រាជធានីភ្នំពេញ ៖ ក្រោយពីធ្វើកូដកម្មទាមទារឱ្យប្រឡងបញ្ចប់ការសិក្សាមិនបានសម្រេចនាពេលកន្លងមក កាលពីថ្ងៃទី២៥ មិថុនា និស្សិតថ្នាក់វេជ្ជបណ្ឌិតជំនាន់ទី៦ និងទី៧ នៃសាកលវិទ្យាអន្តរជាតិ(IU)ចំនួន៧៨៤នាក់ បានសរសេរលិខិតមួយ ដើម្បីសុំក្តីអនុគ្រោះ និងការអន្តរាគមន៍ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ដែលមានខ្លឹមសារទាំងស្រុងដូចខាងក្រោម៖
យើងខ្ញុំទាំង៧៨៤នាក់ជានិស្សិតថ្នាក់វេជ្ជបណ្ឌិតជំនាន់ទី៦និងទី៧ នៃសាកលវិទ្យាល័យអន្តរជាតិ សរសេរអត្ថបទនេះដើម្បីឱ្យសាធារណជនបានដឹងអំពីហេតុផលថា ហេតុអ្វីបានជាយើងខ្ញុំទាំងអស់គ្នាប្រឹងធ្វើការទាមទារសុំការអនុគ្រោះដើម្បីប្រឡងបញ្ចប់ការសិក្សាថ្នាក់វេជ្ជបណ្ឌិតដែលមានរយៈពេល៦ឆ្នាំ តាមរយៈការធ្វើកូដកម្មដែលអ្នកចេះដឹងដូចជាយើងខ្ញុំមិនគួរធ្វើ។
យើងខ្ញុំទាំងអស់គ្នាបានចូលរៀននៅឆ្នាំ២០០៥ និងឆ្នាំ២០០៦ ដែលកម្មវិធីសិក្សាថ្នាក់វេជ្ជបណ្ឌិតយោងតាមអនុក្រឹត្យលេខ១២២អនក្រ.បក គឺការសិក្សាក្នុងរយៈពេល៦ឆ្នាំ ដោយប្រឡងបញ្ចប់កម្មវិធីសិក្សា និងសរសេរនិក្ខេបបទបញ្ចប់ ដែលរៀបចំដោយសាកលវិទ្យាល័យ។ ជាក់ស្តែងនិស្សិតជំនាន់ទី១ដល់ជំនាន់ទី៥ សុទ្ធតែទទួលបានការអនុវត្តនូវគោលការណ៍ទាំងនេះ ។
រហូតមកដល់ពេលនេះ យើងខ្ញុំទាំង៧៨៤នាក់បានបញ្ចប់ការសិក្សាតាមកម្មវិធីសិក្សារយៈពេល៦ឆ្នាំ ស្របតាមអនុក្រឹត្យលេខ១២២អនក្រ.បក និងបានរង់ចាំការប្រឡងបញ្ចប់ការសិក្សាអស់រយៈពេលជាង១ឆ្នាំមកហើយ ។ ដោយការរង់ចាំនេះមានរយៈពេលយូរពេក និស្សិតទាំងអស់បាននាំគ្នាមកសាកសួរសាកលវិទ្យាល័យពីមូលហេតុ ទើបដឹងថា ក្រសួងសុខាភិបាលតម្រូវឱ្យនិស្សិតជំនាន់ទី៦និងទី៧យើងខ្ញុំអនុវត្តតាមកម្មវិធីសិក្សារយៈពេល៨ឆ្នាំទៅវិញ (យោងតាមអនុក្រឹត្យលេខ២១អនក្រ.បក និងសជណលេខ១០៧១) ដែលបានអនុម័តនៅឆ្នាំ២០០៧ ក្រោយពេលដែលក្រុមនិស្សិតជំនាន់ទី៦និងទី៧យើងខ្ញុំបានចូលរៀនរយៈពេល១-២ឆ្នាំរួចទៅហើយ ។
សជណលេខ១០៧១ បានអនុញ្ញាតឱ្យនិស្សិតឆ្នាំទី៤ ទី៥ និងទី៦ នៃឆ្នាំសិក្សា២០០៧-២០០៨ បន្តការសិក្សាតាមកម្មវិធីសិក្សានៃអនុក្រឹត្យលេខ១២២អនក្រ.បក ដែលកម្មវិធីសិក្សានេះមានរយៈពេល៦ឆ្នាំ និងតម្រូវឱ្យនិស្សិតឆ្នាំទី២ ទី៣ នៃឆ្នាំសិក្សា២០០៧-២០០៨ អនុវត្តតាមកម្មវិធីសិក្សានៃអនុក្រឹត្យលេខ២១អនក្រ.បក ដែលកម្មវិធីសិក្សាមានរយៈពេល៨ឆ្នាំទៅវិញ ។ ប៉ុន្តែយើងខ្ញុំទាំងអស់គ្នាដែលបានចូលសិក្សាតាំងពីឆ្នាំ២០០៥ និងឆ្នាំ២០០៦ ពុំធ្លាប់បានទទួលដំណឹងពីសាកលវិទ្យាល័យថា នឹងត្រូវអនុវត្តកម្មវិធីសិក្សារយៈពេល៨ឆ្នាំនោះទេ ។ ម៉្យាងទៀតបន្ទាប់ពីបញ្ចប់ការសិក្សារយៈពេល៦ឆ្នាំ សាកលវិទ្យាល័យបានឱ្យនិស្សិតរង់ចាំការប្រឡងរហូតដល់ជាង១ឆ្នាំនេះ បញ្ជាក់ថា កម្មវិធីសិក្សាដែលយើងខ្ញុំបានបញ្ចប់នេះ គឺយោងតាមអនុក្រឹត្យលេខ១២២អនក្រ.បក ដែលកម្មវិធីសិក្សារយៈពេល៦ឆ្នាំ ។
ប្រសិនបើសាកលវិទ្យាល័យបានប្រាប់និស្សិតតាំងពីដំបូងថា ត្រូវរៀនរហូតដល់៨ឆ្នាំ យើងខ្ញុំជានិស្សិតមួយចំនួនដែលនឹងហួសអាយុប្រឡងចូលបម្រើការងាររដ្ឋ(កំណត់ត្រឹមអាយុ៣០ឆ្នាំ) នឹងផ្លាស់ប្តូរទៅរៀនមុខវិជ្ជាផ្សេងដែលការចំណាយថវិកា និងពេលវេលាតិចជាង។ ផែនការនៃជីវិតដែលសង្ឃឹមថា អាចប្រឡងចូលបម្រើការងាររដ្ឋដើម្បីជួយដល់សង្គមជាតិ សង្គមគ្រួសារ និងផែនការផ្សេងៗទៀតត្រូវបានអាក់ខាន ។
បន្ទាប់ពីការទាមទារដោយធ្វើកូដកម្មកន្លងមក យើងខ្ញុំទាំងអស់គ្នាមានការងឿងឆ្ងល់ថា តើសាកលវិទ្យាល័យ និងស្ថាប័នពាក់ព័ន្ធហាក់មិនមានចេតនាផ្តល់នូវយុត្តិធម៌ដល់យើងខ្ញុំទាំងអស់គ្នា និងថែមទាំងអាចកេងចំណេញផលប្រយោជន៍ថែមទៀតផង ប្រសិនបើនិស្សិតព្រមទទួលអនុវត្តតាមកម្មវិធីសិក្សារយៈពេល៨ឆ្នាំ ។
យើងខ្ញុំជានិស្សិតនៃសាកលវិទ្យាល័យអន្តរជាតិ ថ្នាក់េវជ្ជបណ្ឌិត ជំនាន់ទី៦ និងទី៧ សរុបចំនួន៧៨៤នាក់ ស្នើសុំការអនុគ្រោះដ៏ខ្ពង់ខ្ពស់ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ដើម្បីឱ្យយើងខ្ញុំដែលជានិស្សិតជំនាន់ទី៦ និងទី៧ នៃសាកលវិទ្យាអន្តរជាតិ ដែលកំពុងរងនូវអយុត្តិធម៌នេះ អាចទទួលបាននូវការប្រឡងបញ្ចប់ការសិក្សា និងសរសេរនិក្ខេបបទបញ្ចប់ ថ្នាក់វេជ្ជបណ្ឌិត ដែលរៀបចំដោយសាកលវិទ្យាល័យ ៕
ចែករំលែកព័តមាននេះ