់ជាប់ខេត្តដុងណៃ។ ក្មេងប្រុស នៅតែស្ថិតក្នុងស្ថានភាពសន្លប់ ជាមួយនឹងការបញ្ចេញទឹកនោមតិចតួច ហើយបន្តដកដង្ហើមដោយម៉ាស៊ីនជំនួយអុកស៊ីហ្សែន និងការលាងឈាម។ ក្មេងប្រុសរូបនេះ បានទិញនំប៉័ងសាច់នៅហាង កាលពីថ្ងៃទី៣០ មេសា ហើយថ្ងៃបន្ទាប់ ក្មេងប្រុសបានក្អួត និងរាគ ប៉ុន្តែមិនត្រូវបានបញ្ជូនទៅមន្ទីរពេទ្យ ភ្លាមៗទេ ។
លុះដល់ថ្ងៃទី២ ខែឧសភា គាត់ក្អួតច្រើនឡើងប្រកាច់ ហើយត្រូវក្រុមគ្រួសារបញ្ជូនទៅមន្ទីរពេទ្យ ឡុងខាញ់ ក្នុងស្ថានភាពសន្លប់ ។
ករណីធ្ងន់ធ្ងរទី២ គឺក្មេងប្រុសអាយុ៧ឆ្នាំ កំពុងសម្រាកព្យាបាលនៅមន្ទីរពេទ្យកុមារ ដុងណាយ ដែលសុខភាពមានភាពប្រសើរឡើងបន្តិច។ អ្នកជំងឺនៅបង្ហាញអាការក្អក ហើយអាចបើកភ្នែកម្តងម្កាល ។
លោក Le Quang Trung ប្រធានមន្ទីរសុខាភិបាលខេត្តដុងណាយ បាននិយាយកាលពីថ្ងៃអាទិត្យថា លទ្ធផលតេស្តឈាមពីកុមារ០៣នាក់ ដែលមានជំងឺធ្ងន់ធ្ងរ បានបង្ហាញថា ពូកគេមានការឆ្លងមេរោគ E.coli ។
បាក់តេរីនេះ ច្រើនតែលេចឡើងក្នុងផលិតផលស្រស់ៗ ដូចជា សាច់គោ ទឹកដោះគោស្រស់ ទឹកផ្លែឈើ ឈីស ផ្លែឈើស្រស់ និងបន្លែឆៅ។ រោគសញ្ញា នៃការឆ្លងមេរោគ E.coli ជាធម្មតា រួមមាន ៖ ចង្អោរ និងក្អួត និងរាគ ។
ហាង Bang banh mi ស្ថិតនៅផ្លូវ Tran Quang Dieu ក្នុងក្រុងឡុងខាញ់ នៃខេត្តដុងណាយ នៅថ្ងៃកើតហេតុនោះ ហាងលក់បាន ១,១០០នំប៉័ង ក្នុងថ្ងៃទី៣០ ខែមេសា ។
នៅថ្ងៃបន្ទាប់ អតិថិជនជាច្រើននាក់ មានរោគសញ្ញាពុលអាហារដូចជា ក្អួត រាគ ក្តៅខ្លួន និងឈឺពោះ។ ចំនួនអ្នកពុល បានបន្តកើនឡើង ចាប់តាំងពីពេលនោះមក ។
ម្ចាស់ហាងភោជនីយដ្ឋាន Bang banh mi ដែលបានបើកជាងមួយទសវត្សរ៍ បាននិយាយថា គ្រឿងផ្សំ ត្រូវបានទិញពីអ្នកលក់រាយជុំវិញទីក្រុង ហើយមិនមានកិច្ចសន្យាទេ ។
ភោជនីយដ្ឋាន ត្រូវបានផ្អាក ដើម្បីត្រួតពិនិត្យបន្ថែមទៀត។ ការត្រួតពិនិត្យបឋម បានបង្ហាញថា ហាងមិនស្របតាមស្តង់ដារសុវត្ថិភាពចំណីអាហារនោះទេ។ ប៉ូលិសកំពុងតែស៊ើបអង្កេតរកមូលហេតុ នៃការពុលអាហារនេះ ៕
ចែករំលែកព័តមាននេះ