រាជធានីភ្នំពេញ ៖ ក្នុងរយៈពេលចុងក្រោយ គេកត់សម្គាល់ថា យុវតីវ័យក្មេងដែលមានកាយសម្បទារឹងមាំ បានវិវត្តខ្លួនក្លាយជាកីឡាការិនីល្បុក្កតោច្រើនឡើង ដោយក្នុងនោះគេឃើញក្លិបល្បុក្កតោក្មេងវត្តថាន់ មានសកម្មភាពបង្វឹកសិស្សសស្រាក់សស្រាំជាងគេ ដោយក្នុងចំណោមសិស្សរបស់ក្លិបនេះ ក៏មាននារីមួយចំនួនធំ…
រាជធានីភ្នំពេញ ៖ ក្នុងរយៈពេលចុងក្រោយ គេកត់សម្គាល់ថា យុវតីវ័យក្មេងដែលមានកាយសម្បទារឹងមាំ បានវិវត្តខ្លួនក្លាយជាកីឡាការិនីល្បុក្កតោច្រើនឡើង ដោយក្នុងនោះគេឃើញក្លិបល្បុក្កតោក្មេងវត្តថាន់ មានសកម្មភាពបង្វឹកសិស្សសស្រាក់សស្រាំជាងគេ ដោយក្នុងចំណោមសិស្សរបស់ក្លិបនេះ ក៏មាននារីមួយចំនួនធំ ។ មានមូលហេតុធំ៤ ដែលនាំឱ្យនារីវ័យក្មេងៗទាំងនោះចំណាយពេល និងកម្លាំងបង្វឹកខ្លួនឯងនៅក្នុងវិស័យល្បុក្កតោ។
លោក ឆន ច័ន្ទវិរៈ គ្រូធំប្រចាំសាលាគុនវត្តថាន់ បានអះអាងថា ក្នុងចំណោមកូនសិស្សរបស់គាត់ច្រើននាក់ មានកូនសិស្សជានារីប្រមាណ១០ទៅ១១នាក់ ប៉ុន្តែសិស្សនារីដែលមកហ្វឹកហាត់ជាប់លាប់រាល់ថ្ងៃ គឺមានតែ៧នាក់ដោយនារីទាំងនោះសកម្មក្នុងការហ្វឹកហាត់ទៀងទាត់មិនខុសគ្នាពីសិស្សប្រុសនោះទេ ។ ក្នុងចំណោមអ្នកទាំង៧រូបនោះ លោកថា សិស្សខ្លះហ្វឹកហាត់ក្នុងក្រុមវត្តថាន់ជាងមួយឆ្នាំមកហើយ ខណៈសិស្សដែលហាត់បានតិចជាងគេក៏ហ្វឹកហាត់បានរង្វង់កន្លះឆ្នាំនោះដែរ ទើបលោកហៅសិស្សនារីទាំង៧រូបថា ជាកីឡាការិនីល្បុក្កតោ និងតែងជំរុញសកម្មភាពពួកនាងនៅក្នុងវិស័យមួយនេះ ។
លោកនិយាយថា៖«បើនិយាយពីសិស្សស្រីគឺចេញចូលៗ ចំនួនជាង១០នាក់ ដោយអ្នកខ្លះមកហាត់ពីរបីថ្ងៃបាត់ពីរបីថ្ងៃ តែបើអ្នកហាត់ជាប់លាប់តែម្ដង គឺមានតែស្រីៗ៧នាក់ប៉ុណ្ណោះ!»។ មានហេតុផល៤ដែលនាំឱ្យនារីទាំងនេះ មកហ្វឹកហាត់ល្បុក្កតោជាប់លាប់ក្នុងក្រុមវត្តថាន់ ទី១គឺដោយសារតែទីតាំងបង្វឹករបស់ក្រុមវត្តថាន់ស្ថិតនៅកន្លែងដែលពួកនាងធ្វើការ ទី២គឺពួកនាងចង់ចេះក្បាច់គុនការពារខ្លួន ទី៣គឺចង់ក្លាយខ្លួនជាតារាសម្ដែងនៅពេលមានការជ្រើសរើសអ្នកចេះសម្ដែងវាយតប់ និងទី៤សំខាន់ជាងគេគឺចង់ចូលរួមអភិរក្សក្បាច់គុនល្បុក្កតោរបស់ដូនតាខ្មែរតែម្ដង ។
លោកអះអាងថា ក្នុងចំណោមស្រីៗទាំង៧ មួយចំនួនពួកនាងមកហាត់របៀបលេងសើចប៉ុណ្ណោះ ប៉ុន្តែដោយសារតែបានដឹងថាក្បាច់គុនមួយនេះខ្វះអ្នកចូលរួមអភិរក្ស ទើបនារីទាំងនោះជាប់ចិត្តហើយហ្វឹកហាត់ជាប់លាប់ ។ លោកនិយាយថា៖«អ្នកទាំង៧ហ្នឹងពីដំបូងក៏ចង់ក្លាយជាកីឡាការិនីអីដែរ ប៉ុន្តែមកពីហាត់យូរៗទៅ គាត់ដូចសប្បាយ ហើយចង់ចូលរួមអភិរក្សកីឡាហ្នឹង ទើបគាត់មកហាត់ជាប់លាប់ជុំគ្នា មិនដែលបាត់មុខ!»។ កីឡាការិនីទាំង៧លោកថា ក៏បានក្លាយខ្លួនជាតារាសម្ដែងក្នុងខ្សែភាពយន្តមួយចំនួនផងដែរ ទើបកាន់តែធ្វើឱ្យពួកគេជាប់ចិត្តហើយសកម្មក្នុងក្រុម មិនថាក្នុងពេលហ្វឹកហាត់ និងបានវិវត្តន៍ខ្លួនក្លាយជាគ្រូបង្វឹកដល់សិស្សស្រីៗផ្សេងទៀតផង នៅក្នុងសាលាគុន។
លោក ឆន ច័ន្ទវិរៈ បានថ្លែងបញ្ជាក់ថា ក្នុងចំណោមកូនសិស្សស្រីទាំង៧របស់លោក មួយចំនួនគឺជាសិស្សសាលា មួយចំនួនគឺជាអ្នកធ្វើការក្រុមហ៊ុន ហើយមួយចំនួនទៀតគឺជាអ្នករត់តុ និងជាអ្នកគិតលុយប្រចាំភោជនីយដ្ឋានទើបលោកកោតសរសើរដែលនារីទាំងនោះស្រឡាញ់ពេញចិត្តល្បុក្កតោ ហើយចូលរួមយ៉ាងសកម្មក្នុងការអភិរក្សកីឡាមួយនេះ។ អ្វីដែលគួរឱ្យសរសើរគឺពួកនាងចំណាយពេលវេលាដោយការលះបង់ខ្ពស់ ដែលធ្វើឱ្យម្នាក់ៗក៏ឱ្យតម្លៃនាងក្នុងនាមជាអ្នកបន្តវេនល្បុក្កតោប្រចាំក្រុមផងដែរ ។
លោកថា ល្បុក្កតោវត្តថាន់រាល់ថ្ងៃ ប្រសិនបើមានការគាំទ្រជាសកម្មភាព និងថវិកាពីសប្បុរសជនថែមទៀត មិនដឹងថានឹងមានសិស្សទាំងប្រុសទាំងស្រីចូលហ្វឹកហាត់ច្រើនឡើងប៉ុនណាទេ ប៉ុន្តែដោយសារតែសិស្សទាំងនោះមិនមានប្រាក់ខែ ហើយត្រូវលះបង់ថវិកាផ្ទាល់ខ្លួនថែមទៀត ទើបមានសិស្សខ្លះគឺបាត់មុខវិញ ក្រោយពេលតស៊ូហ្វឹកហាត់បានមួយរយៈ ។ លោកទទូចចង់ឃើញកីឡាការិនីទាំងនោះ ក្លាយខ្លួនជាអ្នកបន្តវេនកាន់តែល្អ ដោយអាចបើកជាសាលាគុនខ្លួនឯងដូចគ្នានឹងរូបលោកដើម្បីបង្ហាញសាធារណជនថានារីក៏មានសមត្ថភាពក្លាយជាគ្រូបង្វឹកអាជីពចូលរួមលើកស្ទួយកីឡាល្បុក្កតោជាដើម ។
ក្នុងនោះលោកក៏ទទូចឱ្យបណ្ដាផលិតកម្ម ផ្ដល់ឱកាសឱ្យសិស្សនារីៗរបស់លោកបានក្លាយជាតារាសម្ដែងដូចគ្នានឹងតារាសម្ដែងកញ្ញា ពេជ្រ ចរណៃ ឱ្យបានច្រើន ដោយសារតែលោកយល់ថាដើម្បីផ្ដល់ជាកម្លាំងចិត្តឱ្យនារីល្បុក្កតោទាំងនោះនៅតែសកម្មក្នុងក្រុមបានលុះត្រាតែពួកនាងទទួលបានឱកាសលេចមុខលេចមាត់នៅក្នុងសកម្មភាពសម្ដែងភាពយន្តបែបនេះសិនដែរ។
កញ្ញា ពេជ្រ ចរណៃ ដែលជាកូនសិស្សល្បុក្កតោវត្តថាន់ និងបច្ចុប្បន្នបានក្លាយជាតារាសម្ដែងដែលមានសន្ទុះមួយរូប បានថ្លែងបញ្ជាក់ថា ល្បុក្កតោបានជួយឱ្យនាងទទួលបានឱកាសយ៉ាងខ្លាំង ដោយសារតែពេលដំបូងនាងគ្រាន់តែជាក្មេងស្រីដែលមកហ្វឹកហាត់ល្បុក្កតោដើម្បីការពារខ្លួនប៉ុណ្ណោះ ប៉ុន្តែក្រោយមកក៏មានឱកាសបានសម្ដែង ហើយដោយសារតែចំណូលចិត្ត រូបសម្បត្តិ និងទេពកោសល្យទើបបណ្ដាផលិតករកាន់តែជួយជំរុញ ។
យ៉ាងណាមិញ កេរ្តិ៍ឈ្មោះរបស់នាងកាន់តែអណ្ដែតឡើងក្រោយពេលបានក្លាយជាសមាជិក«គ្រួសារតារាកម្ពុជា»ហើយត្រូវបានក្រុមនេះបំផុសនឹងផ្សព្វផ្សាយរៃអង្គាសថវិកាជួយនាងឡើងផ្អើលគ្រប់ស្រទាប់មហាជនរហូតធ្វើឱ្យនាងដែលមានជំងឺដាច់សរសៃប្រឹសបេះដូងធ្ងន់ធ្ងរមានលទ្ធភាពបានទទួលជំនួយវះកាត់ ទើបក្រោយពេលជាទីផ្សារសម្ដែងរបស់នាងក៏កម្រើកឡើងវិញខ្លាំង។
ពេជ្រ ចរណៃ ប្រកាសថា ជោគជ័យក្នុងសិល្បៈបើគ្មានល្បុក្កតោក៏នាងមិនបានសម្ដែង ហើយបើគ្មានការសម្ដែងក៏មិនបានក្លាយជាសមាជិកក្រុម«គ្រួសារតារាកម្ពុជា» និងរឹតតែមិនមានលទ្ធភាពវះកាត់បេះដូងទៀត ដែលនាងបញ្ជាក់ថា ទាំងនេះសុទ្ធតែជាលទ្ធផលតស៊ូនៅក្នុងល្បុក្កតោវត្តថាន់ ។ អ៊ីចឹងហើយទើបនាងរវល់យ៉ាងណាក៏នៅតែមិនចោលក្រុមនេះ ដោយនៅតែឆ្លៀតពេលបន្តការហ្វឹកហាត់ក្នុងក្រុមវត្តថាន់ រាល់ពេលទំនេរ៕
ចែករំលែកព័តមាននេះ