រាជធានីភ្នំពេញ ៖ ដើមត្រសេកមួយដើមប៉ុនភ្លៅបានដួលរលំទាំងឫស បណ្តាលឱ្យសង្កត់រថយន្ត២គ្រឿង ម៉ូតូមួយគ្រឿង និងរងរបួសមនុស្សម្នាក់ ខណៈពេលយានយន្តទាំងនោះឈប់នៅចំណុចស្តុបដើម្បីសម្រួល និងបើកផ្លូវឱ្យក្បួនដង្ហែឃោសនារបស់គណបក្សសង្គ្រោះជាតិ ហើយខ្យល់បានបោកបក់ និងមេឃងងឹតប្រុងរកកល់ធ្លាក់ភ្លៀង ។
រាជធានីភ្នំពេញ ៖ ដើមត្រសេកមួយដើមប៉ុនភ្លៅបានដួលរលំទាំងឫស បណ្តាលឱ្យសង្កត់រថយន្ត២គ្រឿង ម៉ូតូមួយគ្រឿង និងរងរបួសមនុស្សម្នាក់ ខណៈពេលយានយន្តទាំងនោះឈប់នៅចំណុចស្តុបដើម្បីសម្រួល និងបើកផ្លូវឱ្យក្បួនដង្ហែឃោសនារបស់គណបក្សសង្គ្រោះជាតិ ហើយខ្យល់បានបោកបក់ និងមេឃងងឹតប្រុងរកកល់ធ្លាក់ភ្លៀង ។
ហេតុការណ៍នេះកើតឡើងកាលពីវេលាម៉ោង៣ និង៣០នាទីរសៀល ថ្ងៃទី២៧ មិថុនា នៅតាមផ្លូវលេខ២៦១ កែងវិថីឧកញ៉ាទេព ផន ស្ថិតក្នុងសង្កាត់ទឹកល្អក់ទី៣ ខណ្ឌទួលគោក ។ រថយន្តដែលដើមឈើរលំសង្កត់នេះ ១គ្រឿងម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2J-8072 និង១គ្រឿងទៀតម៉ាកហ៊ីយ៉ាន់ដាយ ដឹកទឹកកក ពាក់ស្លាកលេខ ភ្នំពេញ 2R-0860 ។ ចំណែកម៉ូតូម៉ាកគុប ពណ៌ទឹកប្រាក់ បើកបរដោយបុរសម្នាក់ រងរបួសស្រាល។
ប្រភពព័ត៌មានឱ្យដឹងថា មុនពេលកើតហេតុ គេឃើញក្បួនរថយន្តឃោសនារបស់គណបក្សសង្គ្រោះជាតិ ដង្ហែតាមវិថីឧកញ៉ាទេព ផន ពីលិចទៅកើត ខណៈនោះកំណាត់ផ្លូវនានាដែលឆ្លងកាត់វិថីឧកញ៉ាទេព ផន ត្រូវបានបិទ ហើយសមត្ថកិច្ចនគរបាលខណ្ឌទួលគោកបានបិទចរាចរណ៍ដើម្បីសម្រួលដល់ក្បួនឃោសនា ។ ទន្ទឹមនោះ ផ្លូវលេខ២៦១ កែងវិថីឧកញ៉ាទេព ផន ក៏ត្រូវបានបិទ ហើយអ្នកដំណើរដែលធ្វើដំណើរតាមផ្លូវលេខ២៦១ ក៏បានឈប់គ្រប់ៗគ្នាដែរ ។ នៅពេលដែលយានយន្តកំពុងឈប់ និងមានខ្យល់បោកបក់ពីលិច ស្រាប់តែដើមត្រសេកមួយដើមប៉ុនភ្លៅ បានរលំទាំងឫសស្ទាក់ផ្លូវលេខ២៦១ សង្កត់លើរថយន្តចំនួន២គ្រឿង និងម៉ូតូ១គ្រឿងតែម្តង ។
ទោះបីជាយ៉ាងនេះក្តី ក៏ចាត់ទុកថា ជាសំណាងល្អដែរ ដែលពុំបណ្តាលឱ្យអ្នកដំណើររងរបួសធ្ងន់ ។ បន្ទាប់ពីដើមឈើរលំ មន្ត្រីនគរបាល និងប្រជាពលរដ្ឋក្បែរនោះ បាននាំគ្នាអូសទាញយករថយន្ត និងម៉ូតូចេញ ហើយយករណារអារកាត់ដើមឈើនោះ ។ លុះក្រោយមក រថយន្តដែលរងការខូចខាត រួមទាំងម៉ូតូក៏បានបើកទៅបាត់ ព្រោះមិនដឹងរកអ្នកណាសង ៕
ចែករំលែកព័តមាននេះ