រាជធានីភ្នំពេញ ៖ គណបក្សនយោបាយរបស់ប្រទេសកម្ពុជាបានចាប់ផ្តើមយុទ្ធនាការជាផ្លូវការសម្រាប់ការបោះឆ្នោតសកលនៅខែក្រោយនេះ ដែលត្រូវបានគេរំពឹងទុកថា មេដឹកនាំដែលគ្រប់គ្រងប្រទេសបានយូរជាងគេបំផុតនៅអាស៊ីលោកនាយករដ្ឋមន្រ្តី ហ៊ុន សែន នឹងបន្តការគ្រប់គ្រងអំណាច ។ គណបក្សប្រជាជនកម្ពុជា របស់លោក ហ៊ុន សែន ត្រូវបានគេរំពឹងទុកថានឹងឈ្នះឆ្នោតនៅថ្ងៃទី២៨ ខែកក្កដា យ៉ាងភ្លូកទឹកភ្លូកដី ។ លោក ហ៊ុន សែន បានដឹកនាំប្រទេសកម្ពុជាចាប់តាំងពីឆ្នាំ១៩៨៥ ដោយមានការអធ្យាស្រ័យ បន្តិចបន្តួចចំពោះគណបក្សប្រឆាំង ។
គណបក្សចំនួន៨ដែលនឹងចូលរួមក្នុងការបោះឆ្នោតខែក្រោយនេះដើម្បីជ្រើសរើសសមាជិក សភាចំនួន១២៣រូប នៅសភាជាន់ទាប ។ អ្នកឈ្នះនឹងរៀបចំរដ្ឋាភិបាលថ្មី ដើម្បីដឹកនាំប្រទេសកម្ពុជារយៈពេល៥ឆ្នាំបន្តទៀត ។ មេដឹកនាំគណបក្សប្រឆាំងលោក សម រង្ស៊ី បានភៀសខ្លួនទៅកាន់ប្រទេសបារាំងដើម្បីគេច ចេញពីការជាប់ពន្ធនាគាររយៈពេល១២ឆ្នាំដែលត្រូវបានគេមើលឃើញយ៉ាងច្បាស់ គឺជាហេតុផលនយោបាយ ។ លោក ហ៊ុន សែន និងមេដឹកនាំគណបក្សប្រជាជនកម្ពុជាដទៃទៀត បានចាប់ផ្តើមយុទ្ធនាការ នៅថ្ងៃព្រហស្បតិ៍ដោយទទួលការប្រសិទ្ធពរពីគណៈសង្ឃជាន់ខ្ពស់របស់ប្រទេសនេះនៅចំពោះមុខអ្នកគាំទ្រ១០ពាន់នាក់ ។
លោក ហេង សំរិន ប្រធានកិត្តិយសគណបក្សប្រជាជនកម្ពុជាបានប្រាប់នៅក្នុងកិច្ចប្រជុំថា «ធ្វើការសម្រេចចិត្តត្រឹមត្រូវនឹងនាំមកនូវជោគជ័យច្រើន ប៉ុន្តែបើធ្វើការសម្រេចខុសនឹងនាំមកនូវការបរាជ័យ និងគ្រោះថា្នក់ធំបំផុតសម្រាប់ជាតិ» ។ អ្នកគាំទ្ររាប់ពាន់នាក់មកពីគណបក្សនយោបាយជាច្រើនបានដង្ហែនៅលើដងផ្លូវមួយចំនួនក្នុងទីក្រុងភ្នំពេញ ខណៈពេលដែលមានរថយន្តនិងម៉ូតូត្រូវបានតុបតែងដោយស្លាកនយោបាយ ហើយបានស្រែកពាសពេញទីក្រុងភ្នំពេញ ។ ប្រជាជន៩,៦លាននាក់បានចុះឈ្មោះដើម្បីបោះឆ្នោតក្រោមការត្រួតពិនិត្យរបស់អ្នកសង្កេត ការណ៍ជាតិ និងអន្តរជាតិជាង៧.៧០០នាក់ ៕
ចែករំលែកព័តមាននេះ