ខេត្តព្រៃវែង ៖ រយៈពេលប៉ុន្មានថ្ងៃមកនេះ ខេត្តព្រៃវែងបានផ្ទុះកើតរឿងដ៏រសើបមួយ គឺមានក្រុមឈ្មួញបាននាំគ្នាទៅគាស់ផ្តួលរំលំដើមស្វាយព្រៃមួយដើម ដែលមានអាយុកាលរហូតដល់ទៅ១៣០ឆ្នាំ នៅភូមិឬស្សីជួរ ឃុំបឹងព្រះ ស្រុកបាភ្នំ និងបានដឹកយកចេញទៅបាត់ដោយសុវត្ថិភាព ទាំងដែលមន្ត្រីជំនាញរដ្ឋបាលព្រៃឈើខេត្ត បានចុះទៅឃើញ ប៉ុន្តែបានត្រឹមតែធ្វើកំណត់ហេតុ តែគ្មានចំណាត់ការ ឬទំនងមិនខុសច្បាប់ ព្រោះជាឈើស្រុក។
ដើមស្វាយព្រៃអាយុ១៣០ឆ្នាំនេះ ត្រូវបានគេគាស់ផ្តួលកាលពីថ្ងៃទី៣ ធ្នូ ដោយមនុស្សមួយក្រុម ដែលគេបានអះអាងថា បានទិញពីម្ចាស់ដើមស្វាយនេះរួចហើយ ក្នុងគោលបំណងដើម្បីយកទៅដាំនៅក្នុងរោងចក្រមួយកន្លែង ក្នុងទីប្រជុំជនអ្នកលឿង។
ប៉ុន្តែនៅពេលដែលផ្តួលរំលំដើមស្វាយនេះបានហើយ បំរ៉ុងដឹកចេញក៏មានអ្នកសារព័ត៌មានមួយក្រុមទៅទាន់ និងបានថតចុះផ្សាយពីសកម្មភាពនេះ ទើបធ្វើឱ្យមានការភ្ញាក់ផ្អើលពេញខេត្ត លុះស្អែកឡើងថ្ងៃទី៤ ធ្នូ លោក ឃឹម អូន នាយសង្កាត់រដ្ឋបាលព្រៃឈើខេត្តព្រៃវែង ក៏ចុះទៅត្រួតពិនិត្យវាស់វែងធ្វើកំណត់ហេតុ រួចក៏ត្រឡប់ទៅវិញ ដោយទុកដើមស្វាយនោះនៅទីតាំងដដែល និងគ្មានការការពារអ្វីនោះទេ ដូចគ្រាន់តែទៅមើល។
ប្រជាពលរដ្ឋនៅភូមិឬស្សីជួរនោះ បានរាយការណ៍ប្រាប់ក្រុមអ្នកសារព័ត៌មានថា រហូតមកដល់ម៉ោង២រសៀល ថ្ងៃទី១១ ធ្នូ ស្រាប់តែឃើញក្រុមឈ្មួញនាំគ្នាមកដឹកយកដើមស្វាយព្រៃនោះទៅបានយ៉ាងរលូន ដោយគ្មានការរំខានពីសមត្ថកិច្ច ឬមន្ត្រីជំនាញពាក់ពន្ធ័ណាឡើយ។
ក្រោយពីទទួលបានព័ត៌មាននេះភ្លាម អ្នកយកព័ត៌មានកោះសន្តិភាពបានសាកសួរទៅកាន់មន្ត្រីជំនាញ និងអាជ្ញាធរគ្រប់ជាន់ថ្នាក់ ហើយជាលទ្ធផលក៏លេចចេញនូវលិខិតអនុញ្ញាតិមួយ ធ្វើនៅថ្ងៃទី៧ ខែធ្នូ ២០១៨ ក្រោយពេលដែលដើមស្វាយព្រៃនោះត្រូវកាប់ផ្តួលបាន៣ថ្ងៃ ដែលបានចុះហត្ថលេខាឯកភាព និងអនុញ្ញាតិដោយលោក អ៊ុក សំណាង ប្រធានមន្ទីរកសិកម្មខេត្តព្រៃវែង និងលោក សួន សុម៉ាលីន អភិបាលរងខេត្តព្រៃវែង។
ដោយអនុញ្ញាតិឱ្យបុរសម្នាក់ឈ្មោះ ស៊ិន សុវណ្ណា ភេទប្រុស អាយុ៥០ឆ្នាំ មានទីលំនៅផ្ទះលេខ១៧ ផ្លូវ២១១ ភូមិ១២ សង្កាត់វាលវង់ ខណ្ឌ៧មករា រាជធានីភ្នំពេញ ជាមន្ត្រីកងរាជអាវុធហត្ថលើផ្ទៃប្រទេសទិញដើមស្វាយចំនួន៣ដើម ពីប្តីប្រពន្ធ២នាក់ឈ្មោះ ជួប សែន (បី្ត) និងប្រពន្ធឈ្មោះ ទិត្យ ហ៊ីម មានទីលំនៅក្នុងភូមិឬស្សីជួរ ឃុំបឹងព្រះ ស្រុកបាភ្នំ ក្នុងតម្លៃ១លាន៧សែនរៀលក្នុង១ដើម ដើម្បីយកទៅដាំលម្អសោភណ្ឌភាព នៅមុខរោងចក្រទិញលក់គ្រាប់ឈូក៩៩៩ នៅទីប្រជុំជនអ្នកលឿង ប៉ុន្តែទើបតែគាស់ដឹកចេញបាន១ដើម ក៏មានរឿងតែម្តង។
នៅព្រឹកថ្ងៃទី១២ធ្នូ អ្នកយកព័ត៌មានកោះសន្តិភាព បានតាមទៅថតយករូបភាពដើមស្វាយព្រៃដែលគេដឹកចេញនោះ គឺពិតជាត្រូវបានដឹកយកមកទុកនៅក្នុងរោងចក្រទិញលក់គ្រាប់ឈូក៩៩៩នោះមែន ប៉ុន្តែពលរដ្ឋនៅក្បែនោះបញ្ជាក់ប្រាប់ថា រោងចក្រនោះបានបិទទ្វាជាង២ខែមកហើយ ដោយសាររកស៊ីមិនចំណេញ។
នៅក្នុងរោងចក្រនោះពុំមានអ្វីទាំងអស់ ក្រៅពីដើមរាំងជាច្រើនដើម ដែលគេដើរប្រមូលទិញពីតាមភូមិយកមកស្តុបទុកនៅទីនេះ ហើយធ្វើការនាំចេញទៅប្រទេសវៀតណាម នៅពេលដែលមានឈ្មួញខាងវៀតណាមត្រូវការ ហើយដើមស្វាយព្រៃដែលគេយកមកនេះ ក៏មានជោគវាសនាដូចជាដើមរាំងទាំងនោះដែរ៕
ចែករំលែកព័តមាននេះ