រាជធានីភ្នំពេញ ៖ យោងតាមរបាយការណ៍ក្រសួងទេសចរណ៍បង្ហាញថា ក្នុងរយៈពេល១០ខែ ដើមឆ្នាំ២០១៨នេះ កម្ពុជាទទួលបានភ្ញៀវទេសចរបរទេសប្រមាណ៤,៨លាននាក់ គាំទ្រកំណើនសំខាន់ដោយភ្ញៀវទេសចរជនជាតិចិន ដែលមានរហូតដល់ជាង១,៦លាននាក់ ។
ក្នុងរបាយការណ៍ដដែលបានបង្ហាញថា ភ្ញៀវទេសចរអន្តរជាតិដែលបានមកដល់កម្ពុជា តាមរយៈផ្លូវអាកាស មានរហូតដល់ជាង៣,៣លាននាក់ ឬស្មើនឹង៦៨%នៃភ្ញៀវបរទេសមកដល់សរុប។ ក្នុងចំណោមអាកាសយានដ្ឋានអន្តរជាតិទាំងបី ឃើញថា អាកាសយានដ្ឋានអន្តរជាតិសៀមរាបទទួលបានភ្ញៀវទេសចរបរទេសច្រើនជាងគេដែលមានរហូតដល់១.៥៧៨.៣១៧នាក់ ខណៈអាកាសយានដ្ឋានភ្នំពេញក៏មានប្រហាក់ប្រហែលគ្នាដែរ គឺមានចំនួន១.៥៦០.៩៩៣នាក់។ ដោយឡែកសម្រាប់ភ្ញៀវបរទេសដែលចូលមកកម្ពុជា តាមច្រកព្រំដែនផ្លូវគោកវិញ មានប្រមាណ១,៤លាននាក់ ឬក៏ប្រមាណ២៩,៣% នៃភ្ញៀវសរុប ។
របាយការណ៍បានបញ្ជាក់ផងដែរពីទីផ្សារគោលដៅប្រទេសចំនួន១០ ដែលមានភ្ញៀវទេសចរមកកាន់កម្ពុជាច្រើនជាងគេ ក្នុងនោះចិនបានឈរលំដាប់ទី១ ក្នុងរយៈពេលប្រមាណ២ឆ្នាំចុងក្រោយនេះ បន្ទាប់មកគឺវៀតណាមលេខ២ តាមពីក្រោយដោយភ្ញៀវទេសចរឡាវលេខ៣ ថៃលេខ៤ កូរ៉េខាងត្បូងលេខ៥ សហរដ្ឋអាមេរិកលេខ៦ ជប៉ុនលេខ៧ ម៉ាឡេស៊ីលេខ៨ ប្រទេសបារាំងលេខ៩ និងលេខ១០ជាភ្ញៀវទេសចរជនជាតិអង់គ្លេស ។
ចំណែកតំបន់ទេសចរណ៍ល្បីៗនៅកម្ពុជាវិញ ភ្នំពេញទទួលបានភ្ញៀវទេសចរបរទេសប្រមាណ២,៧លាននាក់ឬប្រមាណ៤៨,៤%នៃភ្ញៀវទេសចរសរុប ខណៈសៀមរាបទទួលបានប្រមាណ២,០៩លាននាក់ ស្មើនឹងប្រមាណ៣៦,៩%នៃភ្ញៀវសរុប ។
បើតាមលោក អេរិក ដេឡូបែល (Eric Delobel) នាយកប្រតិបត្តិក្រុមហ៊ុនអាកាសយានដ្ឋានកម្ពុជា បានឲ្យដឹងថា កំណើនអ្នកដំណើរឆ្លងកាត់អាកាសយានដ្ឋានអន្តរជាតិកម្ពុជាទាំង៣កាន់តែជំរុញឲ្យមានការពង្រីកវិសាលភាពអាកាសយានដ្ឋានជាបន្តបន្ទាប់ ដើម្បីឆ្លើយតបនឹងតម្រូវការ ។ ឆ្នាំនេះមានជើងហោះហើរថ្មីៗមួយចំនួនបានចាប់ផ្ដើមបើកការហោះពីក្រៅប្រទេសកម្ពុជា ហើយនឹងពីកម្ពុជាទៅកាន់ប្រទេសគោលដៅទាំងនោះវិញ ហើយឆ្នាំ២០១៩ខាងមុខនេះ ក៏មានជើងហោះហើរថ្មីមួយទៀត ពីរដ្ឋធានីប៉េកាំង មកកាន់អាកាសយានដ្ឋានអន្តរជាតិភ្នំពេញ ។ លោកបន្តថា ការបន្ថែមជើងហោះហើរថ្មីៗពីគោលដៅក្នុងតំបន់មកកម្ពុជា និងពីកម្ពុជាទៅវិញនោះ នឹងធ្វើឲ្យកំណើនអ្នកដំណើរកើនឡើងបន្ថែមទៀត ហើយក្នុងឆ្នាំ២០១៨នេះ អ្នកដំណើរឆ្លងកាត់ផ្លូវអាកាសរំពឹងថា នឹងទទួលបាន១០លាននាក់ ខណៈឆ្នាំមុនមានចំនួន៨,៨លាននាក់ ។
ក្រសួងទេសចរណ៍ បានកំណត់ផែនការនឹងទទួលបានភ្ញៀវទេសចរអន្តរជាតិប្រមាណ៦,២លាននាក់នៅឆ្នាំ២០១៨នេះ ខណៈរយៈពេល១០ខែ ទទួលបានតែជាង៤,៨លាននាក់ប៉ុណ្ណោះ។ ដូច្នេះនៅសល់រយៈពេល២ខែទៀត តើកម្ពុជាអាចនឹងសម្រេចបានដូចការរំពឹងទុករបស់ក្រសួង ឬយ៉ាងណា ? រដ្ឋលេខាធិការក្រសួងទេសចរណ៍ លោក ទិត ចន្ថា បានអះអាងកាលពីពេលថ្មីៗនេះថា បើតាមអត្រានៃកំណើននៃការមកដល់របស់ភ្ញៀវទេសចរអន្តរជាតិកើនឡើងរាល់ខែនេះ ក្រសួងសង្ឃឹមថា នៅឆ្នាំ២០១៨នេះ កម្ពុជានឹងទទួលបានភ្ញៀវទេសចរអន្តរជាតិក្នុងរង្វង់៦,២លាននាក់ ហើយក្នុងនោះភ្ញៀវទេសចរចិនប្រមាណជាង២លាននាក់ ។ប្រតិបត្តិករទេសចរណ៍មកពីវិស័យឯកជន ក៏បានសម្ដែងសុទិដ្ឋិនិយមផងដែរថាកម្ពុជានឹងសម្រេចបានភ្ញៀវទេសចរអន្តរជាតិតាមការរំពឹងទុក ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានថ្លែងថា កម្ពុជាពិតជាសម្រេចបានកំណើនភ្ញៀវទេសចរមែន ដែលភាគច្រើនជាភ្ញៀវទេសចរចិន ។ លោកបន្តថា ៖« គោលនយោបាយបើកចំហជើងមេឃរបស់ប្រមុខរាជរដ្ឋាភិបាល បានទទួលជោគជ័យដែលធ្វើឲ្យចំនួនក្រុមហ៊ុនអាកាស ចរណ៍ និងក្រុមហ៊ុនភ្នាក់ងារទេសចរណ៍បានកើនឡើងយ៉ាងគំហុក »។ យ៉ាងនេះក្ដី លោកថា ៖« ទោះជាយ៉ាងណា កម្ពុជាត្រូវរៀបចំអភិវឌ្ឍន៍រមណីយដ្ឋានទេសចរណ៍ និងផលិតផលទេសចរណ៍បន្ថែមទៀត ពិសេសបញ្ហាអនាម័យគួរផ្តោតការយកចិត្តទុកដាក់ ជាពិសេសពីសំណាក់ថ្នាក់ដឹកនាំស្ថាប័នពាក់ព័ន្ធ » ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ