ទីភ្នាក់ងារព័ត៌មានបរទេស កាលពីថ្ងៃទី២៧ មិថុនា ផ្សាយថា មានអគ្គីភ័យដ៏សន្ធោសន្ធៅនៅក្នុងទីក្រុងអាលម៉ាទី រដ្ឋធានីដ៏ធំរបស់កាហ្សាក់ស្ថាន ដោយរថយន្តដឹកប្រេងមួយគ្រឿងបានផ្ទុះបណ្តាលឱ្យឆាបឆេះគួរឱ្យរន្ធត់ ។ ក្រោយពេលកើតហេតុ អ្នកបើករថយន្តស្លាប់ និងភ្លើងបានរាលដាលបណ្តាលឱ្យឆេះរថយន្តដទៃទៀតចំនួន៨គ្រឿង តាមការគូសបញ្ជាក់ពីសាលាក្រុងអាលម៉ាទី ។
ស្របពេលជាមួយគ្នានេះដែរ ចៅហ្វាយក្រុងអាលម៉ាទីបានគូសបញ្ជាក់ថា រថយន្តដឹកប្រេងបានក្រឡាប់ និងបង្កឱ្យផ្ទុះធ្វើឱ្យប្រេងហូរចេញពីស៊ីទែនរីករាលដាលទៅឆាបឆេះរថយន្ត៨គ្រឿងផ្សេងទៀតនៅបរិវេណក្បែរកន្លែងកើតហេតុ ។ អណ្តាតភ្លើងបានឆាបឆេះឡើងក្នុងរយៈកម្ពស់៩ជាន់នៃអគារ ធ្វើឱ្យអ្នកបើករថយន្តស្លាប់ម្នាក់ ឯផ្សែងពណ៌ខ្មៅបានហុយទ្រលោម ខណៈក្រុមអ្នកពន្លត់អគ្គិភ័យកំពុងព្យាយាមអន្តរាគមន៍ ។
ក្រុងអាលម៉ាទី ជាក្រុងមួយជាប់នឹងព្រំដែនប្រទេសចិន ស្ថិតនៅភាគខាងកើតឆៀងខាងត្បូងកាលពីមុនធ្លាប់ជារដ្ឋធានីរបស់កាហ្សាក់ស្ថាននៅត្រឹមឆ្នាំ១៩៩៨ ក្រោយមកកាហ្សាក់ស្ថានក៏បានប្តូររដ្ឋធានីទៅអាស្តាណា ដែលជាមជ្ឍមណ្ឌលនៅចំណុចកណ្តាលនៃប្រទេស ៕
ចែករំលែកព័តមាននេះ