ខេត្តព្រះសីហនុ ៖ នារីស្រស់សោភាម្នាក់ ត្រូវមិត្តភក្តិបញ្ជូនទៅសង្គ្រោះនៅគ្លីនិកឯកជនភ្លាមៗ បន្ទាប់ពីជួបហេតុការណ៍គ្រោះថ្នាក់ចរាចរណ៍រងរបួសបែកក្បាល ដាច់ថ្ពាល់ធ្លាយឃើញធ្មេញសន្លប់ស្តូកស្តឹង កាលពីវេលាម៉ោង១០យប់ ថ្ងៃទី២៧ មិថុនា នៅចំណុចផ្លូវកោងមុខក្លិបកម្សាន្តមួយកន្លែង ស្ថិតក្នុងក្រុមទី១៤ ភូមិ៣ សង្កាត់៤ ក្រុង-ខេត្តព្រះសីហនុ ។ នារីរងគ្រោះឈ្មោះ ស្រី និត ភេទស្រី អាយុ២២ឆ្នាំ ជាអ្នកបម្រើការនៅក្លិបខារា៉អូខេ ។
ប្រភពព័ត៌មានឱ្យដឹងថា នៅយប់កើតហេតុនារីរងគ្រោះពុំបានទៅធ្វើការទេ គឺដើរផឹកស៊ីជាមួយមិត្តភក្តិស្រីប្រុសជាច្រើននាក់ ។ ក្រោយមកនារីរងគ្រោះបានចេញពីកន្លែងផឹកស៊ីដោយជិះម៉ូតូមា៉កស្គូពី ពណ៌ខៀវលាយស គ្មានស្លាកលេខ ក៏ជួបគ្រោះថ្នាក់ចរាចរណ៍រងរបួសធ្ងន់ ត្រូវបញ្ជូនទៅសង្គ្រោះនៅគ្លីនិកឯកជនរស្មីកំពង់សោមហើយ ។ សាក្សីបានអះអាងថា មុនពេលកើតហេតុម៉ូតូមួយគ្រឿងបើកដោយនារីរងគ្រោះលឿនដូចហោះ ពេលមកដល់ចំណុចកើតហេតុជាចំណុចផ្លូវកោងបត់មិនទាន់ក៏ជ្រុលទៅបុករបាំងចែកផ្លូវពេញទំហឹងបណ្តាលឱ្យសន្លប់ស្តូកស្តឹង ។ក្រោយកើតហេតុម៉ូតូស្គូពីត្រូវប៉ូលិសយកទៅរក្សាទុកនៅប៉ុស្តិ៍រដ្ឋបាលនគរបាលសង្កាត់លេខ៤ ៕
ចែករំលែកព័តមាននេះ